جمرة الحلال

✨part 10✨

《جمرة الحلال 》 💥10💥

هو الراعي ولازم يضبط رعيته...!!!  وصلوه خبار من ناس كلفهم يراقبوا ولدو محمد، ولقاو لي مايعجب مايسر، وسط حياة الليل والسهر والشراب، شاف ولدو مع بنت ماشي من سهم الحشمة ونسا الخير بنت ماتليقش تدخل لدار آل الفاسي وتحمل ولد وتربيه على طاعة الرحمن ..، ولي فيض الكاس انو ولدو مقرر ومصمم  يديرها زوجة وخليلة...!!

محمد ميل راسو كايحك لحيتو ووجهو مابادي عليه لا بشارة ولا ضيم همس ببحة خاترة كاسيها الثبات والخشونة :

الكلاب وصلولك  الخبار سخوونة

الحاج جلال رفع صوته ماراضيش بالرد :

احترم ووزن كلامك..!! الكلاب هوما لي دايعين في الزنق مع بنات الليل ..

وقفت شامة على طولتها هي وخديجة.. والبنات حتى هوما عاصرين على يديهم بالخوف الظاهر هادي ساعة الشيطان وصوت الحاج مايترفع الا اذا وصلت به للعظم ومدة طويلة  ماترفع واليوم ماشي كيف الايام قربوا منهم كايهاديوا  محمد كيف الجبل ثابت وجهو ماتبدل مارفد هم ، واضع يد في جيبو كايلعب ببريكته واليد الثانية تغزل في اللحية...

"الا بنت الليل لي مانرضاها عروسة وأم لحفادي

لالة شامة واقفة بينهم حايرة نطقت بخوف والخبر وصلها كيف الحديد سخون على قلبها :

اش مقصودك الحاج...، شكون هاد بنت الليل !!!

الحاج جلال قرطاس عينو على ولدو :

السيد استحلى وسادة الحرام وبغى يثبت غرسو مع عاصية الله ..،  مخلي بنات الناس المستورات وريوكو سايلين على وحدا تحشم حتى تشوف فيها والزوينة الالة  هي عرض عليها الزواج..

شهقو شهقة وحدة من لالة شامة للخدامة  سعاد لي كانت مخبية ورا خامية  الصالون تدي خبيرة وتشتتها لاهل الحارة..، هذا علاش لالة شامة رافضة تدخل عليها الغريب للدار غير غلبها الزمان ومابقات تقدر على الشقى  بناتها الزوج لي باقيين بلا زواج دراعهم كاضي ..،  فجابت سعاد تعاونها مرة مرة وتكلف  في نفيض الدار والتسياق اما الطياب الحاج جلال من غير طياب شامة مايحلالو...كان كلامو المسوس كيف الموس داز على الريوس، عارفين محمد وفعايله لكن توصل به يختار من رحبه الحرام حلالو هادي ماكانت في الحسبان ..

لالة شامة عينيها دمعو وقلبها تزعزع من مكانو رجاها ومناها تزوج ولدها على شهوتها تختارلو خيرة البنات زين واخلاق .. عروسة  تعيش تحت جناح ولدها حانية الراس تساعف وتسايس قدامها قدام الربح ماعليها لغى ماوراها وسخ ...، صفحة نقية ماتعرف طريق للحرام ووسخو... كلام الحاج جلال هرسها وديك النظرة لي رماتها لولدها خلاتو يرد ليها البال غير هي لي بين عينيه وسطهم أمو لي مايبغي ليها الضر ولا يسمعها الكلام المر ، ساط ريح سخونة من فمو مغمض عينيه وحواجبو معقودين جامد كيف الصخر ما نهر  ما تكلم حدو عض على شواربو كايخمم فتح عيونه قاتمين وباين عليهم غضب الدنيا  وسخطها ..الا دوا  وتكلم  الليلة رحبة الفاسي ترجع سيرة على كل لسان ..، وامو عارفها طيح على طولتها ..، ماعندوش مع الكلام  الموزون فمو خاسر ويدو طويلة .. ماراضيش يعيش على هوى والديه .. عندو حياتو ودارو واختار المراة لي تنغمو و معمرالو عينو ومشبعاه في فراش الحرام،  حياتو بعيدة بعد الارض على السما  من حياة باه وجدودو مايفرق بين حلال وحرام ولا يضرب حساب للصح والغلط ..  عايش حياتو على هواه وكيفو  . القرعة والكاس والليل ونارو  واللحم الخانز لي ماشبع منو ولا مل  وزيد عليها بزناس صحيح ..، حاط يدو على مال الحرام ومحزم بفلان وفلان صحاب الغبرة والخمرا لي مايقولو كاين الله نتقاوه ولا يحنو في العباد .. الدينيرو هو لي كاين وماكاين غيرو .. ومحمد واحد منهم  راضي بلي هو فيه ..،   حاشا واش الاسم يليق بمولاه ،  الشيطان غواه وغرق باباه، خلاه كيف المبلي الا بعد شويا  يروي شوقه بالسطر الابيض ومايلقى جهد  وصبر والا قرب يزيد يتعلق حتى مابقى يشوف شي طريق أخرى من غير طريق الحرام.. وااخ من طريق الحرام ناسها كثار...،  وحلاوتها غاديا بصحابها للنار...!!