اضطراب -قيد الكتابة-

غدًا عرَفة.❤

نعمل إيه يوم عرَفة؟

عن عبد الله بن عمرو بن العاص رضي الله عنهما أن النبي صلى الله عليه وسلم قال: (خير الدعاء دعاء يوم عرفة، وخير ما قلت أنا والنبيّون من قبلي: لا إله إلا الله وحده لا شريك له، له الملك، وله الحمد، وهو على كل شيء قدير) رواه الترمذي، وحسَّنه الألباني في "صحيح الترغيب".
صلّي المغرب النهاردة، وهات ورَقة وقلم وابدأ اكتب كل الدعوات اللي نِفسك فيها، دعواتَك لنفسك، دعواتَك لأهلك، لأصحابك، لمعارفك، ولأي حد حابب تدعيلُه، اكتب كل شيء نِفسك فيه ورتّب دعواتك عشان متنساش حاجة بكرة، وبالليل انوي الصيام، واقفل تليفونَك عشان متفتحهوش غير يوم العيد بإذن الله، وادخل نام بدري.

ابدأ يومَك بكرة من قبل الفجر بكام ساعة، صلّي لله لحد ما الفجر يأذن، وبعد ما تصلّي الفجر متجريش تنام، لا اقعد اذكر ربنا لحد الشروق وبعدين صلّي ركعتين لله.
روى الترمذي وقال: (حسنٌ غريبٌ، عن أنس بن مالك قال: قال رسول الله صلى الله عليه وسلم: من صلى الغداة في جماعة ثم قعد يذكُر الله حتى تطلع الشمس ثم صلى ركعتين كانت له كأجر حجة وعُمرة، قال رسول الله صلى الله عليه وسلم: تامة، تامة، تامة.) يبقى ليه نضيع الثواب دا؟

صلّينا وخلّصنا؟ نقوم ننام شوية لو عايزين عشان منفضلش مصدّعين طول اليوم، هنصحى على الضهر مثلًا ومن هنا هنبدأ نشغل تكبيرات الحج على التليفزيون ونعمل اللي ورانا من شغل البيت أو غيره.
واحرص على إنك تنوي قبل ما تعمل أي حاجة حتى لو كانت مذاكرة إن العمل دا لله عشان تاخد ثواب إنك بتتعب فيه.

العصر أذن وصلّينا! هنقعد ونجيب ورقتنا اللي كنا كتبنا فيها كل أدعيتنا ونقعد ندعي بكل اللي عايزينه لحد المغرب.
عن طلحة بن عبيد بن كريز مرسلا: (أفضل الدعاء دعاء يوم عرفة) رواه مالك في "الموطأ"، وحسَّنه الألباني في" صحيح الجامع". ادعي بكل شيء وأي شيء يخطر على بالَك، ادعي بالجنة، وادعي بإن ربنا ينجيك من الفتن، ادعيه يغفرلك ذنوبك، وادعيه يرزقك برزق ومكسب حلال، ادعيه بأمانيك كلها، وتوب توبة نصوحة من أي ذنب انت بتعمله وانوي إنك تبطّله، وسيب أمرك لله.

عن عائشة رضي الله عنها قالت: إن رسول الله صلى الله عليه وسلم قال: (ما مِن يوم أكثر من أن يعتق الله فيه عبداً من النار من يوم عرفة وإنه ليدنو ثم يباهي بهم الملائكة فيقول: ما أراد هؤلاء) رواه مسلم.
استحضِر في ذهنك عظَمة اليوم من تاني، وادعي بضمير إننا نكون من العتقاء من النار، وبإذن الله تكون مُستجابة.

من بعد المغرب متضيعش اليوم بفِعل أحمق بقى، لا خليك قافل التليفون وافضل مع المصحف لحد العِشاء ولو هتقدر تقيم الليل ولو بركعتين متترددش، وبعد الصلاة ابدأ اجهز للعيد وادخل نام بدري بقى.

بُكرة يوم مُميز، يوم اتقال في حقه كتير، وأكيد من الأَولى إننا منضيعش يوم في العظَمة دي على الفاضي بدون ما نستغل كل دقيقة فيه وندعي فيها بكل ما نتمناه، عسى دعواتنا تُستجاب، وعسانا نُسقى من فيض أمانينا حتى نرتوي.❤

-إيمان محمود الطويل.