♥تتمة ️الپـــــــارت
تاسيلي خطفها خيل النعاس بسهوة ولكن لسانها كان نطاق واخا مسهوتة :
المارشال مسكين طاحت قيمتو فاش رسمتو بلا شوارب 《موسطاش》 مگود الحمير ولابس حايك النسا.. مارضاش وحبو في مولات الفن لفنها عاد كره ومْذلّة.. وكنت كانمشي لبيوت الدعارة ندير خير. في البنات لي تماك يسترزقو بلي قسم الله بدوك اللوحات.. وفي نفس الوقت نلهّي داك ابو كافر ونمحي الآثار.. حتى لواحد النهار..
تخرس حسها ونطق النعاس بنغامو "بشخيرها"
خلات وراها هاجر واصلة لكرمة الكرموس فين جات تقطف يبست الكرمة وجحدت على الخير .. مع فطنت بلي الخبير ماغايساليش الليلة طلت عليها بعويناتها البهية .. ترتي ليلها في ضريح الظلام حست بالوحدة ملكتها والسكات عدوها عندو معها حساب.. غطاتها بالهداا حاضية لا تفيق... تاسيلي فوق السرير منشورة.. وهي توسدت وسادتها فوق اللحاف على الارض غير جفى حديث الفّام وجف حبر الكلام توگض الليل بهمو وحتى هو عندو مقَال وشلا مايتقال كلامو حار رْديل ماتقدر تخرسوا الوحدانية
نسايمو كيف الكافور المر يخنق بريحو ويزيد في الاسقام .. غير الليل يسرح سوالفو على كتاف الصباح يثور هياج غمام الهم .. غمضة العين سافرت بها لارض قحيلة، غصون شجارها يابسة ..، خرجت تنهيدة من جوف صدرها المزموت والزمان الغلاّب رحلها لمكان مضى الذيب فيه نيابو
⌛️قبل سنتين ⌛️
مگودها كيف البهيمة مرادو فيها واضح يهينها ويفدي فيها دقاتو المريضة..، نهضت عليه بصوت باكي رشّاه الهم :
ماعندي فيييين نزل سير نت بوحدك دير الصواب مع ناسك وعزمهم لفرحك علاش انا شنو دوري؟!
كبل معصمهاا جافي النبرة جرها جرة الحلالف حتى لمست قداها عتبة فرد من عائلتو ..، خنقهاا من خصرها حتى وقفت حداه ناهض عليها نهضة شرانية وشوفاتو يابسين على المحنّة :
سدّيه ولااا غاااانبوشيهلك بز***بي !!!
غيرت شوفاتها لغير مكان كاتلعن فيه من تحت لسانها وتحسبن..
كرامتها وشوفات الناااس فيهاا كيف الخنجر يهشم بروحهااا مايمكنش شحال قلبو حار وشحال عتبة الحلال قاسية ومُرّة معه ذليلة وناويها تركع ليه وتساير قباحتو..، دق الباب ودار صوابو مع ناسو الباب الاولى كانت مولاتو مراة كبيرة من حريم عمو لي استقبلاتو بالحفاوة .. هو يتكلم وهي خرسانة على القول خلاتو يدير الصواب وحدووو... الباب الثانية بدا اللسان يتسرح قوات داك القلب واخا شوفاتهم كانت كيف السم مقطر على كرامتها اش يقولو مسكينة حبلا في شهرها وجابها الراجل تعرض لعرسو ماراعى لحالتها ولا ليهااا كامراة عندهاا قلب كان قولهم قابع في العين لي جهرت بحديث قاسي عليها ..!!! دارت الصواب ودارت فيها غشيمة ماتفهم في منطوق الشوفات . قالوها ناس زمان كريم القوم يتهان..!!!
داك الشهر كان
كيف نهيق الغراب وغيام السحاب ..، كومتو في الهم كانت ثقيلة هزتها على الكتاف حتى نهش عظام صبرها بفتيلة الجمرة...، شي عرس شي تهرس ..!!!
أنت تقرأ
جمرة الحلال
Romance❤️🔥من رواية "فلتغفري" لقصة "جمرة الحلال" ❤️🔥 بأسلوب مغاير .. فكرة مغايرة.. #بقلم hajar Lotus قصة من قاع الخابية...، حروفها مطروزين بالحكمة.. وبالميزان.. لعُشاق الكلام الفاخر .. تلقى فيها حكمة مدسوسة.. قصة صبر وحكمة و لا كلام فوق كل...
