جمرة الحلال

✨part1 ✨

على بركة الله نبداو قصتنا !

[1 ]

ببلاد الألسن السبعة، بلاد الحضارة والنخوة ياسيادي بلاد العفة والخير والجود والكرم، الحايك والسواك والشربيل والزين الفتاك ..ببلاد المغاربة لي كلامهم شافي وكلو قوافي.. حكاياتنا خيوطها الحبرية منسوجة في مدينة فاس مدينة قريبة من قلوب العباد فات على ميلادها 12 قرن والخير باقي..
مدينة حبقها أصيل، الملوك الفاتحون اتاخذوها عاصمة.. سكنها العلماء الصالحون ومن ذاك المحبق الفواح بخير ربي نبتت جذور فاح عطرها على يد العلماء والمفكرين، الشعراء والمناضلين، وحاربوا الجهال بالدوايا والقلم، فاس يا ناس نمشي بحاراتها مرفوع الراس نشم في جذرانها ريحة التراث والاصالة..، هويتها معمارها ..ترابها .. حفنة من العز تهزها بين يديك وتعتز..!! مكانها في القلب مقام وافي .. هزيت من محبقها الفهامة و الزين والهمة وحلاوة اللسان، تفقهت في جامع الانوار .. شربت من ينبوع العلم في المدرسة البوعنانية ..، وعلا مقام علمي وشاني بجامعة القرويين...، و طربني الملحون وعيساوة ..؛ تزينت بكسوة الجوهر ضربو به الامثال وقال عليه لوتورنو نشوف اللبسة الفاسية نتفكر تمثال العذراء، كسيت رجلي ببلغة من صلب هاد المدينة وتمشيت بالنخوة الفاسية بطقس الرهينة والتعشاق،
بقفطان ضو الصباح وثقت اصلي ومفصلي وزدت عليه "الخريب" لي تنسجواا خيوطه بمصانع بن شريف العتيق.. وسدلت على راسي وشاح "قصبة بركاتو" مطرز بالصقلي الفاسي، وزيدني بخير الاثواب سترة "كمام المانوص" وقفطان حر مغربي الأصل وختمت زينتي بازراير الجوهر مع النواسي المشبك على جبيني...!!

هذا كلام موزون من فم مولات العيون الريمية.. الشفار طاوس ملوكي الحاجب قوس سهمه يخترق قلب المسلوب..، بين النظرة والنظرة حكاية نطقها المتيم بالزين ومازالو ينظم اشعار وكلام يشافي قلبه المسكين...، الصوت نغمة تغرقك في بحر العسل الشافي اذا كان القلب مغموم يفاجي واذا كان العقل مهموم بكلمة من جوفها يعود الهم راشي ، هي نغمة وملحون وزين موزون... برنوس مخبي السالف والوجه قطعة من القمر تحت اللتام تالف...!!!

جالسة على حصيرة وسط قاع دار كبيرة، سقفها عالي مزين بنقش هماوي حرفي.. والحيوط
فسيفساء فاسي تقليدي كل سقف تتوسطو تريا قدها قد السخط كانها منارة وسط المحيط .. وسدادر في الصالة غطاهم همة شان...، التفاصيل في هاد الدار الكبيرة يفتح النفس ويريح الخاطر...، كلها تفاصيل تقليدية وسط المراح الكبير نافورة هي الاخرى مزينة بالفسيفساء المصنوعة يدويا بدقة ومهارة عالية ...