لهيب عشقك محرم ( كاملة)

Part 3

🍂كاتبة :: Samira rd

خارجة من داك لمكتب ساداه وراها واقفة وسط لكلوار كتورك وسط جبينها بأطراف اصابعها بصداع لي جاها فراسها رجعت ملامحها لبرود وتمشات خارجة من داك لكلوار تجاه لكوزينة.. دوزت ديك لعشية كاملة غير ليشومبغ كتقاد فيهم حتى حست بضهرها غادي يتقسم بدا يبان عليها تعب.. خدودها ونيفها حمارو بالبرد شعرها لصق عليها بالعرق .. قلبها كيضرب بوتيرة سريعة.. كرشها كتغرغر من صباح ما طاحت فيها نعمة .. كانت جالسة وسط عرفة كتستاراح وقفت دخلت لحمام لي كان وسط شومبغ وقفت امام لافابو كتهز لما فيديها وترشو على وجهها وعنقها.. حست بشوية بردات خرجت من لحمام ووجهها كيقطر بخطوات متعبة خرجت من شومبغ واقفة امام لباب هزت عينيها فالباب ديال شومبغ لي امامها كيتحل خرج منو وعيونو عاقدهم توقفو عينيه عليها هي لي كانت حاطة راسها على لحيط مغمضة عينيها وسخفة شاداها تمشا عندها بخطوات بطيئة وقف امامها

صقر : [ عقد حواجبو باستغراب نطق كيتفحصها بعينيه ] مادموزيل ؟
جوديا : [ تلقاو عينيهم عقدت حواجبها كتشوف غير ضبابة ] اممم

كانت اطيح وشدها من معصمها واليد لاخرا حطها على خصرها حطت راسها على صدرو كتنهد جلسها على لكرسي لي كان جنب شومبغ .. حطت خدها على يدها مغمضة عينيها.. جبد تيليفون من جيبو مدوز لخط وحاطو على ودنو تواني وقطع .. ماكاملاش دقيقة وجا لكارد كيجري وقف امامو

صقر: [ بصوت رجولي خشن نطق بتبات ] شوف مادموزيل شنو خاصها .. وجيب طبيب [ هز معصمو كيشوف ساعة غمزو وكمل حديتو ] تسناها حتى تفيق وهبط عندي

اوما لكارد بإيجاب مهبط راسو كيشوف خطوات صقر غادي.. بقا بنفس لوضع حتى مشا هز عينو في جوديا لي كانت مزال فوضعها كتنفس بهدوء وعرق هابط من جبينها.. عيط على طبيب لي مادازش لوقت بزاف وجا .. وقفها لكارد دخلها لشومبغ ديال صقر حيد ليها كعبها ..فحصها طبيب ووقف جامع معداتو..

طبيب : بسبب تعب والارهاق.. وماواكلاش نهار كامل داكشي علاش طاح ليها طونسيو.. شوية وغادة تفيق خاصها تاكل باش ما ترجعش طيح

خرج طبيب وخلاهم.. التافت لكارد ناحية لفوتاي تمشا ناحيتو جالس فوقو مرجع راسو لور كيتسناها تفيق كيف امرو.. دازت ساعة بدات تحل فعويناتها بتعب كتشوف في سقف تواني قليلة تقادات فجلستها عاقدة حواجبها كتشوف فين هي وشنو جابها هنا.. كتفحص بعينيها شومبغ عرفات بلي ديال صباح ولكن شكون جابها هنا وهي كانت فشومبغ لي قدامها عينيها مشاو لكارد لي ناعس فوق لفوتاي رفعت حاجبها حيدت لفراش حاطة رجليها فوق لارض كتمشا فوق صباع رجليها ببطء وبلا حس ..
وقفت امامو كتفحصو بعينيها هبطت لعندو حاطة يدها عليه كتنغز فيه حتى حل عينو بفزع حاط يدو على لفردي لي فجنبو هي لي مزال واقفة امامو رافعة حاجبها

جوديا [ طلعاتو ونزلاتو بعيونها لحادة نطقت بلسان متعب ] شكون انت؟
لكارد [ وقف امامها نطق مهبط عينيه] انا لكارد.. كنتي سخفانة داكشي علاش جبت ليك طبيب
جوديا [ اومات راسها بإيجاب كتحك فجبهتها ] شحال نعست ؟
لكارد : [ هز عينو فيها كيشوف كيف خدودها وشفايفها لي تنفخو وبانو حمرين سرط ريقو ونطق] ساعة

تنهدت ورجعت كتلبس في كعبها قبل ما تخرج فحصت عينينا في لغرفة

جوديا [ نطقت بتساءل] ديالمن هاد شومبغ؟
لكارد [ هبط عينو ] موسيو صقر

قلبت عينيها هاد سمية سمعتها كتر من سميتها .. التافتت خارجة من شومبغ واخا مزال تعب ودوخة شاداها ولكن قاومات كتمشا بخطوات بطيئة وكتقاد فراسها .. صايبات شعرها كوب شوفال .. هبطت من دروج كتفحص لمكان بعينيها كان اوطيل شوية عامر يعني لخدمة بزاف ..
2:00

واقفة وسط لاوطيل حاطة يديها على جنبها كتغزز في شفايفها وعيونها حمرين .. هزت معصمها تشوف ساعة لقات 2 تنهدت التافتت غادة لكوزينة دخلت شافت يوسف ورشيد كيطيبو

يوسف : [ هز عينو في جوديا ابتاسم مد ليها بلاستيك كبيرة وخضراء فيها زبل ] ختي جوديا عفاك تقدري تنزليها لتحت خاصني نطلع لفوق وماعنديش كفاش نزلها [ اومات راسها بإيجاب خادتها من عندو نطق بتساءل ] ياك عارفة فين ؟ برا من ورا لاوطيل ماتخافيش راه كاينين لبولات شاعلين

اومات براسها خرجت من لباب لي كاين فالكوزينة كيخرج لور التافتت يمين ويسار مابانش ليها طارو .. ضارت على ليمين كان كلوار طوييل فيه بولات مضويين كيف قال ليها ومغطي من شتا..تمشات بخطوات بطيئة غير صوت كعبها لي كيستمع ضارت على جهة تانية كيبان ليها طارو بعييد بزاف وسقف تحبس حد فين وقفت... هزت عينيها فسما لقات شتا ماساحياش وغادة تفزگ وتزيد تمرض تنهدت وتمشات بخطوات سريعة وشتا كطيح عليها .. شعرها تبلل والقميجة لصقت عليها خلات صدرها يبان .. كترمش بعيوناتها مسافة طريق ووصلت عقدت حواجبها فاش بان ليها عامر حست بالاعصاب التافتت بعينيها ناحية ليمين بان ليها واحد خاوي تمشات ناحيتو هازة لغلاقة لايحة زبل ضارت باش ترجع.. تار انتباهها ضو لي شاعل جنب طارو خارج من لباب لي كان مردود وشي وشوشات ديال هضرة.. فضولها قادها ناحية ضو بخطوات ثابتة وبطيئة توجهت ناحيتو وقفت امام لباب حطت يدها على لبواني حالاه شوي ..خرجت عينيها من شي لي كتشوف
كان مربوط شخص من يديه في حديدة لاصقة فالحيط معري كامل .. وجروح في لحمو ملامحو ماباينينش من كترة ضرب لي فيه .. عاطيها راجل بضهر.. ضهرو لي كان عريض وقفتو رجولية فيديه كان هاز فردي موجهو ناحية شخص امامو

****** [ تبسم شبه ابتسامة نطق ببرود ] مارحمتكش كيف ماانرحمهاش...

شهقت بصوت عالي فاش شافت قرطاسة مختارقة جسم الشخص لي كان معلق بلا مدير صوت ويلوي راسو دم خارج من وسط كرشو.. التافت بسرعة عاقد حواجبو من صوت .. تبت عينيه عليها ..هي لي كانت كترجف شحب لونها وكأن كاع دم تحيد منها.. كترجع بخطوات لور وقلبها كيضرب من هاد لوحش لادمي لي جاي اتجاهها وملامحو كتوحيي على شر والخبث قلبها طاح على رجليها بدات ترجف ونسات على لمشية ديالها بدون وعي منها التافتت كتجري وكعبها كيعكلها كتجري بكل قوتها وكتحس بلي طريق طوالت.. خطواتوو سريعة كتسمعها وراها.. عرفت بلي تباعها.. وهي كتجري فجأة طاحت على ركابيها بسبب كعبها لي تهرس .. ماداتهاش فطايحة وليبة لي تقطعت من ركبتها.. ضارت جالسة على مؤخرتها كترجع بلور على يديها سارطة ريقها وهي كتشوفو قرب يوصل ليها رافع حاجبو صدرها كيطلع وينزل قرب ليها كتر تحنا شادها من رجلها

****** [ ميل راسو متبت عينيه عليها نطق بصوت رجولي خافت ] لفضول خايب [ بعيون تاقبة نطق ببرود] كيدي مولاه لقبر ..يتبع