جمرة الحلال

{تسريب}

♥️《تسريــــــــــب حصري 》♥️
❤️‍🔥{جمـــــــــــرة الحــــلال}

القلب حين يعشق عِنوة ..  لن يخدل عشقه   وان رجمت شهابُ الكبرياء  صاحبه ثم  صبّت عليه أبابيل ماردة  من عدوان  الغرور  والتجاهل..، فتذوب تناقضاته بين حيرة الاستسلام وطغيان الكبرياء ..لن يمضي مُضي  عاصفة  عابرة، بل سيحطّم فيه ذلك  الغرور  ويختلي  بكبريائه  فيهشمه  لقاع  النّّخاع..!!  ليُبنى من جديد على شكل كومة عشق تنبض غراما بدون عقل .. انه سيد الأسياد .. إنه العشق المجنون.. (بقلــــــــمي)

الهراج  كثير والحس يهرس الراس  بين طبول  وزامر تعزف حتى يخرسها  الوقت.. وتبدا العايطة ثاني  تهذي  بالتعشاق بالصلاة  على الحبيب.. اللهم صلي عليك ارسول الله ..

ياك النفس بغات تفوّج وتمرح
ياك بغات تْسلطنْ وتسرحْ
يضرب فيها الضو
باش تّنفخ وتَفْشَح.. وشي يبان على شي باللباس وكثرة  الفيوش..

وسط قاعة أفراح  vip تعالات  زغاريد  النگافات وتعشاقهم بصواتهم  الفمخيمة
نّوار بيض مليوح  فوق البْساط  الحمر   عاطي  ريحو .. والجو بهيج  بريحة العود  الوهّاج طيبو..
الزرابي  لوانها  يفاجي .. وحس  الغاشي وكثرة الزينة  واللغى  المضنور  خلف  الجوق  وبواق الطرب و الملحون..

گلسة  الهمّة  والنخوة  والزغاريد الرنانة من كل قنت شاد بلاصتو كمولاس السلطان بديك الحُلة وديك الطلّة  ضارب لك حطة الأباطرة كساتو بدلة  ويليام ويستمانكوت ..، كحلة  تشعل  والسبّاط بيرلوتي  حليك كيف  دجاية الليل ..، تغطات  القاعة  بورود هطيلة كيف  عينيها لي مطرت وديان..

ــــــ بسطح الرياض ــــــ

بكات وغلب عليها  لْحزان..،وبالليل دموعها سالت ومطرت وديان، كابرت ايامها  وضحكت  بُهتان .. مخبية الضر وحر السم لي كلات دقتو  بعتبة  الحلال بلا برهان.. الخليل القاسي لبسها  تيجان الجمر تحطو فوق  راسها غارسين   جمرهم  بنواضر  قليبها  حتى حرق  فيها  الخاطر  والأمان .. تاج  المذلة  والإهانة تاج الشتيمة وقلة العفة والرجلة ..تاج الغدر عجرافي  قريب وبعيد .، توسدت  حرير الزربية  غطاها  سما  الليل  بنجومها  تنحب نحيب مخروس  ..، بكات حتى طابو لْجفان..، وشكون  عليها يسال  شكون ويقريها الأمان ؟! شكون بحر الدقة يحس  والصباح  عندها مابزغ نورو ولا ضوّات  شمسو..  دجاية الليل  كانت طويلة مابغات  تغفى  عليها الگمرة حتى وكان تخوّي من صدرها لْشجان.. اذا غمضت  عينها  في نعاسها  يفيقو النيران..، وإذا حلّت العين  وتوگض  على لْحزان...!!

ـــــــــ قاعة الافراح ــــــ

كلامي على
اللّي في قلبو جمرة حارّة من الشوق..، الكسدة  حاضرة  والعقل  غايب..، شواقو  هاجت هايم  سرحان .، لي شافو مايدرى  بضرّو..، كان معبس  شوفة  عينو حليكة..، خطوط  جبينو  مرسومة  بالغيار ..،  تحنى بمرافقو  على  فخاضو  كايغزل  في ديك  اللحية  والدهن  باين  ماهو  صافي وشلاّ مطارق  يدگ مهرازها في تخمامو..، جوديا  بطلة  العروس  مالت  عندو  ماعاجبها  حالو  همست  بصوت  مسموع  :

محمد نت  بخير؟!

جوابو صاغو  بعد دقايق طويلة  حتى فقدت  فيهم  امل  الجواب  .. سمعها  صوتو  المبحوح  الوافي جافي النبرة  كايهبش  في لحيتو  كيف المجدوب :

قوة  الهراااج  كايضرب في نواضر  راسي الصداع  بزاااف .. غانخرج..

ماخلاش ليها  فين تنطق  ولا تعاتبو وتمانع.  قادولها الطرحة مخبيين دمعة عينها لي بغات طيح ..، هادي  ليلتها ولازم  تفرح فيها  كيف بغات  .. تبعت  ليه العين  غادي  سارح وسط الغاشي كيف السكران مخرج  من جيبو  گاروه والبريكة مخلي لفام  تدوي  بشلا  حكايات...

لي حب وعف يجازيه  العالي..

نطقت شامة كاتداري  خروج وليدها  من القاعة  مخلي عروستو  مبرزة  وراه

ماشفنا  عفة امي كاتضحكي على راسك !!

نطقت  غيتة  بصوت  خافت ماسمعو  حد كون سمعتها  شامة  تبهدلها..!!

وقف على برااا  متكي  على حديدة فريع  "جينيسيس جي" مديكوريا بورود  بيضا  وشلا  شرايط ..، شعل گارٓوه كايشفط  النيكوتين  نهَامي، هاد الليلة  بالضبط ركبوا فيها الهْبال جمرة  عينيها على عينيه تحرق بْصارو..يعاندو  الشوق  عليها  عناد عدواني يهو●○دي مارحموش ولا وقرو في هاد الليلة.. مامفقهمش في داك  لي نامو عليه شعار وتغناو  به "بضاض ..
اسيدي العشق مسموم  ماتبراش  من سمو  واخا تنشف البحور  وطيح النجوم مْطيرة  مع الشتا..
  نفقهك ونقول
راه الحب ليه قبلة  ومحراب العاشق  تعيا  مادس شواقك  الهايجة..نار الغرام زاهراا   تشعل  في قليبك وغرورك  يجي ليه نهار  ويرجع  رماد...!!!

   تفتل بديك الكسدة مقابل   الطوموبيل   مايل    ورامي يديه  عليها..، نحرو  تحمّر كيف دجاج  عرسو..،  كاينفث  من فاهو دخّان..،  تخنق وزاد خناقو..،  شحال قدو يعاند ويزايد وما يعياش
جمرة  غرامو ليها  من نار كافرة ما تطفاش...

ــــــــبسطح الرياض ــــــــ

ضو الفجر تسلل ووجع المخاض  كيف لاسيران يفيقها ..، ضربة  من جنينها  خلاّتها  تطلق  صرخة خافتة  .، وقفت   خميلة  الشعر  كاتصارع  السم لي بداها مجهد قميصهاا  لاصق على لحمها عازل ليها اخير الردف ولوراك  تمشات جهة باب السطح، جامعاا  كريشتها  بيديها  حاسّة  بالوجع  يزوي.. خطاويها لعثامية..  نطقت  بصوت  خافت  حاسّة بالجهد  مشاليها  غير من بكى الليلة  وحر الغبينة... :

خالتي  خديــــــجة

كيف واعدتكم تسريب  طويل عريض لجبيبات  قلبي ♥️❤️‍🔥 حمسوني نعطي كثر ومازال المسكّي  جاااي❤️‍🔥😌