لهيب عشقك محرم ( كاملة)

Part 10

كاتبة :: Samira rd

دخل لقصر كيشوفها نازلة من دروج هازة فيدها اروى كضحك معاها تمشا ناحية دروج واقف لوسط وقفت امامو

جوديا : [ رافعة حاجبها بتساءل] شنو؟
صقر [ شاف فأروى كفاش هازاها ] ماكنشدوش دراري صغار هكا

كانت حاطة يديها بجوج تحت رجليها.. شد يد جوديا حطها فوق راس اروى واليد تانية لتحت

صقر : [ تبت عينيه عليها نطق بهدوء] تعلمي كفاش تشديها هي ماشي مونيكة

اومات براسها بإيجاب وتمشات من حداه غادة لصالون لي كان مغربي 100% جلست فالارض لي كانت فيها زربية سرحات رجليها وحطت اروى فوق رجليها جمعت شفايفها على شكل بوسة شادة يدين اروى صغيورين وسط يدياتها

جوديا: [ بصوت طفولي ] وانا على فنة ..[ هزت يدها باستها] فين هي مامي.. شكون والد هاد زين
غيث : صقر

هزت عينيها فالباب كتشوف غيث داخل من لباب كان محيد لتام وكانت اول مرة غادة تشوفو بلا بيه .. كانو ملامح وجهو  رجولية بامتياز بشرتو سمراء .. لون عينيه فلون عسلي كبار.. شعرو نفس لون عينيه.. لحيتو مقادة وخفيفة والجدية على وجهو

جوديا :[ باستغراب ] كفاش ؟
غيث: [ جلس فوق سداري حادر عينيه لاروى لي كانت كضحك] بنت صقر
جوديا : [ وسعت عينيها بعدم تصديق ] دبا داك لوحش والد هاد لملاك [ اوما براسو بإيجاب هبطت عينيها لاروى مضحك معاها] ماجاش معاك يكون باباك [ هزت راسها مصغرة عينيها في غيث] علاش كدير لثام
غيث: [ بهدوء ] صقر هو لي قال ليا نديرو

كتشوف فيه بإستغراب عينيها ما تحيدوش من عليه كانت فيه شي حاجة غريبة لي خلاتها تبقا غير تشوف فيه عاقت براسها تنهدت وهبطت عينيها لعند اروى لي كانت كتلعب بيديها...

غيث: [ بصوت رجولي خشن ] اروى..[ هزت عينيها فيه كمل حديثو بهدوء] ماشي اي بنت فالقصر .. اروى بالنسبة لصقر هي حياتو ماشي غير بنتو
جوديا : [ رفعت حاجبها وملامحها مستغربة] علاش كتقول ليا هادشي
غيث: [ سكت تواني مفيكسي عينيه عليها ] باش ماتفكريش شي نهار تآديها
جوديا :[ هبطت عينيها لعند اروى بدات تهر فيها وضحك ] شنو كيقول هدا [ هزت عينيها فيه عاقدة حواجبها] كفاش كنبان ليك؟

بقا يشوف فيها بلا يجاوب وهي حدرت عينيها عند اروى كضحك معاها .. ضحكتها بريئة ابتاسم فاش شاف اروى كتلعب في وجه جوديا وضحك تنهد وناض خلاهم بوحدهم

دازت ديك لعشية كاملة غير مع اروى توكلها وتلعب معاها حتى جا ليل ونعست اروى
*حطتها فبلاصتها باستها وهي كتشوف فيها دغيا ولفتها وحباتها طفات ضو وخرجات من لبيت .. نازلة من دروج كتفحص بعينيها فين هوما بانت ليها لخدامة وسولتها أشارت ليها فين كاينين.. تمشات بخطوات بطيئة ناحية صالة لي كانت كبيرة بعض شيء فيها طابلة لاكل طويلة وكبيرة لوسط مضورين عليها كراسة.. مترأس طبلة صقر وفجنبو غيث جالس بعيد عليه شوية .. كانت طبلة عامرة بجميع انواع لماكلة والعواصير.. تمشات ناحيتهم جارة كرسي لي امام غيث

صقر : [ رفع حاجبو مفيكسي عينيه عليها نطق بصوت خشن] على سلامتك الالة
جوديا : [ ماكتشوفش فيه نطقت بهدوء] كنت كنعس بنتك
صقر: [ شاف في غيث لي حادر راسو وشاف في جوديا] بداو

بداو ياكلو من غير صوت لمعالق هو لي كيتسمع كانت كتاكل فهدوء كتحول عينيها مابين غيث وصقر بزاف لاسئلة فراسها منهم شنو كيجي غيث لصقر ولي مخليه ياكل معاه فنفس طبلة واحد ماطاحتش ليها لفكرة ديال انه يكون خوه حيت ماكيتشابهوش نهائيا فيقها من شرودها صوت صقر ...

صقر :[ هز عينو في جوديا نطق ببرود ] كيف شفتي اروى اول وحدة غادة تسكت ليها هي نتي يعني اتبقاي معاها 24/24 .. هي كتفيق فليل بزاف وتقدر ما تنعسش ليل كامل .. بغيتك تبقاي حداها داكشي علاش عطيتك بيت قريب ليها بغيت فليل عينيك لي يتسدو اما ودنيك لا
جوديا : [ كانت حادرة راسها كتسمع ليه ما كتحملش لي يبقا يأمر فيها شنو دير وشنو لا هزت عينيها نطقت ببرود ] شنو لمقابل ديال هادشي
صقر : [ ابتاسم شبه ابتسامة زائفة مستفزة غامزها] صوفيا
جوديا : [ غززت شفايفها بحقد نطقت بتوعد] اندمك
صقر : [ عينيه متبتهم عليها نطق باستهزاء] غادين نشوفو

قلبت وجهها جهة غيث لي كان ساكت وكيشوف فيهم..دفعت لكرسي وناضت طالعة لبيتها.. خبطت لباب بجهد غادة جاي فداك لبيت حيدت لكسوة بقات عريانة كتغزز في سنانها

جوديا: [ بحقد ] كفاش اجوديا هدا كيتحكم فيك .. كفاش واش قربتي طيحي راس قدامو.. [ هزت يديها كارزة على عينيها بصباعها] تهدني.. تهدني ماغاديش يقدر عليك

عضت على لسانها وتخشات في فراشها مغمضة عينيها ناعسة ناسية شنو واقع

*عند صقر

من بعد ما كلا وسالا طلع لبيت عند بنتو مخلي ضو طافي من غير ضوء القمر لي مضوي من لبالكو سد لباب وتمشا ناحيتها هازها فيدو هي لي كانت ناعسة براحة كان فوتاي حدا ناموسية جلس مرجع ضهرو لور فوق منو ناعسة بنتو .. غطاها بي مانطة سخونة كانت جنبو

صقر : [ باسها فراسها مغمض عينيه نطق بحب] توحشتك انوري [ عاود باسها فراسها كيدوز يدو لخشنة على شعرها بحنان ] امتى تكبري وتقولي بابا هممم [ ابتاسم بفرحة فاش تخيلها] كبري ابابا ولي حليتي عليها فمك تحضر واخا تكون في فم سبع

بقا كيدوز يدو على ضهرها بحنان حتى داتو عينو وهو ناعس بديك لوضعية...يتبع