لجل عين اهد ديار

33

~ صباح اليوم الثاني ~

< فجدة >
قام من النوم و هو يمسح وجهه و يذكر حلمه و يستوعبه وكان كاسر و ابوه و هو مات و هلك من ذا الاشتياق رجع انسدح و هو يتذكر الحلم و يحاول يستوعب
~
دخل متعب و هو ضايق : سلام عليكم
لف بو متعب و كان كاسر يقهويه : و عليكم السلام
جلس متعب و هو يتنهد وعقد حاجبه بو متعب : وشفيك و أنا بوك ؟؟ ليه ضايق ؟؟
متعب : متضايق من عماني و عيال عمي خلاص ماودي اروح لهم مرة ثانية
كاسر باستغراب : افا وش العلم ؟؟ ليه ؟؟ خابرك تحبهم وش الي تغير ؟؟
متعب وهو يناظر كاسر : مدري يعني احس انه ما يهتمون دوم يفرقون بينا و إذا انت يبه ماهوب موجود ما يلقوني بال أنا و الجدار واحد و أصلا امي ملاحظة هالشي و كلمتي عنه
بو متعب : لا يولدي لا ذولا عمانك و هذول عيال عمك مهما صار فالدنيا يا ولدي هم سندك ولا تسمع لسوالف أمك دخل من اذن و طلع من اذن سوالف حريم مالك فيها خلك مع عمانك و عيالهم ولا أوصيك يا ولدي لا تقطعهم روح لهم و اجلس و سولف عمانك بمقام ابوك إذا ما كنت فيه و عيالهم أخوانك إذا كاسر ماهوب فيه وانتو كبرتو و ربيتو مع بعض وطول عمرنا ما فرقنا بينكم كلكم واحد عندنا و غلاكم واحد ما بتغير ولا حد احسن عن احد طيب ؟؟
متعب و هو يبتسم : ان شاء الله يبه و السموحة
كاسر وهو يبتسم : اضحك اضحك و انسى يلا تقهوى تعال
متعب : لا أنا بروح انام شوي تعبان
كاسر : طيب نوم العوافي
~
استغفر ربه و قام لصلاة الفجر و لبس و طلع للمسجد و هو يصف مع الناس و كبر و هو مستحيل تمر صلاة ما يدعي من قلبه لابوه و اخوه سلم و طلع يتمشى
الساعة ٨:٠٠ الصباح جلس بأحد الكوفيات الموجودة و طلب له سبانش حار يدفئ فيه من برودة الجو جلس و هو يتنهد فتح لابتوبه و دخل موقع حجز تذاكر طيران دخل يشوف أوقات الحجز طيران للرياض و شاف في حجز العصر الساعة ٤:٠٠ العصر حس انه الوقت مناسب و جدا ضغط على الوقت و طلع بطاقة البنك يأكد الحجز ولف على الموظف الي نزل قهوته ابتسم له : مشكور يعطيك العافية
الموظف : العفو
وراح و لف يكمل شغله و اكد الحجز و خلص و هو يترشف من قهوته سكر اللاب و لف على الموظف ياشرله بالحساب و فعلا جاب له الحساب و دفع و خرج و هو يشرب القهوة فتح باب السيارة و ركب شغلها اخذ جواله و هو يضغط على رقم غلا و ورفع الجوال باذنه ينتظرهاترد لكن ما ردت ورجع يضغط على اسم الجوهرة ما ردت شبك جواله على المسجل و شغل اغنية و وصل لبارت ذكره بحلمه و شعوره و بدأ يغني مع الكلمات :
يا خفيف الدم و طينه
طيفك الي امس شحليله
زارني و الشوق في عينه
عقب ذا ما نمت لي ليله
شين حمس البعد يا شينه

< فالعزبة >
الكل مجتمع يفطرون و يضحكون و بين سوالف العيال مع الشياب و الذكريات الي يذكرونها بطفولتهم و يفطسون ضحك
بو ضاري لف لبوهذال : بغيت اقولك
بو هذال : قل
بو ضاري : ترا وهج بتسافر يوم الخميس لخوالها فالامارات
بو هذال : لحالها ؟؟؟
وهج سكتت و هي تناظر بعمها ولا ردت و تسمع رده
بو ضاري : اييي بتروح فترة هناك كم شهر تغير فيها جو و تجلس معهم
بو هذال : ليه كم شهر ؟؟ ليه يبنتي بتروحين عنا ؟
وهج و هي ماهي ناقصة احد يكلمها فهالموضوع : احسن لي يعمي اروح و ارتاح ومن تطيب النفس رجعت للديار ماني مطولة
سكت بوهذال الي كان بيرفض المدة الطويلة ذي لكن بعد ردها قرر يسكت لان ورا كلامها اكيد في خبايا كثير : الله يسرلتس يا بنتي و لا تنسينا و تقطعين طمنينا بين فترة و فترة
وهج : ابد ياعمي ناسكم موتكم ما نسيتكم و ان شاء الله كل كمن يوم بكلمكم و اطمن و أطمنكم
هز بو هذال راسه و هو ساكت لف يناظر ولده هذال الي جالس يطقطق بالجوال ولا همه و هو توقع ردة فعل حارة منه لكنه برد مكانه و هو يتأمله ماهو مهتم ولا يسمع حتى قام هذال : عن اذنكم
ورد على الجوال : هلا سعود
مهرة لفت و انشدت لصوت هذال و سمعت اسم سعود الي اول مرة يمر عليها ولفت لجميلة : أقولتس من سعود ذا ؟؟
جميلة : ذا خوي هذال تذكرين لما هذال مرة علمتوني خرج من البيت فليل متاخر و رجع مع خويه
مهرة : اي ؟؟
جميلة : اي هذا هو
مهرة هز راسه وماردت
جميلة : ليه تسألين ؟؟
مهرة : ولا شي بس اول مرة اسمع بذا الاسم
جميلة هز راسه بفهمت ولفت تكمل سوالف مع ريوف و مهرة كملت اكل مع ميرة من الحلا ولفو على صوت ناصر : بس انتي وهي كليتو من الحلا كثير
ميرة رفعت حواجبها : وانت و ش عليك ليكون معدتك فللت بدالنا ؟؟
ناصر : يام لسان مضر مضر سكريات
مهرة : شرايك تكرمنا بسكوتك ينويصر
ناصر باستهبال : بس من عيوني
قام و هو كان معه بسكوت يحبه و دوم يكون معه و خاصة فالكشتات يجيب كراتين منه ، و حطه قدامهم : ذا بسكوتي
وأخذ صينية الحلا منهم و رجع يجلس جنب عبدالرحمن الي رفع اكمام ثوبه : وذا لنا
الكل فطس يضحك اما ميرة و مهرة صرخو : يا حيوااااانننن ، جيبه يوجّه الفلس
لكن ناصر مطنش و مكمل اكل قامو بقهر : زقوم
هنا غص ناصر و الكل انهار يضحكون و هو ماهو عارف يضحك ولا يكح اللقمة الي علقت و من ضحك و سوالف بين الكل و ما يحلي القعدة إلا مناقرات ميرة و مهرة للكل