《جمرة الحلال 》 ♡25♡
تهزو كاملين من مكانهم مفزوعين ماقادرين يقربوا ولا يتدخلو ماعدا خديجة
سارت ناحيتهم مخلوعة :
لعن الشيطان !!!!
شامة بخطوة منها وصلاتو كاتحرك يدها على كتفو وتهديه :
دير بوجه ميمتك حبيبتك اوليدي .. هاهي غاتوجدلك الفطور وتسبقوو لك سير طلع لبيتك ترتاح
طلق وجهها بالنتير خلا يديه مطبوعين على خدودها وجرح فمها لي خبات تكشف نزف وسال ..
جرتها شامة قبل مايدير فيها شرع يديه وخديجة تحرك راسها وتقول خسارة ..
نوارة وسطهم عاجبها الحال مسمومة القلب
وعيشة كاتوشوش مع خواتاتها وتقول الله يحفظ ويستر ...!!
سارة الاخت المتوسطة سهمها من سهم ختها نوارة الحقد والسم قالت بميوع :
سرها تستاهل حيت وافقت على راجل ماباغيهاش .. كون وطات في راي باها وبّا وختارت كرامتها ولا هاد الدل
عائشة نهضت في ختها باين عليها حقانية وماتبغي ظلم :
ايوا يا ختي عنداكي غير سعدك يطيحك في شي حد كفس من خوك محمد وديك الساعة نشوفو واش فمك يبقى سليط ولا يتقطع حسو .. 《بتحذير》 لي عيب يتبلى اسارة سدي فمك وخافي الله راكي زعما مخطوبة ..!!
سارة قلبت عيينها وعوجت فمها كاتشرب اتاي وتتنعم بالثقالة ماهمها لا في خوها ولا العروس غير السم ينطق
نوارة تشفى وتبرد حرقتها وحسدها :
شفتو كيف ملخها عصى العين منفوخة والفم معطوب عند بالها درقت الطبايع بالماكياج ودارت مزية
عائشة نهضت عليها :
كيفك كيف ختك ماتهناو حتى تجربو شي كية
نوارة دقت على الطبلة وبخوف قالت :
فال الله ولا فالك الله ينجينا
خديجة جلست بجنبهم بعدما هدات الاوضاع وشافت محمد كي الرعد طار لداره الفوقانية ... تنهدت تنهدية طويلة وقالت بحسرة :
زينها زين الوردة وسعدها سعد القردة
نوارة كاتعيب وزايدة فيه كاتضحك بالثقالة :
والعروسة طلعت قردة ..
خديجة عطاتها قرطاس بعينيها ماتحملش فعايل نوارة قلبها شين وعيبها يبان في لسانها :
القردة دارت دار ووليدات والراجل عليها يموت وموقرها ماعرت علاش ياحسرا لا زين يفتن ولا دراع حار تحنث به قومان ولا كلام حلو ينسي الهم .. دايعة كي الهايشة لا نقى لا طياب والدنيا عاطيااها بلا حساب.. هذا هو زهر القردة 《بسمت كاترمي المعنى لمولاتها .. ونوارة كون صابت تطرطق بغيضها كرزت على يديها وسنانها ما غير عمتها لي تعطيها القرطاااس》
عائشة بأسف على حال هاجر :
والله اعمتي غاضني الحال على العروسة .. خويا ما ديالت زواج ولا ولاد .. غير با الله يسمحلو داوى الجرح بالجرح
خديحة ناظرتها بعين الهم :
الله يا بنيتي الله كل شي بالمكتاب والعبد غير سباب
ماتعرفي ربي جابها رحمة ليه لعل وعسى تبدل فيه لي مابدلاتو أيام...!!
أنت تقرأ
جمرة الحلال
Romance❤️🔥من رواية "فلتغفري" لقصة "جمرة الحلال" ❤️🔥 بأسلوب مغاير .. فكرة مغايرة.. #بقلم hajar Lotus قصة من قاع الخابية...، حروفها مطروزين بالحكمة.. وبالميزان.. لعُشاق الكلام الفاخر .. تلقى فيها حكمة مدسوسة.. قصة صبر وحكمة و لا كلام فوق كل...
