لجل عين اهد ديار

20

<< بيت ابو متعب >>
كانت ام متعب جالسة فالصالة منهارة ولاهي قادرة تتحمل الخبر و البنات حوالينها يحاولون يهدونها و هم بعد يبغون حد يهديهم
سمعو حد يطق الباب قامت غلا لبست جلالها وراحت للباب
غلا من ورا الباب : مين ؟؟
ابو هذال : انا يا بنتي افتحي الباب
تأففت غلا من سمعت صوت عمها بكره و فتحت الباب : خير يعم ؟؟
دخل ابو هذال : وينها امتس و اختس ؟؟
غلا : داخل ليه ؟؟
ابو هذال : شوفي يبنتي ابوتس تعبان فالمستشفى قالو بينومونه واخوتس عنده اذا احتجتوا شي لا يردكم الا لسانكم
جت ام متعب وهي كانت تسمع كل شي : اقول رح رح ما نبغا منك حاجة مو ناقصين تشمت ولا تسوي الوفي لو انك بتسوي خير تكلم ولدك الي له منصب فالعسكرية يخرج ولدي كفاية انه هو الي ماسكه و مورطه بذا كله جعل الله ياخذه باسرع وقت
رفع ابو هذال حاجبه بعصبية و صدمة من كلام ام متعب : خير ان شاء الله تدعين على ولدي و قدامي والله لو انتس ماكنتي مرة اني لا دفنتس هنا و ثاني حاجة اذا ولدتس هذي فعايله وش تبين نسوي نصفقله ولا نستره عشان يجيبلنا العار اكثر
جت الجوهرة من ورا امها توقف قدام عمها : لا والله ما نبغا منكم حاجة نحنا ما نبغى الا فرقاكم ولا نشوفكم مرة ثانية اصلا لو انتوا اهل كان وقفتوا و ساعدتوا ولد اخوكم ما وديتوه للموت بيديكم وخاصة ولدك الي....
ابو هذال ما تحمل الصراخ و قلة الادب الي قاعدة تطلع منهم صفق الجوهرة كف على وجها خلاها تسكت و تنسى اصلا وش كانت بتقول
ابو هذال بعصبية الارض و بصوت حاد سكتهم كلهم : اقطعي و اخسي مو ناقص بعد الا انتي يالبزر يطلعلك لسان امتس و سكتنالها احترام لاخوي ولا انتي اقص لسانتس و اربيتس فاهمة و الي ودها هالعصا تغني على ظهرها تنطق بحرف زيادة
كانو كلهم خايفات من عصبية ابو هذال الي تخوف الي ما يخاف
ضرب ابو هذال العصا على الباب و طلع و هو كره الساعة الي قرر يجي فيها
رجعو كلهم الصالة بخوف لكن ام متعب جلست تزن براس بناتها انهم يقلون ادبهم على عمانهم و اهلهم و كيف انهم ما يبون الخير و هم سبب اعدام كاسر وفعلا البنات اقتنعو بذا الكلام و تغيرت الجوهرة من محبتها لاهل الديرة و عمانها صارت نسخت امها

<< قدام بيت ابو هذال >>
كانو العيال واقفين مع عيال الجيران يسولفون و يتنقلون علوم بعض لف عبدالرحمن على ابوه الي جاي معصب راحو الرجال و توجهو العيال لابوهم الي دخل المقلط و هو يستغفر و يتوب و يتعوذ من بليس
عبدالرحمن: يبه وشفيك ؟؟
تنهد ابو هذال : جيبولي مويا
راح هذال و جاب قارورة مويا و فتحها لابوه و مدها له اخذها ابو هذال و شرب منها و تنهد
ذياب : يبه و شفيك ؟؟؟
ابو هذال : والله مدري شسوي مع اهل عمكم ماجد
عبدالرحمن عقد حاجبينه : ليه يبه ؟؟ وش صاير ؟؟
ابو هذال تنهد و قال لهم الي صار كله و وش قالو كلهن
تنهد ناصر و جلس و رجع ظهره لوراه ، ناظره ابو هذال : انت وش صار عليك و على الجوهرة ؟؟
ناصر ناظره وابعد نظره للفراغ فالجهة الثانية : بطلق الجوهرة
عقد حواجبه ابو هذال بصدمة و عصبية : وليه ان شاء الله بدل ما تحتوي بنت عمك بهالوقت
نزل ناصر نظره لكف يده و اخذ نفس بتعب و هو ما صدق شوي يخف عليه حمل هذا الموضوع
لف ابو هذال على هذال : خير ؟؟ صاير شي ؟؟
اخذ نفس هذال و قال لابوه الي قاله ناصر ، رفع ابو هذال حواجبه باستغراب و لف يناظر الكسرة بعيون ولده و هو ما صدق يتخطون كسرة هذال جت الان كسرة ناصر و هو ما يتحمل يشوف احد من عياله كذا وخاطره مكسور رغم ان يدري ان هذال للان السالفة بخاطره لكنه يكابر قد ما يقدر و هذي الصفة من شخصيته الي تعرف عليه بعد المهمة الي راحلها نزل نظره لدقايق و رجع يرفعها لناصر : سو الي تشوفه يا ولدي ماراح اجبرك ولا رح اقولك تبقيها على ذمتك بعد الي سمعته لكن لا تضيق بعمرك و ان شاء الله بنزوجك الي احسن منها وانا ابوك قم يلا و انتو بعد قومو للنوم كله خير يلا يلا
وقام ابو هذال و هو ماهو عارف يتصرف مع كل ذا الامور
تقدمو العيال له و باسو راسه و طلع لغرفته يحاول ينام لكن هو وين و النوم وين