لهيب عشقك محرم ( كاملة)

Part 22

كاتبة :: Samira rd

•كانت واقفة امام لمراية.. فبيت من تراب وسقفو من خشب زرابيه ديال شلوح.. عاضة على شفايفها بإعجاب عيونها كيبريو وملامحها فرحانة كانت لابسة.. قفطان امازيغي حمر منبت بوريدات زرقين بيضين صفرين لابسة صايا فلكحل حتى هي منبتة بنفس لوريدات لي منبتين بالقفطان ونفس الالوان.. فوق راسها  زيف حمر مزوق بوريدات خدرين  وعليه  تازرا * تاج دالنقرة* ..

ويديها مزوقين   بتينبايلين * دبالج دنقرة* عنقها لبارزة فيه تاحلابت *سنسلة دنقرة* عاد فوق منهم تادالت *زيف بيض طويل* فرجليها لابسة ريحيت لحرير *شربيل*.. كان مايكاب خفيف ايلاينر وعكر بارز شفايفها.. كان سر طايح عليها وكأنها هي لعروسة .. نزلت عينيها لناحية اروى لي كانت حتى هي لابسة قفيطين بحال جوديا مع شريبيل صغير .. ابتاسمت وهبطت عندها هازاها معنقاها

جوديا :[ كتبوس فيها ] ياختي على شلحة ياختي

تسمع لباب تحل التافتت كتشوف يامنة وخديجة لابسين حتى هوما بحال جوديا وقفت يامنة امامها كتشوف فيها

يامنة: [ بإعجاب نطقت بشلحة] تبارك الله ماشاء الله ايكلي تفولكيت اكمحجب ربي يوي مهاب ايتاهل زين دتاويل دالقلب اومليل( تبارك الله ماشاء الله .. جيتي زوينة الله يحجبك ولدي مهاب مزوج بزين وتاويل والقلب البيض )

**شرحت خديجة لجوديا

جوديا :[ ابتاسمت ليها بشكر نطقت ] الله يكبر بيك الحااجة [ شافت في حوايجها] شكرا على هاد لحوايج

يامنة: [ طبطبت على كتفها]نكي ايخصا اكمشكرح ايلي ملاد اورد كمي  ايليس نيوي اوراداك تتاهل غاس( انت لي شكرا ابنتي كون ما نتي بنت ولدي ماكانتش غادة تزوج ليوم)

جوديا :[ التافتت ناحية خديجة.. عاودت التافتت ناحية يامنة عاقدة حواجبها مستغربة] كفاش؟ مافهمتش؟

يامنة: [ بابتسامة ] نتان ايقنعن يوي باش استياج اتتاهل افروخ لي ترا دنتان اسيسكرن تامغرا  كادو  (هو لي قنع باها لي هو ولدي .. باش تزوج بي دري لي باغا .. وهو لي دار ليها لعرس كادو)

ابتاسمت جوديا بشرود وهي كتمسع خديجة كتشرح ليها شنو قالت يامنة.. كانت مستغربة من هاد لحنية ديال مهاب.. واش هو بصح حنين وضريف حتى لهاد درجة؟ لي مخلي ناس دوار كاملين يهضرو عليه بالخير.. بقاو دقائق واقفين ويامنة كتشكر في مهاب وجوديا كتبسم ليها .. خرجو من داك لبيت ..  دار كانت عامرة بالعيالات والهضرة.. داتها يامنة من واحد لكلوار طلعو فدروج ديريكت لسطح لي كان واسع وكبير بزااف..

مفرشين أكرتيل و تازربيت *حصاير وزرابي * سطح كامل مضور عليه لمخاد وطبالي صغار في الارض كان سطح عامر بالعيالات كيهضرو ويضحكو مع بعضياتهم لابسين نفس لباس جوديا..قالت يامنة لجوديا تسلم على لعيالات..  سلمت عليهم جوديا كاملين والتافتت ناحية يامنة لي كانت غادة ناحية لعيالات تبعتها جوديا وجلسو جنب لعيالات