《جمرة الحلال》💥 22💥
غسلت ذاتها مرفوعة .. حريق شدها بين فخاضها خلاه تسيل دمعة والما هواد على لحمها.. تكتم الشهقة وتداوي الحال بالصبر.. حتى صلاة الفجر غفلت عليه.. البال لي يخمم شغلو العذاب لي عاشت..، غسلت جنابتها واخا ماتمتعت ما حست بحلاوة ليلة الدخلة.. تحمد مولاها لي روحها ماتزهقتش وهي تحت منو ولا يبهدلها ويخرجها عريانة يقولهم العروسة ماشي عزبة .. كاع الهواجس الشيطانية مرو عليها وهي تحت منو تقاسي بطشو مع كل تنخصيصة يسكتها بدقة .. ماهمو ضعفها ولا رغيبها .. همجي كان في الفراش و عوال يزيد يضيق خاطرها بافعالو.. هذا هو عاصي ربو..، طاغي كيف سمعت عليه من فام العباد وكذبت وقالت الناس هضارة واللسان مافيه عظم ..، ياما قالوا عليه بزناس والشوفة فيه تخلع رجليه مايعرفو جامع ولا مجمع خير .. وزواجها به ابتلاء من ربي...!!
خرجت من الحمام مرفوعة مهمومة الخد حمر والسالف بالما يتقطر.. رموش العينين لاصقين والسر طايح عليها واخا وهي في عز الهم.. ساترة لحمها بثوب الحمام الخاص بالعروسة خيوطه ذهبية وفخم لايق بها.. منحوتة القلدة .. تعرضت لها لالة شامة هازة بيدها قفطان جوهرة في الابيض هماوي وخياطتو ثمينة، كاتناظرها باعجاب وتبارك متحمسة وعلى النار واقفة باغيا تشوف عروستها لابساه :
تبارك الله على زينة البنات..!! نشفي شعرك وستري المارات بالماكياج..، كل لي تحتاجيه راه لهيه قاداتولك سعاد .. 《شارت بصبعها لوراها، كومودينو كبير فيه مراية قد السخط . كاع مستلزمات التجميل مستفين وداك الشي كثير وبالنسبة لهاجر ماليه داعي.. نهات حديثها كتآمر فيها مادايرا بحساب همها ولا حالتها》 سربي خلاص...، كوني خفيفة ماعنديش مع الثقيلات..!!! 《دفعتها لبيت اخرى قدها قداش تشعلو ضواوها وبان لي فيها من خيورات فيها ثياب محمد كل خزنة فيها الغراق من كساويه الرسمية لثيابو الرياضية والاحذية على الجهد ...، شامة حطت لها كل ماتحتاج من الثياب وقبل ماتخرج نبهتها والخامة د الجدية حاضرة في صوتها :
حالك المضيوم سرطيه.. نبغي الضحكة والراس مرفوع .. لي طرا وجرا ابنت الفقيه يبقى سر تحت غطا فراش تاج راسك 《قصدها محمد 》
هاجر ضمت صدرها بيديها مهدودة تمتمت تحت فهما بالحس :
لا حولولاقوة الا بالله العلي العظيم..!!
لالة شامة قربت لوجهها وشوفاتها تخلغ سمعت اش قالت وماعجبها حال بتهديد بارد باشرت الحديث:
لاتقولي قطعت الواد ونشوف رجليا يا بنت الفقيه ابراهيم...، حسك مايتسمعش وصبرك مايتقاضاش..، الا دواات عكوزتك قولي سمعا وطاعة والا دوا راجلك نفذي بلا ما تقولي واخا...، اتقي شر راجلك.. ولدي ونعرفو مزيان يقبرك في ارضك اذا حاولتي تمسي كرامة ناسو .. السر يبقى ميت وسط رحبة الدار الكبيرة.. اذا سولوك ومرادهم في خبار ليلتك كيف صبحت قولي لهم الزواج سترة وغطا وداك الشي ماشي ديال التعاويد.. 《هزت صبعها كاتشالي》 واياك يغويك الشيطان وتغلطي بحرف.. راك شفتي شويا من وجهو القبيح.. ونبغي نذكرك انو العيب تهزو المراة وحدها والراجل ماعليه ذنب.. وزني الكلام وفكري في باك قبل ماتفكري في راسك لا تصدقي سيرة على كل لسان خلي راس باك مرفوع وخبي جراحك هنا 《حطت صبعها على صدر هاجر》 عرفتك رزينة وحكيمة و دابا جا الوقت لي تحضري فيه الحكمة !!
رمات كلامها لي كان كيف الملح على الجرح .. وزادت خارجة تاركة وراها هاجر كيف الامانة ماعارفة راسها فين تحطت حتى من شامة زادتها من الكية كيتين ..
البكا والنحيب والحسرة ماعندهم باش ينفعو.. وصلت لهاد الموصل الكحل في وجه باها وهاهي تخلص ولازمها تتحمل مايهونش عليها تمس بوها بأذية..، واذا شكات وبكات هي المضرورة..!
مسحت دمعتها وكتمت شهقتها تنفست وقالت نستحمل ..، ربي كبير وهي بين يدين الرحمن.. حقها يبان يبان..!!! والمظلوم ربي ينصفو والظالم ربي يخلصو ..!!
#يتبع
أنت تقرأ
جمرة الحلال
Storie d'amore❤️🔥من رواية "فلتغفري" لقصة "جمرة الحلال" ❤️🔥 بأسلوب مغاير .. فكرة مغايرة.. #بقلم hajar Lotus قصة من قاع الخابية...، حروفها مطروزين بالحكمة.. وبالميزان.. لعُشاق الكلام الفاخر .. تلقى فيها حكمة مدسوسة.. قصة صبر وحكمة و لا كلام فوق كل...
