لجل عين اهد ديار

34

< في مكان بعيد و مظلم >

كانت الجدة جالسة و لفت لرن الجوال رفعته و شافت الاسم ابتسمت و ردت : يا هلا وغلا وشخبارتس ؟؟
المرة بعصبية : أبغاك تحرقينهم أبغاك تعذبينهم ابغى أشوفهم يتعذبون قدامي فاهمة ؟؟؟
ضحكت الجدة بخبث : من عيوني يختي أزيدها إذا تبغين
المرة : سوي الي بتسوينه بس ما ابغاهم يتهنون فاي ثانية
الجدة الي زادت ضحكاتها : تم والله انه تم
المرة : يلا بسكر
الجدة بابتسامة : زين
ورفعت راسها و هي جتلها فكرة جهنمية تأذي حد من العايلة قريب و جلست تقولب فيها و تخطط لها

< فمطار الرياض >

وصلو و هم لو ودهم يطيرون من الحماس الي فيهم مشو و متعب يضحك على الجوهرة المتخبلة تبغى توصل باي طريقة الان : يا حلوة نسيتي انه يبغالنا اقل شي ساعة عشان نوصل ؟؟ هدي هدي
الجوهرة كشرت : متعب كل تبن تصرف ابغى اروح بسرعة ماني مصدقة
غلا و هي فطست من الضحك : خلاص بنوصل بس انتي اجلسي شوي بنروح نجيب الشناط و بعدها نشوف سيارة أصلا كيف بنروح ؟؟؟
متعب بابتسامة : أنا رتبت كل شي لا تشيلين هم بس ناخذ الشنط و السيارة تنتظرنا برا
الجوهرة وهي تمسك يد متعب تمشي معه : متعب
متعب بابتسامة : قلبه
الجوهرة بضحكة : تدري اني احبك !؟
متعب ضحك و هو يحاوطها : وانا اعشقتس يلا
ضحكو غلا و الجوهرة و تقدم متعب عنهم و هو يجيب عربة عشان يحمل عليها الشنط و وقفو ينتظرون الشنط الي تمر قدام عيونهم على السير الجوهرة شافت الشنطة و ركضت تأخذها وهي ما انتبهت للشكل من الحماس بس اللون : ذي شنطتي لقيتها
و نزلتها على الارض و جرتها و كانو متعب و غلا ماهم معها و هم مركزين على الشنط لفت الجوهرة على الرجال الي يناديها : لو سمحتي . . لو سمحتي اختي
الجوهرة باندفاع : خير ان شاء الله ما تستحي على وجهك ؟؟ جاي تكلم بنت ما تعرفها لا و تنادي بعد ؟!!!
الرجال : ياختي ماخ..........
الجوهرة بمقاطعة و صوت شوي عالي : وتكمل بعد صدق انك ما تستحي يبغالك حد يأدبك
لف متعب على صوت الجوهرة و انهبل من شاف الرجال الي مقابلها فز لها و قال بعصبية و هو يناظر الرجال : خير انشاء الله ؟؟؟ شصاير ؟!
الجوهرة بقرف : شف ذا يلاحقني و لو سمحتي و لو سمحتي الي ما يستحي
لف متعب بعصبية و مسكه من ياقة ثوبه : انت ما تستحي ؟؟ وش عندك باختي ها ؟؟؟؟ شتبغى ؟؟؟؟ ها ؟؟؟
الرجال بخوف و ذهول من الموضوع كامل : استهد بالله ياخوي فكني اتكلم طيب !
دفه متعب : اذلف من قدامي لا اكفر فيك هنا
ولف متعب يستغفر وهو ما يبغى يغلط و يبغى يخلص و يطلع من المطار ولاهو فاضي
اما الرجال مشى ورا متعب: يا خوي لحظة
متعب بحد لف : خيررر ؟؟ وش تبغاني امد يدي و افقع وجهك ؟!
الرجال يبغي ينهي الموضوع : ياخوي أنا ابغى شنطتي
متعب : وش ؟؟؟
الرجال : الله يهديك انت و أختك ، أختك بالغلط اخذت شنطتي و أنا ناديتها عشان اعلمها و اخذ شنطتي منها و يمكن هي فكرتني بسوي شي غلط ولا سمعتني
متعب لف للالجوهرة : ذي شنطتس ؟!
الجوهرة وهي تحسب انها شنطتها : اي
الرجال بذهول : كيف اي و ذي علامة أنا مسويها عشان ما اخربط بين الشنط
وتقدم الرجال و لف الشنطة و اشر على علامة فاسفل الشنطة باسمه باللون الابيض : ذي !!!
لفت الجوهرة بفشلة لغلا و راحت بعيد اما متعب الي تفشل ً انقص وجهه تقدم و هو يسلم على الرجال ( سلا رجال ) : والله اني اسف اعذري يا خوك على الي صار
الرجال : ماعليه ماعليه حصل خير و ابد ما صار شي وذا طبيعي يصير
متعب : والله مدري وش اقولك اعذرني
الرجال و هو يخبط على كتف متعب : ابد يا خوي حصل خير حصل خير سوء تفاهم و نحل أنا استئذن زوجتي و ولدي ينتظرون وأسف والله على الي حصل
متعب : لا والله ابد انت الي اعذرنا و الله معك
الرجال : مع السلامة
متعب : مع السلامة
راح الرجال بالشنطة و لف متعب بنرفزة و راح صفق الجوهرة على راسها الي سوت نفسها غبية من شافت متعب مقبل عليهم لكن فزت من الصفقة
متعب بعصبية : انتي وش متى بتعقلين زين كذا ؟؟ فشلتينا مع الرجال ؟؟؟
الجوهرة : يخوي أنا وش دراني طيب ؟؟؟
متعب : افتحي عيونتس بتدرين يلا تأخرنا
غلا و هي تضحك : امشو أخذت أنا الشنط يلا
متعب بابتسامة : كفو اخت متعب
غلا : كفوك الطيب
أما الجوهرة الي للان مفتشلة و متكتفة ومادة بوزها لفت عليها غلا و ضحكت : خذلك مدت بوزها
سحبها متعب و هو يضحك : خلاص انسي تصير تصير يلا مو انتي متحمسة للديرة ذي السيارة يلا
نقزت الجوهرة بضحكت تركب بحماس اما غلا و متعب انهارو يضحكون : والله اختس ماهي بصاحية الله يشفيها
غلا : امين امين بس ادعي ان الله يرد عقلها
و ركبت غلا و شويات ركب متعب قدام جنب السواق و اتجهو للديرة و كل واحد يتمنى الثواني تمر بسرعة و يوصلون