لهيب عشقك محرم ( كاملة)

Part 18

كاتبة :: Samira rd

بقات ساعة وهي معنقة اروى لي كانت ناعسة عليها .. وقفت حاطاها فوق ناموسية مضورة عليها لمخاد باش ما طيحش غطاتها مزيان خرجت مخليا لباب محلول باش تسمعها الى بكات.. هابطة حفيانة بخطوات خافتة كتمسع تقرقيب في لكوزينة تاجهت ناحيتها واقفة جنب لباب موسعة عينيها بصدمة .. كتشوف صقر واقف في لكوزينة كيطيب كان عريان من لفوق .. عضلاتو كتحرك معاه فكل خطوة.. تفحصاتو بعينيه كان صدرو عريض وباين خادم عليه ديال بصح.. فيه وشام على شكل صقر كبير تحت صقر كانو جوج سميات صغرت عينيها بفضول باغا تعرف شنو مكتوب بخطوات بطيئة وخافتة توجهت ناحيتو وقفت ورا ضهرو محدورة كتقرا فشنو مكتوب

جوديا :[ رفعت حاجبها ونطقت بدون وعي ] مُهَاب

هزت راسها فاش حست بيه التافت ناحيتها مطلعها ومنزلها عاقد حواجبو نطقو دقة وحدة

ُمُهَاب : حوايجي
جوديا : مُهَاب

جوديا :[نزلت عينيها كتشوف حوايجو هزت راسها فيه] مالقيت ما نلبس
مُهَاب:[ رفع حاجب ونزل لاخر ناطق بهدوء] مالقيتي ماتلبسي.. تلبسي حوايجي ؟؟
جوديا: [ ببرود] بغيتي نزل عريانة؟
مُهَاب: [ التافت جهة تانية مكمل طيابو ناطق ببرود] ايكون حسن مايقيسو لحمك
جوديا: [ مصت شفايفها ناطقة باستغراب ] سميتك مُهَاب؟
مُهَاب : امم
جوديا: [ نطقت بابتسامة مستفزة] ماراضيش بسميتك داكشي علاش مسمي راسك صقر ؟
مُهَاب: [ ببرود ] الى جمعتي سنانك بين يديك قولي عليا ضالم

خنزرت فيه والتافتت ناحية طابلة لي كانت فالكوزينة جلست حاطة رجل على رجل كتشوف فيه .. مااتنكرش بلي هو زوين شعرو لحيتو عضلاتو عينيه لي كيخليو اي واحد ينجادب ليهم ولكن افعالو كتغطي على هادشي كامل

مُهَاب :[ بصوت خشن] ايكون حسن الى نضتي عونتيني فبلاصة ماتحضيني...

*عند غيث

واقف امام لباب ومتردد يدخل تنهد حاط يدو على لمقبض حالو داخل لبيت استغرب من مالقاهاش في لبيت

غيث : [ بصوت مرتفع] جوديا؟

تمشا ناحية لحمام كيدق فيه حتى واحد ما جاوبو حلو وزاد استغرب كتر.. ضن انها مشات عند اروى .. خرج من لبيت متاجه لبيت اروى حلو حتى هو عقد حواجبو من مالقاهاش حتى هي.. سد لباب وهبط من دروج كيتفحص بعينيه بانت ليه غيثة جاية من لكوزينة بخطوات سريعة تمشا ناحيتها واقف امامها

غيث:  [ بصوت رجولي خشن] فين جوديا

غيثة: [ رفعت حاجبها بتساءل] على ماكايناش في بيتها ؟

غيث: [ نفا براسو حاط يدو على رقبتو] لا ماكايناش لا هي ولا ارو... [ عقد حواجبو] فين صقر؟
غيثة[ هزت كتافها ] ماعرفتش ما شفتوش من لبارح

عض داخل فمو وهو كيفكر.. ليكون بصح داكشي لي كيفكر فيه.. خشا يدو فجيبو جابد تيليفون مدوز لخط ليه وهو طالع فدروج.. ماجاه حتى رد التافت ناحية لبيت لي فيه كاميرات.. دخل ليه واقف امام حاسوب دالكاميرات مرجع كاميرات لور .. عض على شفايفو بقوة وهو كيشوف مُهَاب مخرج جوديا من لقصر مطلعها فطموبيل صدرو بدا يطلع وينزل بالاعصاب بان ليه كرسي تم هزو حتى لسما خابطو مع الارض بقوة حتى تشتت

غيث: [ مزير على يدو حتى بانو عروقها نطق بغضب ] علاش خليتها بوحدها علاااش [ هز تيليفون تاني مدوز لخط ولكن لا رد بقوة لغضب لي تجمع فيه خبط تيليفون مع الارض] فين ديتيها فين

كانت وراه واقفة اسماء عاقدة حواجبها باستغراب من حالتو لغريبة التافت باش يخرج هز عينو فيها هي لي كانت مستغربة .. قلب وجهو خارج التافتت حتى هي كتشوف فيها عاطيها بضهر

اسماء :[ رافعة حاجبها بتساءل] علاش كدير عليها هادشي وانت يله عرفتيها ؟ [ وقف لحضة كيسمع شنو كتقول سرطت ريقها ونطقت ] كتبغيها؟؟

ماداهاش فكلامها مشا مخليها كتغلي.. خرج من لقصر واقف فجردة حاط تيليفون على ودنو

غيث [ نطق فاش رد عليه المتصل ] الو صار. بغيتك تعرف ليا فين مُهَاب

صابر: فين هو ؟ ماقال ليا والو

غيث [ بصوت خشن ] صابر انت صاحبو وغادي تعرف فين هو
صابر: غادي نحاول
غيث : تهلا...

قطع عليه وتنهد كارز على عينيه ندم علاش خلاها بوحدها وخرج.. مافكرش بلي يقدر يخطفها مُهَاب مرة أخرى

• عند جوديا

قبل ماتبغي تنوض سمعت بكا ديال اروى تبسمت فخاطرها عاتقاها وقفت بسرعة طالعة لبيتها هازة اروى هابطة بيها من دروج كضحك معاها دخلو لكوزينة كان مزال مُهَاب كيطيب.. جلست فوق لكرسي

جوديا: [ بصوت خافت مبتاسمة] عتقتيني من طياب

صوت ضحك اروى هو لي مسموع فداك لبيت .. كان مُهَاب كيبتاسم فكل كلمة كتقولها جوديا لاروى وبنتو كضحك ماكانش كيدوز وقت بزاف مع اروى ..
دازت ساعتين فيها طاب لغدا.. طلعت جوديا تبدل لاروى ونزلت كتشوف في مُهَاب جالس .. التافتت ناحية طبلة وسعت عينيها بصدمة .. مرة تشوف فيه ومرة تشوف في طبلة جلست وهي متبتة عينيها عليه

جوديا: [ رفعت حاجبها باستغراب ] طاجين ؟؟ [ فجأة بدات ضحك بصدمة ومُهَاب كيشوف فيها بملامح مستغربة ] كتعرف طيب طاجين ؟
مُهَاب: [ عاقد حواجبو] شنو فيها ؟
جوديا: [ هزت كتافها] حيت كتبان ولد لفشوش.. انا كنسحاب بلي طاجين ماكتعرف حتى شكلو كيف داير
مُهَاب :[ نفا براسو بلا حول نطق ببرود] راني تزاديت وكبرت فالمغرب..

اومات راسها بإيجاب.. هز لغلاقة وبان طاجين اللحم سرطت ريقها غير من ريحتو كان باين بنين ولكن مابينتش حط ليها لخبز.. خادتو سمات الله وبدات كدوق جاها بنين هزت عينيها في مُهَاب لي كيتسناها تقول شي كلمة

جوديا :[ هزت كتافها قالبة عينيها] مابيهش

تواني وهو كيشوف فيها ببرود.. حط يديه على طاجين هازو

جوديا :[ باستغراب ] فين غادي ؟

مُهَاب :[ رفع حاجبو نطق ببرود ] ياك مابيهش.. اوى مااتاكليهش

جوديا: [ نزلت عينيها لطاجين وشافت فيه كرشها كتغرغر وماتقدرش تكبر على لماكلة ابتاسمت ابتسامة صفرا ونطقت] غير ضحكت معاك.. [ نطقت بإعجاب زايد عن حدو بايسة صباعها] احسن طاجين دقتو فحياتي.. وماكاينش شي طاجين بحالو

فيكسا عينيه عليها عرفها غير كتفلا عليه وطانزة حط طاجين وجلس.. كملو ماكلتهم فسكات.. كتاكل وتوكل حتى اروى كملو جمع مُهَاب لماعن وهي ناضت خرجت لصالون.. تبعها مُهَاب جلس امامها فوق لفوتاي شاعل تيليفون كيشوف بزاف ابيلات من غيث .. وغيثة .. وصاحبو دوز لخط لغيثة هي لولة حاطو فوق ودنو

مُهَاب: [ بصوت خشن هادئ] لواليدة...يتبع