جمرة الحلال

✨تتمة الجزء✨

❤️‍🔥جمرة الحلال❤️‍🔥 《تتمة_الجزء》

محمد بصوت نعسان غاطس في الوسادة : حاشاك الحنانة، غانحيدهم بوحدي..

لالة شامة مبسمة براحة تحيد ليه الفردة الاخرى :

راحتك من راحتي ابني حبيبي ... 《قربت من النافذة حاملة جهاز تحكم كبست على الرز ونزل ريدو النوافذ بشكل اوتوماتيكي ، باش يرتاح في نومه .. وكبست على رز كل شي الاضواء رجعوا ضعاف خافتين... قربت عندو كاتسمح في شعره الأسود الكثيف سرعان ماغفى على لمساتها الحنينة...تنهدت براحة وعينيها تعتليهم لمعة الفخر والحب لابنها حبيبها همست بين شفاهها :

الحبيب د شامة امتا كبرتي 《نرلت يدها للحية الكثيفة وشحال زوين وهو ناعس حروفو خشينة وزينو عربي اصيل ..، تبسمت وقلبها يرفرف جات في بالها كيف الحمامة بعيونها الغجرية الكبيرة، كل شي فيها يسحر العين والراجل يعشق الزين والحشمة والحداكة، صفات لقاتهم في بنت الفقيه الحاج ابراهيم، من غيرها هاجر ديك البنوتة الحلوة دخلت لخاطرها من النهار الاول خطات قدامها هاد الدار.. كسبت محبة الصغار واخا لتامها على وجهها وصوتها كايتسمع غير بالعبار مدة ربع اشهر كانت كافية وموفية باش تجزم انو عتب الحلال هي بنت الفقيه شافت فيها صفات نادرا ماتلقاهم في بنات اليوم، رشمتها في خيالها لوليدها شحال وهي بقربو تخطط وتفصل
همست بالحس اسم "هاجر"

محمد حرك حواجبه الكثافه ورجع رخف الغوباشة ناعس مرتاح مخرج النفس بالثقالة غاطس في بحر الراحة....!!! خرجت تنهيدة من الجوف باغياه يتبت غرسو ويدير ولادو واخا فكرة الزواج خارجة من عقلو ...!!!

خلاتو غارق في نومه جامعة قفطانها وسط يدها وفي بالها سمية هاجر كاترددها بالحس كأنها لقات حل أحجيتها "هاجر.. هاجر... هاجر.. هاجر.." هي واللاهيلا هي لي تناسب سي محمد الولد كبر وهذا وقته فين يثبت غرسه ونشوف وليداته...!!!

على بعد خطوات قريبة من دار الحاج جلال الرجل الحقاني مول الخير الوافي والبزارات الكثيرة...، من محلات الذهب ومحلات الثوب الرفيع لمحلات الخزف الغالي.. بالرغم من خيره الكثير لي نعم عليه الله أبا عن جد الا أنو الرابطة متينة مع الحارة الشعبية رزقه يخوله يسكن في الفيلات والرياض الباهي الشاسع.. لكن الحاج جلال منذ نعومة اظافره والديه زرعوا فيه حب البساطة والتواضع وحب حارات فاس لي ناسها كلهم خير ونعمة لانو عارفين مزيان انو عشرة الناس البسطاء تخليك ديمة بسيط وقريب من الله والعيشة وسط فلان بن فلان يخلق الفتان والانسلاخ على القيم...، راحتهم بين البسطاء كبروا وسط الحارة وعمروها سنين طويلة ابن يورث لابنه هاد القاعدة ماتفرط في صنعة جدودك ولا الدار لي كبروا فيها.. هادي قاعدة مفروغ منها ولابد تُطبق...!!! تبع حرفة بوك لا يغلبوك...!!

مع فتحت باب الدار حيوطها راشية كلها مقشرة وباين عليها قديمة سورها ماهو شاهق ما قصير .. دويرة على قد الحال، عطات ريحة الشفنج واتاي منعنع ..، رمات خطواتها في الارض المزلجة بزليج تقليدي قديم، لقات السلام بصوت منخفض مسموع، تلقات ليها مرات باها يامنة لي رباتها بعد موت أمها مراة كبيرة وافية القلدة وقصيرة القامة خدا منها الزمان وهمو، ثيابها من سهم البسطاء الدراوش مرقع كلو طبايع جافيل وزيف حياتي بالي ... نطقت بصوت رخو حتى هو خدا منو الزمان بحة الثبات :

عليكم السلام ابنيتي ...، باك يلاه خرج وسول فيك

هاجر هزت سباطها حطاتو في خزينة مهترئة خاصة بالأحذية :

نسيت راسي مع الوليدات كاع مارديت البال للوقت

قبل ماتتكلم يامنة تسمع صوتها الخشين :

اتبارك الله على مولات اللتام لي ماعليها حكام ...، خارجة من دار الحاج جلال والمغرب يأذن ولا الحكام غير على أمينة بنتي لي دايما محضية على الصغيرة والكبيرة

#يتبع