لجل عين اهد ديار

22

دخلو الحريم و توجهو لام متعب
ام هذال : عظم الله اجركم
ام متعب يلي كلمها متعب ان تتجاهلهم وانهم خلاص بينقلون و مالهم شي هنا ، اتجاهلتهم و صدت
استغفروا و راحو يجلسون
و مرت ايام العزاء بتعب و حزن من الكل وكل ما كان يحتك في متعب و امه و خواته على الرغم من محاولاتهم لكن مافي فايدة فقرروا السكوت

~ بعد العزاء ~

<< بيت ابو هذال >>
كانو مجتمعين الكل ماعدا متعب و اهله
فالمقلط -
كانو الرجال جالسين يسولفون
لف ابو هذال على عبدالرحمن و نايف الي داخلين
ابو هذال : شفتوه ؟؟
عبدالرحمن بتنهيدة : اي يبه
ابو ضاري : طيب وش صار ؟؟؟
نايف بضيق : مافيه حاجة جديدة نفس كلامه وغلطه و دعاويه و هو مصمم انهم يهجرون المكان كله واوله نحنا
سكر ابو هذال عيونه بضيق وهو ما وده الي بقى من ريحة اخوه يروحون لكن وش بيده يسوي
ابو هذال : علمتوه انه بنشتري البيت ؟؟
عبدالرحمن: اي يبه و بعد شوي بيجي مع المحامي
هز ابو هذال راسه و سكت وهو ماهو عارف الحل معهم وش تعب و هو يحاول بالثلاث ايام الي راحو لكن ماش مامنهم فايدة

من دريشة المطبخ كانت تشوفه جالس يدخن و سارح كانت تتامله و راح تفكيرها بعييد لدقايق طويلة لكنها فزت وحست على نفسها لما رد على جواله الي يرن : طيب . . ان شاءالله . . ابشر بكرة وانا عندكم ان شاء الله . . مع السلامة
رجع جواله لجيبه و هو يولع سيجارة ثانية عن الي طفاها لما رد على الجوال انتابها الفضول و ودها تعرف مع من يتكلم و وش عنده بكرة لكنها ما عندها الجراءة انها تتقدم و تساله كان منظره يشلع القلب بنظرها ثوبه الاسود الي تعشقه عليه حاضن عضلاته الي رباهم طول الفترة الي راحت من تمرين و شماغه الي راميه على كتفه مع وسامت ملامحه الحادة ضاعت بتفاصيله لكنها فزت على صوت شي طاح و انكسر ركضت و دخلت غرفة البنات
لكن سرعان ما ارتخت اكتافها كانوا البنات يساعدون ميرة و مهرة بتنظيف غرفتهم و جابو العيد و طيحو الابجورة يلي بين سريرهم و هم فطسانين ضحك تنهدت و هي مالها خلق لشي تسحبت شوي شوي و راحت الحوش الخلفي كان في مثل الممر صغير اخر الحوش في كرسي جلست و هنا محد يقدر يشوفها تنهدت بضيق و هي كارهة حياتها بعد كل الي راح ولا هي عارفة وش تسوي حضنت رجولها و سند ظهرها على الكرسي و رفعت راسها و هي تتذكر كل الي صارلها و نزلت دموعها لا ارادي منها و من الضيق يلي تحس فيه

كان هذال يدخن عند المدخل
عبدالرحمن: هذال انت بخير ؟؟؟
لف عليه هذال وهو رافع حواجبه : وشفيك كل ما شفتني سالتني هالسؤال ؟؟ فيك شي ؟؟
عبدالرحمن حك راسه : لا ولا شي رح جب حطب من الحوش الخلفي ابوي يبغا نجلس فالجلسة يلي برع

هز هذال راسه وراح طلع من باب المطبخ و اتجه للحطب و اخذ كمية و وداها للحوش الامامي و رجع للكمية الثانية اخذها و جا بيلف لكن وقف من سمع شهقات خفيفة من الممر يلي بالحوش نزل الحطب و مشى شوي شوي لما وصل وطل براسه و شاف وهج للحظة قلبه عوره من منظرها و بكاها
هذال بهدوء : وهج
فزت وهج و رفعت راسها بسرعة وشافته واقف
هذال : بسم الله عليتس هذا انا هدي
زفت وهج بتوتر
هذال : وشفيتس تبكين ؟؟
وهج نزلت راسها : مافيني شي
هذال لف من ناداه ناصر : لحظة وبرجع تمام
وهج : مافي داعي انا بدخل الحين
ناظرها هذال بهدوء و راح اخذ الحطب و نزله قدام ناصر
اخذه ناصر و بدا يشب النار
هذال : لاحد يناديني
ناظره ناصر باستغراب ولف هذال ودخل الفلة و طلع من الباب الثاني لجل ما يشوفونه انه فالحوش الخلفي و كانت يدعي انها ما راحت طل بهدوء و شافها جالسة و هي توقعت انه ماراح يرجع بعد ردها لكنها لفت من حست بحركة و شافته يجلس جنبها ناظرها بهدوء
هذال : ليه تبكين ؟؟
ناظرته وماردت
تنهد هذال : تقدرين تقوليلي يلي فخاطرتس يمكن يخفف عنتس ! وش الي مزعلتس ؟؟
وهج تنهدت بتعب : يعني اذا تكلمت بتفهمني مثلا ؟؟ ولا انت جاي مو خايف جاي لان كسرت خاطرك وانا ابكي ؟؟
رفع هذال حواجبه بصدمة من كلامها : طبعا ما جيت لهالسبب انتي مثل اختي و مستحيل ارضى عليتس الزعل !! انتي بس اشري و راح اعدمه لتس فثانية
سكتت وهج من قال " مثل اختي " تنهدت و عدلت جلستها و ضلت ساكتة شافها هذال و سكت ماحب يضغط عليها
مرت دقايق طويلة وهنا وهج ما تحملت تكتم اكثر و هي مرتاحة لهذال و تدري لو تكلمت ماراح يقول لاحد، بدات دموعها تنهمر بحزن وجع
قالت ببكي : تعبت
هذال عقد حاجبينه : وش الي تعبتس ؟؟
وهج بانهيار : من الكل هذال انا ما اقدر اتحمل اكثر خلاص كرهت نفسي كرهت كل شي احس نفسي ولا شي صدقت كاسر الي حبه لي كله كذب و انا غبية صدقته و حبيته و وافقت عليه و هو صدق كسرني يا هذال فيني ضيقة فصدري ماهي طبيعية اهانته لي و كلامه البذيء و سيء لازال فاذني ما نسيته وجع ضرباته للان احس فيهم بكل مرة اتذكر الي كان يصير تعبت تعبت و انهد حيلي وانا كاتمة كل ذا ليت الزمن يرجع والله ما احبه والله
هذال قال و جلس قدامها وهو عاقد حاجبينه : وهج لا تقولين انتي ولا شي انتي غالية علينا كلنا كاسر راح خلاص ماراح يرجع هذا كله فالماضي امشي ابدي صفحة جديدة ادري انه يلي مريتي فيه ماهو هين لكن حمدالله افتكيتي منه
وهج ناظرته : انا افتكيت بس من كاسر و الباقي متى افتك منهم ؟؟؟
هذال بصدمة و استغراب : الباقي ؟؟ منهم ؟؟ وش صار ؟؟
وهج ببكاء و شهقات بدات تتكلم لكن هذال ما يفهم شي
هذال تجراء و مسك يدها لجل يهديها : هدي اول هدي وهج ماني فاهم شي اخذي نفس اخذي نفس
وقفت وهج كلام اخذت نفس شوي ترتاح
بعد ثواني شافها هذال هدت فيها : قوليلي وش صار
وهج بدات تقوله