❤️🔥من رواية "فلتغفري" لقصة "جمرة الحلال" ❤️🔥
بأسلوب مغاير .. فكرة مغايرة..
#بقلم hajar Lotus
قصة من قاع الخابية...، حروفها مطروزين بالحكمة.. وبالميزان.. لعُشاق الكلام الفاخر .. تلقى فيها حكمة مدسوسة.. قصة صبر وحكمة و
لا كلام فوق كل...
وقفت حدا المرايا والثوب الأبيض جوهرة شحال واتاها.. تفتن والعين تعشقها..، لكن الرزق قليل وطاحت فيه ذبانة هادي عليها...!! سترت لي يتستر .. غطات الجروح البادية من الفم للعين .. كحلت العين بكحل حر وتزينت واخا الزينة عندها حرام وماليها ميزان..، شوية شوية من الزينة بلا خاطر ولا شهوة خبات الجروح، ولكن جروح القلب كيف تخبيهم..!!
جات تشالي عاوتاني.. هازة بين يديها طقم ذهب وازن .. وسرتلة كل يد تهز عشرة..!!
"تبارك الله ماشاء الله.. دوري عندي نروي جوف الشوف ونفرح عيني بعروستي زينة البنات 《دورتها بحال شي كاس .. تعبر وتقيس بعينيها.. وهزت يديها تكسيها بالذهب .. السلسلة مضفورة وازنة وتعمر العين .. حلق اللويز كل حلقة تبرق ..، الحاصول ومافيه ملاين صحيحة محطوطة في ذهبها ...!!! مشطت ليها السالف و القمرة ضوات النهار...
"ماشاء الله ماشاء الله... سي محمد. خذا الزين كلو ...!! لاحت ليها شال مذهب على شعرها .. وعطاتها شربيل صفر ختمتها برشة من مسك العود الاصيل .. وزادت بها تنبه وتعاود :
شويا ويوصلو حبابك .. بلا مانوصي .. واياك تخرجي كلمة ولو بالغلط.. وزني كلامك .. غايجي محمد يتغدا معنا ..!!
سمعت سيرته وقلبها تهز، كاتحرك بالثقالة ونازلة كيف السلطانة سرقت عيون الحاضرين من لويساتها والعمة للخدامة سعاد..!!
تعالات الزغاريد بين النسا شي فرحان شي نافخ ريشو وماعاجبو حال شي مضيوم على حال زينة السعد ..
العمة خديجة عينيها دمعوا ماخفى عليها حزن البنية..، حسبنت في خاطرها وهي تناظر غزالة تفتن وسعدها شين في مفلس قلبو قاصح مايعرف طريق ربي ..!!
كلست وسط رحبة الدار دايرين بها وطابلة الفطور مجهزة بالخير الكثير...!!
نوارة عينيها وساعو قلبها حقد على الوردة لي تفتحت وبان زينها المضوي..، ماحسبتها غاتدخل عروسة للدار..وتاخد البلاص الكبيرة..!!
مرحبا بعروستنا الغزالة..، الله يجعل قدامك قدام الربح ونشوفو وليدات محمد يلعبوا مع وليداتنا
هاجر بسمت تبسيمة خارجة بلا خاطر راسهه حايناه مع همها
العمة خديحة قربت وجلست حداها كاتسمح على ظهرها وقببل ماتسول شامة قاطعت حديثها عارفة المراد من السؤال :
خليوا البنت تفطر .. مازال ماولفت علينا
غيتة البنت الصغيرة لشامة سمرة حروفها يديوا لمحمد زينة وباين عليها هبيلة :
ياااا حليلي بعروسة خوويا غانكون انا وياك صحابات
نغزتها نوارة والكلام من تحت سنينها باينة عليها مسمومة:
ثقلي يا هاد الهبيلة ..!!
شامة كاتآمر في سعاد لي واقفة عليهم كيف الغراب عينيها على زينة السعد:
سعاااد كبي أتاي .. !!
وداك الشي لي كان .. الكلام بينهم يدوور شي يناظر فيها و شي يستفسر وهي وسطهم كيف البكمة تهز الكاس بحالا هازة الجمر لا تمذفت مذاق النعناع ولا حست بطعم حلاوة كعب غزال .. الشراتل في يديها كيف غلال السجين..، هذا ماجا في بالها أنها سجينة في قفص الهم والغبينة... ! سولو فيها وعاودو جبدو معها الكلام واللغى وهي بكمة صما.. لا لسان يشرك معهم حديث ولا عين تشوف اش ظامر كل واحد فيهم بقلبو عليها...!!
ماخرجهاا من بحر السهو الا صوتوو هو من غيرو عاصي الله .. ماهزت عينها فيه ولا قادت الجلسة حدها حطت الكاس من يدها وشابكت صباعها
صوتو خشين قاصح فيه من النفاخة قنطار وماقاداتو ارض :
الوليدة !!
لالة شامة ناضت من مكانها غاديا عندو والتبسيمة شادة في وجهها بلاص كبير طلقت زغرودة من قلبها و عطاتو الجواب بصوت حنين فرحان :
الحبيييب د شامة .. مرحبا بمولاي السلطان.. تعالى فطر مع عروستك...!! #محمد
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
