جمرة الحلال

✨part 6✨

جمرة الحلال 《6》

كل دار ليها حكاية وخبيرة.. حروفها مدسوسة بحيطانها .. ولغاها مقسم بين المستور والمكشوف .. ولي دار بكلام ناس زمان لما قالوا "دباز الحباب من العتبة للباب" كسب السترة والهيبة بين العباد...، الخصام ساعته تفوت وفضيحته ماتموت..، دار الفقيه ابراهيم حكايتها تكتبو حروفها بحبر الستر والحشمة نساها شادين وقرهم ولغاهم مايفوت الباب ولا نحسنو الكلام  ونقولو ربي الستار .. مولات خيمته الاولانية  يامنة المرأة الصبارة شانها عالي عند الفقيه ابراهيم شاء رب العباد يحرمها من نعمة الولاد ..  ولا نحسنوا الكلام ونقولو رفع عليها بلا  ربي وحدو عارف بلاه .، بيدها خطبت لمولا دارها ودخلت لخيمتها ضرة ماشي مضرارة كانت ونعم النساء ..، عاشت معهم شهور قليلة كملوا ايامها من بعد ما بداو  ايام هاجر .. خلاتها لحيمة رهيفة رباتها يامنة المحرومة من الولاد...، من بعد عام الفقيه ابراهيم زاد على مرتو الاولى" الضرة لي هي ربيعة  بغا يدير مزيا في واحد الولية و صدقت حية بفعايلها مع يامنة وهاجر..  ولد معها   "أمينة" و "أبو بكر" ...،

الفقيه إبراهيم ربى وليداتو على طاعة الرحمن، فقهم في الدين على سن صغير  باش يكبروا واعيين فاهمين كاين لي نفعاتو  حكمة التربية وكاين لي عوجاتو فهامتو والمثال يليق على اخت هاجر من باها أمينة  صغر منها بعامين وعقلها خدام مع الشياطن...، خفيفة وعلى الرزانة والثباتة كفيفة، عكس خوها الكبير ابو بكر شاب ملتزم وخدا مايفيدو وينفعوا من تربية الفقيه ابراهيم...، كبروا في جو القرآن والذكر.. جو النية والوقر وشد بابك وماتعتب بيبان الناس...، عارك يستروا مولاك ويندفن في دارك...، قول الحق ونهى على الباطل..، فكر في غيرك قبل راسك..، وارضى بلي قسم لك مولاك وماتكبر كرشك لي ماهو ليك غير يعييك ...و لي يزرع الريح يحصد غبارو وما يبقى فالواد غير حجارو..، احترم الكبير وحذر عينيك ..، الكلام واللغو  الا وصلك يوقف عندك ما تنمم ماتاكل لحم عباد الله وتصدق واكلك الندم.. ولي هضرلك على عرض فلان قولو اليوم ليك وغدوا عليك،  كلنا لحم خانز... فقهم الصبر واخا باب الصبر ماعليه زحام...، الحاصول الفقيه ابراهيم  لابس سلهام وعمامة وماشي قليل فهامة..