لجل عين اهد ديار

42

فيهم كثيرة من التخطيط و تدبير و جمع المعلومات لخطط القتل الي كان ينفذها غانم و أشياء كثيرة توديهم ورا الشمس
إنهاء القاضي الجلسة و سحبوهم العساكر و كان موعد القصاص بعد ثلاث ايام وطلع هذال و هو مبتسم يحس انه قدر ياخذ حقها ولو بالقليل الي يحس انه مو كافي لكن ما بيده شي ركب السيارة و حرك بسرعة راجع للديرة
شافه سعود و ابتسم من ابتسامة هذال و سعادته ركب السيارة و هو ما يدري ليه طرت على باله من قبل يومين يمر طيفها كل حين و حين يذكر عيونها بشرتها شعرها مستحيل ينسى وحدة بجمالها تنهد و ما حس على نفسه إلا هو قدام بيته سكر السيارة و دخل يبدل ملابسه و ينسدح بتعب يغمض عيونه يستسلم للنوم
وبعد ساعة وصل هذال للديرة و وقف قدام بيتهم سمع اذان الظهر تنهد براحة انه قدر يلحق الصلاة و نزل مسرعة من السيارة و دخل البيت شاف ابوه ينادي اخوانه و امه جالسة مع جميلة و مهرة فالصالة : السلام عليكم
لفو عليه : و عليكم السلام
بو هذال : زين جيت بنروح بعد الصلاة نتغداء فبيت عمك
هذال : زين اجل بدخل اسبح على السريع و ألحقكم المسجد
بو هذال : اعجل يلا
هذال دخل و لكن رجع طلع : ذياب وينه ؟؟
جميلة : طلع يقول عنده شغل بيلحقنا بيت عمي
هذال هز راسه و دخل بسرعة يسبح ، طلع و دخل غرفته فتح دولابه و اخذ له ثوب حطه على السرير و بدأ ينشف جسمه وبعدها لبس ملابسه و ثوبه و اخذ شماغه و تعصب فيه و طلع مسرع نادته ام هذال : هذال
هذال لف لها : لبيه يمه
ام هذال : تعال يولدي أبخرك بسرعة لجل تلحق على الصلاة
هذال مشى لامه بسرعة و حب راسها و وقفت جميلة تسلم عليه : تراك واحشنا مالك داعي كذا تروح
ابتسم هذال : ما يوحشتس غالي والله ماله بيدي وش اسوي
جميلة بابتسامة : الله يعطيك العافية يا حبيبي انت ، يمه انا بروح اجهز دام قضينا من الشغل
ام هذال : طيب و شوفي خواتس خلصو من الاغراض ولا لا
جميلة وهي خارجه : ابشري
هذال ابتسم اول ما امه خلصت ونزل يبوس يدها : جعل هاليدين ما تمسها النار ، يلا يمه مع السلامة
ام هذال : في حفظ الرحمن
طلع هذال مستعجل وهو يسمع الإمام يخطب خطبة الجمعة وصل المسجد و كان مزدحم ماشاءالله و شاف ابوه و اخوانه و عمه وعيال عمه فالصف الثاني قدام و ما يقدر يتعدا الرجال فجلس مع الرجال فالصف الأخير و هو يسمع الخطبة الي بعد خمس دقايق انتهت و قفو الرجال من قال الإمام : استوا ... استوا .... اقيمو صفوفكم و سدو الخلل .... الله اكبر
وقفو الراجل جنب بعض و كبرو
سلم الإمام و مشو الرجال يطلعون، الي يعرف بعض يسلمون على بعض كان هذال واقف برًا من وقت بما انه فالصف الأخير ينتظر اهله رفع الجوال من جاله إشعار من الشغل ملف غير مستعجل ولكن لازم يشوفه قبل لا يرجع يداوم بكرة فاستغل الوقت انه يتصفحه لكن لف على الي حط يده على كتفه و ابتسم له و تقدم يحضنه : ارحب
ذياب بابتسامة و شوق كبير لاخوه : من يرحب يبقى وين الناس ؟؟!  
ابتعد هذال : وش اسوي ياخوك ماهو بيدي
ذياب : الأمور طيبة ماعليك
هذال وهو يشد على يده : بعد صلاة العصر لازم نهج
ذياب ضحك : نهج ليه ما نهج
ضحك هذال لكن لف على صوت عبدالرحمن : وشفيكم تضحكون ضحكونا معكم
ذياب : عبيد ما تحس انك شاغلنا من يومين وناشبلنا نشبه
عبدالرحمن توسعة عيونه : يلي ما تستحي اخوك الكبير احترمني
ضحك هذال و جاء ذياب بيرد لكن مسك يده من الصفقه الي جته من ناصر له و لعبدالرحمن : اسكتو تكفون تو مخلصين صلاتنا بتروح الحسنات
ضاري وهو مبتسم : قصدك راحت و خلصت
هذال لف لضاري وتقدم يسلم عليه بالخشم : ارحب يولد العم
ضاري : وينك غاطس
هذال حك حواجبه : الدوام و فعايله وش نسوي عاد
ضاري : تهون تهون ياخوك
هذال : اي والله اجل وين الباقي ؟؟
ضاري : كانو وراي يسلمون على بو وسيم عاد أنا شردت عنهم مالي خلقه ابد
ضحك هذال ولف على جيت الباقي و تقدم يسلم عليهم كلهم ولفو على بو ضاري : يلا تعالو الحين معنا و اثنين من العيال يروحون يجيبون الحريم من البيت و يجون وش رأيك ؟؟؟
بوهذال: ابد تم ، هذال ذياب روحو جيبو خواتكم و أمكم يلا و الحقونا بيت عمكم
هذال و ذياب : ابشر
وراحو يمشون الين ما وصلو لبيتهم دخلو و وقفو فالحوش ذياب : يلا يمه . . جميلة ، ميرة ، مهرة وينكم ما نبغى نتأخر ابوي و الباقي سبقونا
طلعت ام هذال و معها جميلة لابسين عباياتهم
جميلة : خلصنا خلاص
ميرة و هي ماسكة سلت الاغراض نزلتها بتعب : تكفون شيلوها عني من المطبخ لهنا احس نفسي انقطع فكوني منها
ضحك هذال الي تقدم يشيلها : يلا يلا امشو
وطلعو يمشون لبيت بو ضاري و ميرة و مهرة يسولفون لهذال و هو يسمع و يضحك و يشاركهم ذياب
وصلو و دخل هذال المطبخ بعد ما مهرة شافت له الطريق و نزل السلة على الطاولة و طلع راجع للمجلس
دخلت وهج مع الجوهرة : وش ذا ؟؟
مهرة : يعني خفايف سويناها للجمعة
وهج و هي تشوف الاغراض و هي موسعة عيونها : تكفين وش علاقة الخفايف فلي اشوفه انا الحين ؟؟؟ ماشاءالله ماخليتو شي ما جبتوه
مهرة :وي ما جبنا شي كم صحن حلو و بساكيت و مكسرات و دلة قهوة و شاهي و كرك بس ها ترا كرك جميلة ماهي ميرة
ضحكو كلهم وبدت الجوهرة و مهرة و ميرة يتساعدون و بعد ثواني انضمت لهم غلا و بعدها جميلة ماعدا ريوف الي كانت منسدحة فغرفتها بتعب
< غرفة ريوف >
كانت منسدحة صح انها تحس نفسها احسن بس بعد الي حصل الفجر ما تبغى ابد تجهد نفسها