《جمرة الحلال 》 ♡31♡
تسرباو البساطل بالدجاج شي طايح ياكل بحالا عمرو ذاق النعمة وشي منفخ كايشوف بنص عين ماعاجبهم مقام دار الفقيه ..، نوارة غاطسة في ودن ختها عائشة كاتوشوش والمقصود باين قمقوم عينيها على ربيعة لي طاحت عميا في الخير وتاكل وتزيد بحالا عمرها ذاقت الخير واخا الفقيه مشبعهم... والخير ياسر لكن اللهفة في القلب...
ياختي معامن تناسبنا بّا ماعرف يختار خلا الناس الكبار وطيحنا في المزاليط مايناسبوا ماقامنا ولا يعليوا الراي... شوفي شوفي مرات باها كيف كتاكل
غيتة البنت الصغبرة واخا قلبها بيض الا انو متأثرة بختها نوارة و فعايلها تبغي تحشم وتكون كيف الزبدة لكن ختها تقريها وتقصحها واخا تبغي الدار عامرة وتستانس مع الغريب الا انو ربيعة عيفتها خلاتها تهز من مكانها وتمشي للكوزينة تاكل ..
يامنة عيات ماتنغز في ربيعة وتقول واش شبعت الكرش والقلب تاكل حقها وحق غيرها..
يامنة شافت شوفات صحاب الدار لربيعة وهي توقفلها النعمة في الحلق دوزت الحشومة بجغيمة الما وربعت يديها حانية الراس.. امينة بنتها قربت من مها ودوات مكرهة وزعفانة :
امي حبسي الشوهة فرجتي فينا العادي والبادي حبسي الماكلة امي حبسي اويلي
ربيعة كعدت راسها فمها عامر مافيها صواب ولا ثقالة
لالة شامة خسرت صيفتها أكره ماتكره في بنادم هو الماكلة كيف الهوايش وربيعة طلعت لها الزعاف من كمارها ماحملتها ماحملت بنتها الخفيفة...!!
ربيعة وعات على الكارثة ومسحت فمها كيف البريهيشة وتسمرت كاتفرنس فيهم وحدا وحدا
لالة شامة قلبها مال ليامنة باين فيها مراة تقية ورزينة شابعة وقانعة ومعرفتها بها قديمة واخا ماشي معرفة الحباب غير من البعيد والسلام ..، قربت منها كاتعرض :
زيدي الحاجة كوولي ماكليتي والو الدار دارك بنتك
ربيعة سمها نطقها واخا تحت فمها لالة شامة سمعتها:
من امتا العاكرة دارت البنات..!!
لالة شامة عطاتها شوفات قرطاس وبالبارد دوات :
البنت تشبه لمها..، وانا شفت يامنة ورزانتها عرفت تربية هاجر. منين جات تبارك الله والصلا على النبي الحمد لله الكرش لي ماولدتها عرفت تربي ..!!!
ربيعة مصمصت شنايفها والقمعة وصلتها سخونة تعطب حدها شافت في امينة لي فهمت المعنى وقلبت عينيها ...!!
في هاد الأثناء كان الحاج جلال واقف عند الدروج صوته الخشين يلغة بسمية ولدو عيب عليه يخلي نسابو ويشد البيت مع مراته مانزل مادار صواب :
محمد !!! محمد
كان نازل مولاي السلطان بهبته وهاد المرة ضربليك سروال توب كحل ثوبه يلمع مع شوميز بيضا مطرطقة على خيره وريحتو سابقاه قلبت الرحبة جاوب باه بخشونية صوته وصل لغاها للنسا والرجال :
هااا انا الولييد !!
جلال شالا بسلهامه مازال نيفو الفوق وعينيه فيه شداد مافيهمش اللين :
فين هي مراااتك
محمد وصل عندو شعرو مبلل باين فيه غسل جنابتو هذا مايقولو عليه وهو عريس جديد قبل راس باه عاقد غوباشته وماعاجبو حال وبروطوكل الحبس لي فارضين عليه نطق نافر من جوابه :
ورايا
#يتبع
أنت تقرأ
جمرة الحلال
Romance❤️🔥من رواية "فلتغفري" لقصة "جمرة الحلال" ❤️🔥 بأسلوب مغاير .. فكرة مغايرة.. #بقلم hajar Lotus قصة من قاع الخابية...، حروفها مطروزين بالحكمة.. وبالميزان.. لعُشاق الكلام الفاخر .. تلقى فيها حكمة مدسوسة.. قصة صبر وحكمة و لا كلام فوق كل...
