المافيا العراقية

البارت الرابع

السلام عليكم

اعتذر للتأخير 🍓❤️

رواية(المافيا العراقية)
البارت  الرابع
بقلمي انوار الموسوي

اشعر بالحزن كساعة قديمة في قصر مهجور لا ينظر احد لتعبي....💔

مايا،،،،،،،،،،،

رجعت من الدوام حطيت مفاتيحي..هدوء غريبة ماكو صوتهم...رحت للمطبخ اشرب عصير تفاح احبه حب مو طبيعي هالفترة وبس هو اتقبله

ماحسيت غير ارتفعت عن الأرض التفتت شفته عمر شالني وهو فرحان...متت رهبة شجابه ببيتي هسة يشوفه آلاء وتصيرلي مصيبة...اريد اخلص نفسي وانزل

بنفس الثانية الي شالني بيها..دخلت آلاء للبيت وهو يشوفني بيد عمر شايلني تمنيت الأرض تنشك وتبلعني ولا يشوف هالمنظر..راح يظن اني خاينة...

فزيت من نومي مخنوكه وعطشانة بلعومي يابس..شربت كلاص ماي..كمت اغسل وجهي اوخر ضوجة الكابوس من افكاري...

غسلت وجهي باوعت بالمراية..ليش مايترك احلامي شوكت اتخطى عمر ياربي ساعدني اعرف مو مال التفاته منك واني مو خوش عبد من عبادك بس ابقه عبدك وانته ربي خلصني من تأثير عمر شلعه من كلبي نهائياً...

اريد أحب زوجي وبس..ياربي ساعدني تعبت من شعور عدم الأنتماء لأحد...

حسيت بشي حار من كمت من فراشي واحس بشي ينزل مني...شفت بجامتي انترست دم..من سمعت صوت آلاء يريد يدخل الحمام.. بسرعة سديته قفلته...

آلاء:مايا شبيج شنو صار

مايا:ماكو شي بس نزعت ملابسي..ممكن تجيبلي ملابس

آلاء:هسة شنو مستحية مني..فتحي اريد اغسل واطلع..واجيبلج ملابس

مايا:آلاء لا تصعبها روح غسل بالحمام الي بالطابق الارضي

آلاء:انتي بيج شي وماتكولينه..اول وتالي تحجين....

سكت صوته سمعت صوت باب الغرفة..طلعت بسرعة طلعتلي ملابس...جاي انزف معناته اكو شي صاير للطفل...

سبحت وبدلت ماهماني النزيف كلت اذا يريد يطيح الطفل خلي يطيح مابيدي شي..ماراح أكل لآلاء ابداً حلمي مايطمن خلي يطيح بدون مايعرف...

تحظرت نزلت تعبانة لاحظني وسألني كتله ماكو شي لا يظل بالك..تظاهرت بالقوة واني وجعانة ودايخة...رحت للدوام كالعادة..واحس بالدم ينزل مثل الماي من الحنفية..كل شوي ابدل الفوط بالحمام

بديت ادوخ اكثر واتألم اكثر بطني كطعتني تكطع...حسيت بالذنب لأن مارحت نقذته للطفل..بس ماسمحت لعذاب الضمير ياخذني...

الي متعود يموت كل يوم وهو حي مايهمه خوف من الموت وبحالتي اني مافكرت ممكن اموت واني اسقط هالطفل..ماهماني اموت اعيش ماعندي الي يبجي وراي وينكسر كلبه بعدي