لهيب عشقك محرم ( كاملة)

Part 23

كاتبة :: Samira rd

•جوديا: [ نطقت بشرود ] شنو اتكون كدير صوفيا [ تنهدت منزلة راسها لعند اروى لي كانت كتلعب ] اووف [ ابتاسمت عاضة على شفايفها كتفكر] ولكن قربت مابقا والو..

*عند مهاب

من بعد ما مشا عند رجال دوار رجع لدار حل لباب ودخل.. عقد حواجبو من سقيل لي فدار موالفة اروى كتكون كتغوت ولا ضحك.. بغا يعيط على جوديا او والو طلع لفوق قلب نزل لتحت.. خوف بدا يتسلل لقلبو من شنو يكون جرا ليهم.. خرج لزنقة كيقلب او والو .. خاف ليكون شي واحد جا وداهم معاه.. كاع لافكار لخايبة طاحت عليه فعقلو دخل لدار وتيليفون فودنو.. سمع صوت لباب كيتحل حيد تيليفون كيشوفها داخلة كضحك مع اروى ..

ضحكتها استفزاتو لا وبل حس بيها استهزئات بيه كفاش هو خايف عليهم وهي كضحك.. عض على سنانو بحقد توجه عندها هي لي شافتو وبقات واقفة فبلاصتها ببرود.. تمشا بخطوات سريعة كارز عليها من شعرها حتى غوتت بألم

مهاب: [ بصوت خشن مرتفع بغضب] فين كنتي ابنت لق**ة مخلياني كنقلب كيف شي حمق

جوديا :[ كضرب فيدو باش يطلقها طلقها وبعدت عليه نطقت ببرود] شكون قال ليك قلب ...و انا وبنتك ملينا من هاد لقرينة لكحلة وبغيت نخرج

مهاب: [ زير على شعرو بيدو نطق معصب ] كفاش ابنت لق**بة مليتي كفاش.. خارجة بلا شواري واش بغيتي تمرضيني واش باغا تخرجي ليا عقلي بفعايلك

جوديا :[ هزت كتافها ببرود ] خاصك تحمد الله حيت ماهربتش

بدا يضحك بفقصة بان ليه فاز فوق طابلة جنب لباب هزو حتى لسما خابطو مع الارض.. وهي كتشوف فيه ببرود

مهاب [ هز صبعو امامها نطق بعصبية ] رجليك نحطهم قدامك الى حاولتي تهربي

تواني وهي كتشوف فيه ببرود التافتت عاطياه بضهر

مهاب :[ نطق تحت سنانو] طلعي جمعي حوايج اروى وهبطي ..

شبه ابتسامة خبيثة ضهرت على تغرها وهي طالعة فدروج.. داكشي لي كان جمعت حوايج اروى وهبطت كان واقف جنب دروج شافها هابطة نتر من عندها صاك اروى بنترة سابقاه خرجت لباب وتبعها ساد لباب وراه ركبت اروى فكرسيها فالخلف طلعت لقدام وحتى هو .. ديمارا وكسيرا .. طول طريق وهوما غير ساكتين.. سكوت مهاب كان عصبية محاولة يكتم غضبو.. اما سكوتها فكانت كتفكر.. داخت بتفكير فشي حل ديرو ..

دازو ساعات وساعات وهوما غادين فطريق حتى بدا يضلام لحال.. بدا يبان ليها لقصر .. دقائق او وصلو امام لباب تفتح ودخل منو مبلاصي طموبيل حلت لباب نازلة.. التافتت جهة تانية حالة على اروى هازاها وهي ناعسة .. تمشات بخطوات بطيئة ومهاب وراها عاقد حواجبو وقفت امام باب لقصر... سبقت رجلها وهي كتلولب عينيها في لقصر بحالا اول مرة غادة تشوفو ودخل ليه..