لجل عين اهد ديار

26

ومر الوقت للمغرب من سوالف وضحك طلعت وهج وهي لابسة عبايتها مع مهرة الي تتحرطم عليها تنام عندهم اليوم
دخلو بيت الشعر و كان الكل جالس
وهج بابتسامة : يلا ياعمي استأذن
بو هذال عقد حاجبينه : وين يبنتي تعشي معنا
قبل لا تتكلم وهج نطت مهرة وهي تمسك ايدها : اي اي لازم تتعشين وبعدين نعطيتس بجامة تنامين عندنا صح صح يبه قوليلها تكفى
ضحك بو هذال و وهج
وهج : لا والله لا تقول شي يعمي و بعدين امي بريحاتها فالبيت ولا اقدر اقعد الليلة برا خاصة اليوم اكثر مرة تعبو بالشغل فالحق على امي اذا ما سوت العشاء اسويه انا ولا قعدتكم ما تنمل والله
بو هذال ببتسامة : دام كذا يبنتي الله يستر عليتس روحي مانقدر نقول شي
كشرو ميرة و مهرة و هم يناظرونها بطرف عين و وهج تضحك جت بتلف جات ريوف الي ابتسمت بتعب : بتروحين ؟؟؟
وهج ابتسمت بحنية و هي تمسح على بطنها بشويش : تعبانة مرة ؟؟
ريوف : تكفين ما صدقت شوي اقدر اطلع و اشوفتس من علمني عبدالرحمن لكن ماقدرت اقوم من السرير ابد الا الحين
وهج بنظرات فيها حنية تقدمت تحضن اختها لكن بشويش لجل ما تعورها : اشتقت لتس والله مستفردين فيني الطبج اخوانتس
ضحكت ريوف من قلبها و هي تشوفها تتحرطم و تقول وش يسوون فيها و وهج الي نست انها المفروض ترجع البيت سحبت ريوف و جلسو و هي تفضفض لها عن المعاناة الي تعيشها معهم و الكل كان مستمع ويضحك مع ريوف و ماكانو منتبهين للاذون الي تسمع بشغف بشوق بحب وبعد مرور ساعة من التحرطم قامت وهج للمرة المليون بتطلع
وهج : يلا ياعم خلاص احس مصختها و انا كل شوي اقوم و اتذكر سالفة و ارجع اقعد
ضحكو كلهم
بو هذال يضحك من قلبه : اجلسي اجلسي اكيد في سالفة ماقلتيها مني مناك
ضحكت وهج : لا ياعم خلاص افتقرت سوالف نشوفك الجلسة الجاية اجمعلك سوالف بس خلك جاهز المهم حي الله من زار و خفف و لا بثقل عليكم مع السلامة
مهرة و هي تتخصر لها : اي حي الله من زار وخفف انتي جالسة على كبودنا من الصباح
ميرة من وراها : اي والله خلصتي ماجلت بيتنا كلها و تقرقر فوق روسنا و اخر شي حي الله من زار و خفف حبيبتي مغلطة ترا فالامثلة
مهرة : و بعدين ترا ماخذه من الحلا حق ابوي و ترا بيهاوشتس
ميرة : اي اي يبه تراها ماخذة من الحلا حقك معها هاوشها
وهج و هي ترفع حواجبها : يحقلي و لا يحق لغيري ولا يعم
بو هذال بضحكة : انشهد يحقلتس و لا يحق لغيرتس
لفت وهج لميرة و مهرة تحرهم و هم يكفخون فيها
بو هذال : يا هذال
هذال لف له : سم يبه
بو هذال : رح وصل بنت عمك للبيت ما تروح لحالها بهالليل
هذال و هو يقوم : ابشر
مشى للباب و مشت وهج وراه بعد ما اخذت الحلا غصب عن مهرة و ميرة وهي تضحك
مشت وراه و هي تناظر خطواته قدامها و تبتسم تتسال عن سبب الفرحة الي فيها لمًا تشوفه الطمأنينة الي تنتابها معاه وش الي تغير الان وهي السنين الي راحت ما فكرت فيه ولا التفتتله رغم المواقف الي تجمعهم لكنها ماكانت تفكر فيها
هذال و هو يحس بخطواتها خلفه و هو الي كان يتمنى تكون جنبه بالحلال يضحك و يسولف معها باريحيه رغم الشعور الي يحس فيه لكنه يحاول يتجاهل
هذال : بسالتس سال عادي ؟؟
وهج استغربت لانه بطئ خطواته دليل انه يبيها تمشي شوي شوي : عادي امري ؟!
هذال بابتسامة خفيفة : ما يامر عليتس ظالم بس ابغاء اسألتس عن شغلة بس ما ابغاء تتضايقين اتفقنا ؟
وهج ما تدري ليه ابتسمت : اتفقنا
هذال : ابغاء اعرف بس قد فتحتي جوال كاسر ؟؟
وهج عقد حواجبها باستغراب : لا
هذال : طيب
ولف عليها بابتسامة: انا اسف اذا ضايقتس بسيرة ذي
وهج بخجل من نظراته و نزلت راسها : لا عادي شدعوه
مشو و وصلو لباب البيت ودق الباب وقفت معه لان الباب مقفول وكانت الساعة تسع الليل
ثواني و فتح نايف الباب وشاف وهج لكن ما انتبه لهذال الي كان شوي بعيد عن الباب : هلا هلا ما بغيتي تجين يلي ما تستحين
شهقت وهج وهي تتخصرله : انا الي ما استحي و بعدين ورا مقفلين الباب ؟! طردة طردة عيني عينك ترا برجع بيت عمي ما يقصر جعلني فداه
نايف : اي اي طردة لانتس منتي بنتنا لاقينتس عند المسجد اذا ما تدرين يلا برع
و جا بيسكر الباب الا ان وهج تقدمت له و هي تكفخ فيه بشنتطها و تشتمه و تسحب شعره بعدها ركضت لابوها : يبه يبه شف الحمار وش يقول عني قليل الحياء
كان نايف ميت ضحك عليها و جاء بيسكر الباب الا انه انتبه لهذال الي واقف و مبتسم : حي الله ولد العم السموحة والله ما شفتك عاد اسمحلنا شفت المسرحية الي صارت و تقدم يكمل بهمس : انا اتعرض لعنف اسري يا ضابط ابغى اقدم شكوى عليها اذا سمحت و تقدم يسلم عليه
هذال بابتسامة وعبط : مسموح مسموح والله لكن زين كفختك بدالي اجل لاقينها عند المسجد و مسكه من اذنه بمزح : ترا انا الي بتلك من اذنك لا تنسى الضابط شاهد على الاساءة الي سويتها بحقها وش بيفكك مني !!
نايف بعبط و استهبال مثل الخوف ولف بيشرد : ما اتفقنا على كذا يولد العم و دخل يركض
ضحك هذال من قلبه وجاء بيمشي لكنه لف على ضاري الي ناداه وشافه كيف الضيق باين على وجهه تقدم يسلم عليه و بعد السؤال عن الحال
ضاري : طمني على جميلة تكفى ؟؟
هذال : حمدالله بخير شوي احسن لكن للان ما علمناها عن وفاة الطفل عشان نفسيتها مدمرة كانت
ضاري يتردد : طيب . . اقدر اجي و اشوفها ؟؟
هذال : البيت بيتك يولد العم تعال فاي وقت
ضاري استبشر و استهل وجهه : اجل ان شاء الله بكرة العصر انا عندكم . . اقلط اشرب فنجان قهوة
هذال : لا والله خلها مرة الجاية تاخر الوقت
ضاري : يا رجال تعال بس
قبل لا هذال يرفض سحبه ضاري و دخل معه المقلط و شويات و جاء بو ضاري و فز له هذال يسلم عليه و جلس يسولف دقايق مع عمه شرب الفنجان و استأذن بسبب تاخر الوقت وراح