💎 السفاح العاشق 💎
🎭 الفصل الثالث : بارت 227 🎭
رئبال : كملي الدوش و خرجي ... غتلقايني كنتسناك فالخارج
قرب طبع قبلة على جبهتها و مشا خرج ... حل باب غرفتو و تم داخل و هو كيحل صدافي القاميجة ... مشا دوش بالخف و لبس عليه هودي گري و سروال كحل ... نشف شعرو بسرعة و خرج ... وقف قدام غرفتها و دق فالباب ...
منين ماسمعش صوتها حل لباب و دخل ... بانت ليه چالسة فطرف الناموسية ملوية فبينوار بيض و شعرها كيقطر ... مشا فاتجاه البالكون سدو و هز فوطة صغيرة ... چلس جنبها دورها عندو و بدا كينشف ليها شعرها و عنيه مفارقوش وجها ... كانت منزلة عنيها و مرة مرة الدمعة كتدفق على خدها ... شوية و هي تهز فيه راسها و سولاتو ...
جولان : " شفايفها كيرجفو " ش شنو وقع ل ث ثاندر ؟
رئبال : " الصمت "
جولان : ش شكون دار ليه هكاك ؟
رئبال : " دوز صبعو مسح ليها دمعتها " خوي راسك من هادشي " وقف " غنقول لبنات يطلعو عندك ... لبسي حوايجك قبل مايضربك البرد
مشى فاتجاه لباب و خرج ... هبط لتحت قال لزينب و سمية يطلعو لعندها ... و هو خارج من الڤيلا نعت لبهاء يتبعو ... و اتاجه للمستودع و هو كيدوز اتصال ...
🍃🍃 بعد مرور شهر ...
فهاد المدة جولان كانت قليل فاش كتخرج من غرفتها ... حالتها زادت تأزمات أكثر ... حتى انها بعدات على الكل ... فينما جا عندها شي حد كتقول بلي بغات تبقى بوحدها ... بالكاد كانت كتاكل وجباتها و صحتها تراجعات ...
أما بالليل فكانت اغلب الوقت تفيق مخضوضة ... كتلقى الدموع فعنيها و جسمها كولو كيرجف ... كتبقى تبكي وسط الظلمة ... و شحال من مرة دخل عندها رئبال و لقاها فديك الحالة ... كيجلس جنبها و يحضنها حتى ترجع فالنعاس ...
هاد الأخير الي مكانتش حالو أحسن ... لكن كيبان للناس الي ضايرين بيه أنه أكثر واحد صامد ... الدراري تأثرو بموت لاحبيبة و فقدانها ... و جاهم صعيب يتأقلمو مع الوضع ... خاصة أنهم خلاوها مابيها والو ...
جاهم غريب أنها تموت فجأة ... و سنمار كان أكثر واحد أسئلة على كيفاش حتى ماتت ... لكن رئبال حرص على أنهم مايشكو فوالو ... آخر حاجة بغى هما يدخلو فهاد المعمعة ... معركتو مع خوه هو الي غيفضيها عاجلا ام آجلا ...
زينب كيف متوقع كانت جنب جولان فهاد المدة ... و كل ما سنح ليها الوقت كانت تزورها ... صاحبتها مكانتش الوحيدة الي خاصها المواساة ... إلياس بدورو كان مأثر عليه موت لاحبيبة ... بعد على الكل لكن هي مخلاتش ليه الفرصة يبعدها ... فهاد المدة كانت جنبو و علاقتهم زادت توطدات أكثر ...
سمية بعد أيام على الجنازة رجعات لدارهم بعد عودة جدها ... بغات تبقى مع جولان أكثر لكن ماقدراتش تخلي جدها بوحدو ... و رجعات من بعد طلات عليها شحال من مرة ... أما موعد عقد قران جولان و رئبال تأجل مرة أخرى لأجل غير مسمى ...
اليوم كان كيف باقي الأيام عند جولان ... چالسة فالفوطوي الي فالبالكون مكمشة و سارحة بعنيها فالجردة الأمامية ... عنيها منفوخين بالبكا و تحتهم كحل بقلة النعاس ... جامعة شعرها ذيل حصان و خصلات قصار مطلوقين لقدام كيلعب بيهم الريح ... تحل لباب و هي دخل نوال هازة بلاطو ...
حطاتو فوق الطبلة و مشات عندها ... شحال و هي كتعيط عليها عاد انتابهات ليها جولان ... ضارت عندها كتشوف فيها بملامح ممحية ...
نوال : مدموزيل راه طلعت ليك لغدا
جولان : شكرا
قالتها و رجعات كيف كانت ... نوال ماعرفات مادير غادرات و رجعات للكوزينة ... بعد حوالي ساعة و هو يصوني الفيكس ... مسحات يديها و هزاتو جاوبات ...
رئبال : تغدات ؟
نوال : راه طلعتو ليها موسيو رئبال
رئبال : عاودي طلعي شوفيها واش كلات
نوال : واخة موسيو
حطات نوال السماعة و طلعات لعندها ... حلات لباب دخلات و هي تلقى البلاطو باقي فين حطاتو و مامقيوسش ... رجعات هبطات كتفكر شنو دير واش تقولها ليه و لا لا ... قفزات فاش سمعات الفيكس كيصوني ... جاوبات ...
رئبال : طليتي عليها ؟
نوال : آه ... م ماقاستوش
رئبال قطع و لاح الفون فوق البيرو ... دوز يدو على شعرو و تكا على الكرسي ... كان باقي تابعو شحال من حاجة فالشركة ... لأن مؤخراً قليل فاش كيجي ليها ... عيط على بهاء علمو يلغي باقي المواعيد و ناض خرج ...
هبط ركب فسيارتو و رجع لڤيلا ... كيف هبط من السيارة هز راسو للبالكون و هي تبان ليه ... تنهد و طلع داز مباشرة لغرفتها ...
دخل و مشى للبالكون ... بقا واقف كيشوف فيها شحال عاد قرب ... چلس القرفصاء قدامها مقابل مع وجها ...
رئبال : علاش كديري فراسك هاكة ؟
جولان : " الصمت "
رئبال : " كيشوف فوجها الي ذابل " هضرت معاااك ... علاش دايرة فراسك هاد الحالة ... البكا بالليل و بالنهار ... الماكلة مكدوزيش من جهتها ... و حابسة راسك هنااا ... هاكة كضريني أنا قبل ماضري راسك
جولان : " هزات فيه عنيها المدمعين و تلاحت عليه عنقاتو " كلشي كيمشي و يخليني ... گاع الي كنبغيهم مشاااو ... مابقى ليا حتى واحد من غيرك
✨ يتبع ✨
أنت تقرأ
السفاح العاشق 2
Misteri / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
