THROUGH THE WIND AND THE RAIN

CHAPTER 051 - Needing Him

"ANO 'YAN?" Nahinto siya sa paghakbang palabas ng banyo nang makita kung ano ang inaayos ni Cayson sa loob ng silid nila.

"An extra bed. The hotel has one so I asked for it."

Ibinalik niya ang tingin sa makapal na spring bed na inilatag nito sa carpet malapit sa pader, dalawang metro ang layo sa kama. May kung anong tinig siyang naririnig sa likod ng kaniyang tenga na tila bumubulong at nag-uutos na sabihin kay Cayson na kalimutan na ang tungkol sa extra bed at malaki naman ang kama para sa kanilang dalawa.

"Naisip kong i-book na lang ang katabing silid pero fully booked na ang lahat ng kwarto sa floor na ito. Surely, hindi mo gustong matulog ako sa ibang floor?"

"No. You... stay here," aniya, subalit ang tingin ay nakapako pa rin sa spring bed.

"I hope you can sleep peacefully tonight." Tumayo ito matapos sapinan ang extra bed na iyon, kumuha ng dalawang unan sa kama saka ini-itsa ang mga iyon sa hihigaan nito. "I'm tired. Mauuna na akong matulog sa'yo. Catch you tomorrow."

Nang humiga si Cayson at tumalikod sa kaniya ay saka lang siya naglakad palapit sa kama. Hindi pa rin siya mapalagay sa extra bed na naroon. Hindi niya gustong naroon iyon at mukhang iyon pa ang dahilan kaya hindi siya makatutulog sa gabing iyon.

"Malaki naman ang... kama, bakit kinailangan mo pang..." Nahinto siya at tinakpan ang bibig. Ano ba ang pinagsasasabi niya?

Si Cayson ay napalingon, kaya mabilis niyang ibinaba ang kamay.

"Okay lang sa'yo na magtabi pa rin tayo sa kama kahit wala si Lola para i-monitor tayo?" nananantiya nitong tanong na sinagot niya ng kibig-balikat. Bumangon si Cayson, naupo paharap sa kaniya, at bahaw na ngumisi. "You're used to sleeping beside me, aren't you? At ngayon ay hindi ka na sanay na hindi tayo magkatabi. Iyon din ba ang dahilan kaya hindi ka nakatulog noong wala ako sa mansion sa loob ng tatlong araw, ha, Rosenda Marie?"

"W-Well..."

"Papaano pala ako nito magkakaroon ng pagkakataong makipagkita sa mga babae ko kung ganiyan ka?"

"It'll wear off, Cayson." Sumampa na rin siya sa kama at pumailalim sa kumot. "Kapag natapos na ang first trimester ay matatapos na rin ang paglilihi ko. Baka sa second trimester ay wala na akong ibang gustuhin kung hindi ang mawala ka sa paningin ko."

Lumapad ang pagkakangisi nito. "I hope so."

Inabot niya ang lamp at pinatay. Nang sakupin ng dilim ang buong silid ay ibinalik niya ang tingin kay Cayson na muli nang nahiga. "Good night."

"That's a first," he said, teasing. "You, too. Rosenda Marie."

Sa loob ng mahabang sandali ay pinilit niyang makatulog, pero sumakit na lang ang kaniyang mga mata ay hindi pa rin siya dinalaw ng antok. At ramdam niyang ganoon din si Cayson dahil hanggang sa mga sandaling iyon ay malalalim pa rin ang paghugot nito ng paghinga.

"How does it feel to have a growing life inside of you, Rosenda Marie?"

Napamulat siya at ibinaling ang ulo sa direksyon ni Cayson. Patay ang mga ilaw subalit may sapat na liwanag mula sa labas ang nagbibigay tanglaw sa kaniya sa loob ng silid, kaya nakita niya itong nakatalikod pa rin sa kaniya.

Matagal bago siya nakasagot sa tanong nito.

"Weird."

"You feel weird?"

"Yes."

"Why?"

"I don't know. Hanggang ngayon kasi, parang hindi pa rin nagsi-sink in sa akin na magkakaanak na ako."