《جمرة الحلال 》♡19♡
تخطف فيها اللون .. واللتام حابس عليها الهوا.. دارت عند مول الصوت دورة سريعة والعين جات فالعين ..، الحقد مع قلة الحيلة..،ديك النظرة شافتها مرة وهادي الثانية، نظرة توقف زغب القلب، وتزعزع الخاطر ...، جاي بقدام حافية طويل القامة وعريض الكتاف الصدر عريان مبندر شعرو كثيف .، الحزام محلول والسروال نازل على الخصر، مع وصل عندها كان قلبها واصل لحلقها .. تبنجت والشفاه محلولين ماحست غير بيدو نترت داك اللتام نترة مسمومة قصحتها خلا وجهها الفتان عريان ..، كلو عرقان.. الدموع تيار واللون حمر والنظرة جمر تحرق كل من شاف وركز .. شفارها الوافيين كيف السنابل على جفونها مايلة، ولون العين العسلية تحقنت بلون الدم .. قبل ما تمتم ولا يتسمع لغاها حست بسائل ريحتو قوية هوادة كيف الشلال فوق راسها... وحديثه المسموم هواد على قلبها كيف الما طايب يذوب عروقه :
الحلال سامط.. نحليوه بالويسكي..!!!
فمها مسدودو وعينيها تسدو و ماء الحياة تسرب لجسمها من الراس للرجل.. ريحتو كيف الخنز وقلبها للحظة ماتسمعت دقاته...!!!
..عينيه فايضين بالحقد و السكرا مغيباه..، وباين عليه كامي جوان صحيح وضارب سطر بيض ...، كيف الثور يلهث، وعروق عنقه مورمة تقول ساطهم .. قبل ماتحل دوك العينين القتالين بزينهم تنفضت من مكانها بحال الكميشا جارها من صدرها ويدو عاصرة على نهودها طلقت صرخة من جوفها وطعم مرورة الشمبانيا وصل للسانها ... صوتها العذب تعالا في المراح .. وقاصح القلب معمي البصيرة ولا على بالو ملامحه باردة جامدة والعينين فايضين بالغدر... جارها كيف شي قنية مغلوب على أمرها... تنادي وتصيح
"طلق مني ... الله يهديك .. ساعة الشيطان بدلها سي محمد.. "
كلامها تقال بنبرة باحة من الألم .. هنا عرفت راسها وطات على عتبة ابليس باقدام الحلال... وهاد بنادم على الشر عوال.... وياخوفها من لي جاي.. طاحت وناضت بالنتير ونهدها حاساه معصور بين يدو ماقال هادي بنية ضعيفة لا حول لها ولا قوة ولا قال نتاقى فيها وجه الله ... هي الذبيحة وهو قتالها.. حسو مقطوع من غير زمجراته الغليضة .. يدها الرقيقة على يدو الخشينة محطوطة تعافر تفك راسها منو ولكن فين صحتها من صحتو... هو قلدة وصحة .. مفزوعة الشوفة كتناظر في ظهرو العريان وتترجاه يهدا ويلعن الشيطان.. خلطت اسمه واسم بوه ماخلات بسي محمد ولا خويا .. مرة تتترجى وتقول وحق الميمة العزيزة عندك شوف من حالي وبدل ساعة بأخرى.. وصل بها لخيمته مافك نهدها حتى حست بالروح غاتزهق .. رماها كيف الجيفة على السرير واقف ثابت بحالا ماظلم ولا حكر بنت مغلوب على أمرها... وهي على السرير مرمية كيف وردة مكمشة .. النفس تقطع فيها ناضت هاربة في كوان بعيد عليه ويدها على نهدها والألم يزوي فيها..
حيد السروال بحركة وحدة منو خلا شرويطة قصيرة ساترة العورة...، اليد هازة القرعة تروي العطش واليد الاخرى رافعها ليها وصبعو يشالي عطاها الكلام بأمر وعينيه ماناويينش على خير فزعها بصوتو المريض حاسة راسها مع مخبول ماشي راجل معقول..
قربي 《مسح فمو بظهر يدو كايطلع فيها ويهبط يعبر فيها ساترة راسها بالشراوط حتى حاجة ماباينة وسط داك العرام د التوب نهض عليها بزمجرة وقفت زغب لحمها 》
حيدي علياااا الشراااوط .. بغييييت نشوف اللحم .. واش ديال الح*وا ولا تقولبت !!
#يتبع
أنت تقرأ
جمرة الحلال
Romance❤️🔥من رواية "فلتغفري" لقصة "جمرة الحلال" ❤️🔥 بأسلوب مغاير .. فكرة مغايرة.. #بقلم hajar Lotus قصة من قاع الخابية...، حروفها مطروزين بالحكمة.. وبالميزان.. لعُشاق الكلام الفاخر .. تلقى فيها حكمة مدسوسة.. قصة صبر وحكمة و لا كلام فوق كل...
