العطر في الخد مناعم، حطت زينتها موهجة صباحها .. شمعة شعيلا .. الذهب، الكحل، المسك الأصلي، بخور فواح فوق يدها هازا السالف توغل فيه ريحة البخور.. حطت المبيخرة، كاتنفض في سالفها، منحوتة القلدة هذا صباح حلو حيت فيه اتلاقى بضو عينيها، الجيد واقف والقفطان الاخضر عريض ساتر فتونها ..، جمعت شعرها وتحجبت..، قبل لل تخطى خطاويها برا خيمتها طلت عليه غارق في نعاسو وسط حرير مخدته وغطاه، نزلت كيف الخيالة كاتمشى مشيتها الغشيمة، الذهب رنان في المعصم وقلادة وازنة نازلة كيف الدالية على جيدها وسط منها خويمسة وافية الميزان... واخا تعيا ما تغشم وتحشم في المشية وردة بازغة .. تلقات صفاء في طريقها مبسمة في وجيهها المبشور صبحت عليها
صباح النور صفاء
صفاء هازة الصينية د أتاي ردت عليها :
صباح النور ختي هاجر كيبقيتي .. 《نزلت عينها لكريشتها ورجعت شافت فيها》 اجي تفطري وجدت الرغايف والمسمن شحمة..!!!
هاجر سبقتها :
يعطيك الصحة ..!!!
كانت شامة وخديجة والبنات جالسين كايتحتتوا في الاثواب والدهاز العرس باقي لو ربع ايام والوقت يجري ...، صبحت عليهم ..شامة علات فيها العين ماعاجبها حال ورجعت مشغولة بلا ماترد عليها ماعدا غيتة وخديجة تنهدت كاتقارع وصول باها ويامنة ...!!!
كانت ساكتة كاتمتق بكاسها تاكل الرغايف بالشهوة، حاضياهم كايعزلو في التصاور هذا زين هذا شين هذا سواقي رخيص هذا دازت موضتو، هذا فن هماوي، ماوجدتش لدهازها كيف كاتوجد سارة ليها مها وعمتها ..، كل شي داز بالزربة بلا بنة...، علات شامة فيها العين نطقت بالجفااا :
ديك الكرش تعرف تعمر الماكلة لكن ماتهزش الحفيد...!!!
وقفتلها النعمة في جوفها حطت كاسها لي كان غادي لفمها، وخديجة نطقت كاتعاتب شامة :
احمدي الله وشكريه بركانا غير داك القاصح تزيد توحل في تريكتو قاد غااا بها هي يقد بالولاد . !!! 《شافت في هاجر شوفة حنينة》 كملي فطورك ابنتي ..!!
شامة لي فيها مامهنيها.. زادت وطات على الجرح كاتخرج في دةوك العينين المكحلين كيف موكة تآمر وتنهي :
وجدتي لراجلك الفطور ولا الفرحة نساتك ...!!!
خديجة رمات عليها الغيار :
لعني الشيطان وخلي عليك بنت الناس هانية
وقفت هاجر كاتمة الغمة كاتمسح في فمها والشدق ماشبعاتو حتى من صوتها رجف :
بصحتكم
خرجت من الصالون غادية جهة المطبخ، توجدلو فطورو .. قلفطت على كمامها نسات همها وتخمامها كاتوجد وحاضية الوقت امتا يوصل باش تعنق باها ويامنة موحشاهم بزاف ...!!!
أنت تقرأ
جمرة الحلال
Romance❤️🔥من رواية "فلتغفري" لقصة "جمرة الحلال" ❤️🔥 بأسلوب مغاير .. فكرة مغايرة.. #بقلم hajar Lotus قصة من قاع الخابية...، حروفها مطروزين بالحكمة.. وبالميزان.. لعُشاق الكلام الفاخر .. تلقى فيها حكمة مدسوسة.. قصة صبر وحكمة و لا كلام فوق كل...
