💎 السفاح العاشق 💎
🎭 الفصل الثالث : بارت 236 🎭
زينب : سمعتي سمية شنو قالت ... ولات فان ديالك الالة
جولان : " بابتسامة باهتة " قالتها ليا
زينب : " كتشوف فجولان بحسرة " بما أن اليوم خويتي بينا و خرجتي ... غدا نخرجو نتساراو و نحيحو
سمية : " وقفات " نمشي نجيب صاكي ... ماعرفت فين حطاتو نوال
زينب : شوفي ياكما حطاتو ليك فشي غرفة من ديال الضياف
خرجات سمية و تمات غادة فالكولوار ... وصلات لإحدى الغرف حلات لباب و دخلات ... بدات كتقلب بعنيها لا يكون صاكها فالغرفة ... شوية سمعات شي باب تسد ضارت ... و هو يبان ليها كيسد زاجة البالكون عاطيها بظهرو ...
غير ضار و هي تبلق عنيها فيه ... كان لابس غير سروال سورڤيت بيج و صدرو عاري ... مدة و هي كتشوف فيه ... عاقت براسها و هي تطلع معها السخونية لخدودها حتى تزنگو ... سنمار شافها حمارت و هو يبتاسم بجنب ... يالاه بغا ينطق و هي تبان ليه غادة كتجري لجهة لباب ...
كيف جراتو بغات تحلو ... مشا بسرعة فاتجاهها و رجع سدو بيدو ... كان واقف جنبها هزات راسها شافت فيه و فكها لتحتاني كيرجف ...
سمية : ص ص صاكي ... م م مكاينش ه هنا
سنمار : " كيتأمل وجها " شنو قلتي ؟
سمية : ج جيت كنقلب على صاكي ... م ماعرفتش واش كاين هنا ... س سمح ليا
سنمار : " بابتسامة " و علاش خايفة
سمية : " حركات راسها بلا "
سنمار : " نعت ليها بصبعو لشفايفها الي كيرجفو " واش وجهي كيخلع
سمية : " حركات راسها بلا "
سنمار : آه يسحابلي خلعتك ... داكشي علاش هربتي ههه ... لقيتي الصاك ؟
سمية : ل لا
سنمار : غيكون فالبيت الي مقابل مع هذا
سمية : ش شكراا
بغات تحل لباب و لقاتو باقي حاط يدو عليه ... حيدها و هي طير من حداه ... سد سنمار لباب و مشا للدريسينغ كيضحك ... سمية دخلات لبيت لاخر و حطات يدها على صدرها و طلعات النفس الي كانت حابسة ... حسات بدقات قلبها كيجيريو بسرعة ... بقات واقفة حتى رجعات فيها النفس ...
بان ليها الصاك فوق السرير ... هزاتو و رجعات لعند لبنات ... بدلات حوايجها لبسات بيجامة و چلسات معاهم ... بقاو سهرانين لآش من وقيتة عاد نعسو ... سنمار دوش و لبس من الحوايج الي مخلي فبيتو ... هبط و تلاقى برئبال داخل ...
سنمار : وليتي كتعطل هاد الأيام ... ياكما مزيرة الخدمة
رئبال : بحال هكاك
سنمار : رخف على راسك شوية ... و متركزش على الخدمة و تهمل حوايج أخرى ... أهم منها بكثير
رئبال : " فهمو شنو قصد " غنطلع نرتاح
طلع رئبال مع الدرج و سنمار غادر ... حل باب غرفو و دخل ... بغا يسد لباب و هو يسمع صوت ضحك لبنات الي جاي من غرفتها ... تنهد و سدو ... حيد لڤيست لاحها فوق الفوطوي ... دوز يدو على شعرو و توجه للحمام ...
🍃🍃 يوم جديد ...
دوزو لبنات نصف النهار فالدار ... بعدما تغداو ناضو يجهزو ريوسهم باش يخرجو ... لبسو و قادو الحالة تحت نگير زينب الي كانت مصرة أنهم يتقادو و يضورو بالحالة ... بعدما كملو خرجو من لڤيلا ...
جا عندهم السائق كأنه كان كيتسناهم و طلب هو الي وصلهم ... زينب سبقات ركبات لقدام و سمية و جولان طلعو اللور ... قالت ليه زينب على وجهتهم الأولى و الي هي مركز التسوق ... وصلو و هما يهبطو ... جولان حتى كانت غادية و رجعات دارت لعندو و قالت ليه بلما يتسناهم ...
دخلو و تساراو فالمتاجر ... ضارو حتى ضروهم رجليهم ... من بعد دازو جلسو فكافي تماك ... سمية كانت فرحانة و عاجبها الحال ... و زينب حتى هي منشطة ليهم الجو ... جولان رغم ابتسامتها الي كتبان مرة مرة ... إلا أن داخلها ماعالم بيه غير الله ... و معظم الوقت ساهية ...
فلحظة منين شافت زينب اتاصل بيها إلياس كيطمأن عليها ... و بعدها بوقت قصير سمية اتاصل بيها جدها سول فيها ... تقجات و ناضت مشات للطواليت ... دخلات چلسات فوق لاشاص حاطة يدها على فمها و كتبكي بحرقة ... بكات حتى بردات و خرجات طرفات عنيها و رجعات لعندهم ...
طلبات منهم يخرجو يتمشاو فالخارج ... داكشي الي دارو ... خرجو من المول و تمشاو حتى وصلو لپلاية جنب لبحر ... حسو بالعياء و قررو يرجعو للدار ... خاصة سمية غترجع الغد ليه فالصباح ... شيرات زينب لطاكسي وقف ليهم و طلعو ... جولان يالاه غتركب و هي تشوف شي حاجة ...
جولان : " تحدرات شافت فيهم " غير سبقو للدار ... غنرجع للمول ناخد شي حاجة نسيتها و نجي
سدات لباب و تمشات مبعدة عليهم ... زينب عيطات حتى عيات و استسلمات ... قالت لمول الطاكسي يتحرك و بقات مراقبة جولان و هي غادة فالجهة المعاكسة ... جولان تلفتات بانو ليها بعدو و هي تقطع الشانطي ... وقفات كتشوف فباب الكلوب شحال و هي دخل ...
غادة فالكولوار كتسمع الموسيقى عالية و الضواو جاينين من الداخل ... البنات شبه عراة و الرجال كيترنحو من السكر ... جاها راسها كأنها فعالم آخر ... حاسة بالخوف لكن أصرات تأكد من الي شافتو عنيها ... دخلات و هي تبان ليها الدنيا عامرة ... لي كوپل كيرقصو أو كيديرو ماتعدى الرقص ...
بعدات نظرها علي شي مناظر مشمئزة منهم ... تقدمات كتقلب بعنيها حتى بان ليها من بعيد ... چالس فأحد الطبالي من الواضج مخصصة للشخصيات المهمة ... و جالسة جنبو وحدة الي بالطبع نفسها البنت الي شافت معاه من قبل ...
✨ توقعاتكم ✨
أنت تقرأ
السفاح العاشق 2
Mystery / Thrillerرواية •• السفّاح العاشق •• 🌸 تأليف : موري 💄👑 " بغض النظر عن السبب ، الانتقام يؤدي إلى دورة مستمرة لا تنتهي أبدًا.. يسمم حياة كل من حولك ، و بالقرب منك.. السعي إلى الانتقام يصبح كل ما تريده، ولكن يأتي بثمن باهظ جداً.. " الرواية...
