جمرة الحلال

✨part 3✨

❤️‍🔥جمرة_الحلال❤️‍🔥《3》

لالة شامة رمات عينها على هاجر لي حادرة راسها عارفة راسها واخا تكلم و تشرح ماينفع مع شرح ولا كلام سبق ليها فهمتها انو طريقتها في الشرح تخلي الوليدات متشوقين ماينفروش الدرس وفي نفس الوقت ترسخ المعلومة في عقلهم ...، الفايدة ماشي في السبورة والعمود بل بالطريقة لي تقدمي بها الدرس..

لالة شامة رعدت يدها طادراها من مجلش الفوهاما على رأيها :

نوارة سيري قابلي خلطات الغلض والزواق اش فهمك في شي قراية ...

نوارة انسحبت للصالة تاركة وراها عجاجه ماعاجبها حال من رد أمها القبيح من نهار حطت هاجر رجلها في هاد الدار ورمقت زينها وهي تحس بالغيرة خصوصا أنو محجبة وملتزمة بالحجاب الشرعي واخا هاكداك تفتن...

لالة شامة كاتبسم وجها مبشور وفرحانة :

زيدي تشربي كويس اتاي

هاجر بامتناع لبق خبات الرزيق في جويب جلابيتها :

غير وقت ان شاء الله الالة شامة .. المغرب مابقالو والو يأذن خاصني نكون في الدار حيت باّ يبغيني ندخل للدار قبل مايظلم الحال

لالة شامة عطاتها نبسيمة الفخر مسحت على دراع هاجر بالهداوة :

هاكدا يكونوا بنات الناس المرضيات الله يرضي عليك

هاجر رجعت لتامها للوجه وتوادعت مع لالة شامة .. وخرجت من وسط داك الخير والتيساع كاتضربها ريحة الريحان والمحابق في كل مكان ..، في طريقها للباب الكبيرة، عطاتها ريحة عطر رجالي قوية تعودت تشمها مرة مرة وسط الدار، عطر قوي فواح باينة عليه غالي اصلي ماشي تقليد..، غرست راسها وسط كتيفاتها حانياه ماتشوفش بجنابها عيب وحشومة تهز راسها في أي رجل غريب..، حاسة بكيان ضخم الجسم داز بسرعة حداها خلا جلابيتها تطاير وترجع اللور الريح ساطت فيها .ما عبرها ما لقى سلام الله ... نتفزعت وهي تحسب خطاويها على رنة صوتو الغليضة كي الرعد حرش خشين زعزع حيوط الدار :

الوااليييدا