جمرة الحلال

✨part17✨

《جمرة الحلال 》 ♡17♡

مبلغ الصداق لي تفاهمتو عليه؟

عشرين مليون..!!!

تبارك الله .. الله يجعلها قدام الربح عليكم .. بالرفاه والبنين...!!

الله يجعل كل شي مبارك مسعود

اللهم امين

تعالت الزغاريد النسوية بدار الفقيه..، الجيران مجموعين على خيورات ربي ..، هالبساطل وكل طبلة فيها خروف مشوي..، ها الحلاوي والعواصر بالاشكال ..، وداك الشي هماوي وكثير...!! الصبيان فرحانين ..، والعزبات قرحانين حتى هوما مساكينات مادات يديهم للحنا وباغيات سعدهم يتسكم..، يامنة وربيعة لابسات افخم القفاطن، كل وحدة وهمها يامنة ساهية ووجها مهموم ماباين عليها الفرح..وربيعة جاتها الوجيبة فين تبان..، كاتشالي بيديها ودمليج الفضة الحر وسط المعصم بحالا تكسات بالذهب والجوهر الحر، حتى حد مامعبرها كلها لاهي في كرشه ..، يامنة لابسة قفطان بيض ومحزما بطابليا واخا لي طخيطوغ مكلفات بكل شي الا أنها كيف سبقلي ذكرت حارة وماترضى تكلس بلا شقا ، تابعة هذا وذاك وتسول الحضور الا خاصاهم شي حاجة.. غير تبعد في شي ركنة معزولة تذرف الدموع وتقطرهم على خدودها دمعة ورا دمعة... مغبونة وقلبها نارو كادية...
بنت ربيعة أمينة شابة حسناء خمرية ملامحها زينين ووافية كيف مها..، ورثت منها الخفة والطيران.. لابسة قفطان اخضر وشال لايحاه على سالفها الكحل وجها مزيناه بالكحل الحر والفم معكراه ..زينها خلا شحال من مراة تنتبه لها ولكن خفتها تخلي أي وحدة شافتها حلال لولدها تتراجع ودير بناقص.. النسا يبغيوا الرزانة والثباتة...،والا خيرو غير الزين بلا عقل
فراحت خيمة الراجل خلا ...
يامنة قربت من امينة غير بالحس كاتفرق تبسيمات باهتة وعينيها على الحضور تدور،، ونطقت شادة على دراع أمينة هاد البنت كون صابت طير بلا جنحين بكثر التحراك والضحك الباسل المايع لي ماليه لزوم :

خفيف الاقدام يتعاف ولو كان وجهو مرايا... ديري عقلك ابنت ربيعة وثقلي ورزني ماتعرفي سعدك يكون بين الحاضرين.. شحال من وحدة حاطة عليك العين ولكن خفتك مضيعاك !!ماتهربيش رزقك بيديك .. ثقلي ابنيتي ثقلي.. !!

امينة حنحنت ماعاجبها كلام مرات باها نفضت كتافها كيف الهبيلة وسارت لمكان بعيد عليها عاجبها زينها واخا النصيحة ماسمعت كلام المهم لي في راسها هو لي يتنفذ...
النسا وسط الدار ناشطات بالدف والصلاة على النبي والرجال على برا وسط خيمة شدت الحارة من القنت للقنت...، اصوات الحاضرين وريحة الطياب..، صوت الصبيات ولغاهم .. صوت الرجال وهوما يقراو مجموعين ماتيسر من الذكر .. هاد التفاصيل ماخطات حتى دار مغربية تعشق بلادها وارض جدوها..!! ومحافظة على العادات والتقاليد ومتشبتة بالاصالة والطقوس الهماوية...!!

#يتبع