💎 السفاح العاشق 💎
🎭 الفصل الثالث : بارت 252 🎭
شاف فيها بملامح خالية من أي مشاعر ... من ديما كتحس أنها ماشي شخص محبب ليه ... و هادشي زاد بينو ليها من تصرفاتو القاسية معها ... مد بهاء يدو الي هازة فيها ظرف كبير ... هبطات عنيها كتشوف فداكشي الي هاز ... و منين ترددات تاخدو من عندو نطق ...
بهاء : خلاه ليك ميستر رئبال
جولان : " هزات عنيها فيه " ش شنو فيه ؟!!
بهاء : معارفش ... أكد عليا نوصلو ليك ... و مايمكنش نقلبو حتى لو بغيت ... خوديه
جولان : " بتردد مدات يدها شداتو من عندو "
بهاء : كنظن هذا آخر لقاء يجمعنا ... " شاف فدارهم " فالأخير رجعتي للمكان الي كتنتامي ليه
جولان : " قوسات حجبانها " و فخورة منين جيت و فين نشأت
بهاء : مزيان " ضار غادي و هو يوقفو صوتها "
جولان : ف فين كاين هو " شافتو ضار كيشوف فيها و هاز حاجبو " بغيت نقول ... و واش
بهاء : ميستر رئبال مسافر " سكت شوية و كمل " و محال يرجع
جولان : " حسات بقلبها تعصر و تأوهات فصمت " س سافر ... !
بهاء : اممم سافر ... بعدما فضا كل علاقاتو ... و من الواضح انه مكيفكرش يرجع
جولان : " نطقات بصعوبة مانعة الدمعة الي تحجرات فعنيها تهبط " بوحدو ؟
بهاء : " ابتاسم بجنب شفايفو " شكون عرف ... ماكنتش معاه فاش مشى
خلاها كتستوعب شنو قال و ضار غادي فاتجاه سيارتو ... طلع و زاد مكسيري ... بقات كتشوف فالفراغ و طبقة الدموع ضببات الرؤية فعنيها ... يديها مزيرة على الظرف حتى بياضو صباعها ... سدات عنيها و هما يديرو الدموع طريق على خدودها ... و فجأة تحركات و توجهات للدار ...
حلات لباب وطلعات كتجري لبيتها ... دخلات و بدون ماتسد لباب حلات الظرف بعشوائية ... جبدات منو شي وراق ... حلاتهم كتقرا فيهم وحدة وحدة ... عنيها توسعو أكثر و أكثر ... كتقرا الوثائق و تعاود ... حاط مبلغ كبير فحسابها البنكي و كاتب الڤيلا بإسمها و جزء من أسهم الشركة تحت إسمها ...
شفتها لتحتانية الي كانت كترجف توقفات ... و تحولات نضرة الحزن و الإنكسار لغضب عارم ... زيرات بيديها بجوج الي شادين أطراف الورق و حركاتهم معاكسين حتى تمزقو على جوج ... رجعات جمعاتهم و بدات كتمزق فيهم حتى رجعو أطراف صغيرة متناثرة فالأرض ... نطقات بصوت خافت لكن فيه نبرة قاسية ... قساوة الي مرات بيه ...
جولان : فلوسك مامحتاجاش ليييهم ... فلوسك مغاديش يشفعو ليك أنك تخليتي عليا بهاد السهووولة ... و كيف انساحبتي ... حتى أنا غنساحب من هاد الحب البائس ... و العلاقة الي كانت من بدايتها غلط
🍁 فاليوم الموالي ... هبطات جولان لتحت باش تحضر لفطور ... كان وجها شاحب و عنيها منفوخين ... و هي واقفة فالكوزينة سمعات نحنحة باها ... ضارت عندو و هو يدخل فصلب الموضوع بدون مقدمات ...
إبراهيم : قالت ليا خديجة جبدات معاك الموضوع
جولان : آه
إبراهيم : و شنو رأيك
جولان : " ضحكات فنفسها كأنه غيعطي اعتبار لرأيها " لا رفضت ... شنو العواقب !
إبراهيم : " عقد حواجبو و قال بنبرة حادة " علاش غترفضي ... باغة تزيدي الشوهة كثر من هادي الي حنا فيها ... من نهار رجعتي و كلشي كيهضر ... و منين تردي الناس ... غيزيدو يحلو علينا فمهم ... هادشي الي باغة
جولان : " كتكلم بحرقة " مكتهمنيش هضرة الناس ... الي كيهمني هو هضرتك و رأيك
إبراهيم : لا كيهمك رأيي وافقي ... مغاذيش تلقاي حسن منو
جولان : واخة مكنبغيهش !
قرب عندها إبراهيم و شدها من دراعها مزير ... قال مابين سنانو ...
إبراهيم : و داك الي كتبغي شنو دار ... ماشي خلاك منين قالها ليه راسو ... و حينت عندو لفلوس مكاينش الي يقول ليه شي حاجة ... هو تضرر ... و صلاتو شي حاجة ... ! لاااا ... نتي الي تشوهات سمعتك و نزلتي بقيمتي لرض
جولان : مايمكنش نتزوج واحد مكنبغيهش
إبراهيم : " شدها بقوة من كتافها كينخض فيها " بااااغة داك الي لااااحك و غتخلي دااااك الي باغييييك ... " عنيه رجعو حمرين " تاااابعين غير ولاد لحراااام و مكتشفووووش الي باغييييكم ... بحاااالك بحاااالهاااا
جولان : " كترجف من منظر باها " كتقصد ر رباب
إبراهيم : " طلق من كتافها و نزل عليها بطرشة بظهر يدو " ماتنطقيييش سميتهااا ... و مغااااديش نخلييييك تمرمدي وجهي فالتراااب ... كيف دارت بوالديهاااا ... غتزوجي بهذا و ساليناااا
خرج من الكوزينة كيسب و يلعن ... لقا خديجة واقفة عند الدروج كتسنط عليهم ... شاف فيها و تم خارج ... خبط لباب بالجهد حتى قفزات ... قربات حتى وقفات عند باب لكوزينة ... بقات كتشوف فجولان الي حاطة يدها على خدها و مرفوعة ...
خديجة : مابقات حشمة ... باركة على باك مكنبغيهش مكنبغيهش ... و داك الي باغية راه سمح فيك ... ياكما ناوية تلصقيه بزز ... " صغرات عنيها " و لا تكوني درتي شي مصيبة و خايفة من لفضيحة ... لا كان هادشي الي فبالي صحيح ... إما يقتلك باك و لا يقتلك ولد فوزية
✨ يتبع ✨
أنت تقرأ
السفاح العاشق 2
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
