နောက်ဆုံးခရီး နိဋ္ဌိတံသော် (MM Translation)

Chapter 4 (U)

အပိုင်း ၄

မိဖုရားက သူ၏ နှစ်လိုဖွယ်ရှိမှုကို အင်မတန် ကျင်လည်စွာ အသုံးချတတ်သည့် မိန်းမပင်။ ဘာသာရေးမြို့တော် (Holy City) တွင် မိဖုရားကို ပထမဆုံးတွေ့ရသည့်နေ့က အရွယ်ရောက်ခြင်း မွေးနေ့ရှင် မိဖုရားသည် ယောက်ျားသားများ ဝိုင်းဝိုင်းလည်နေသည့်ကြားတွင် အရိုင်းဆန်ဆန် ရယ်မောလျက်ရှိနေခဲ့သည်။

ခါဆယ်ရ့်တွင် ပိုးပန်းနေကြသူများအုပ်စုထဲသို့ ဝင်ပါရန် စိတ်ကူးမရှိပေ။ တစ်ချက်အကြည့်မှာတင် ထိုမိန်းမက ကန္တာရထဲတွင် လိုက်လျောညီထွေ နေသားကျနိုင်မည်မဟုတ်သည့်ပုံပင်။ 'အခွင့်အရေးမရှိတဲ့ကိစ္စတစ်ခုကို မျှော်လင့်ချက်တွေထားပြီး အပင်ပန်းမခံဘဲ နေရအောင်' ဟူ၍ တွေးခဲ့သည်။ သို့ရာတွင် မိဖုရားက ခါဆယ်ရ့်ကို အရင်ချဉ်းကပ်ခဲ့ပြီး ထူးဆန်းသည့် ကမ်းလှမ်းချက်ကို လုပ်ခဲ့သည်။

[သုံးနှစ်ဆို ရပါပြီ။ သုံးနှစ်ပဲ ထုံးတမ်းအစဉ်အလာနဲ့အညီ တရားဝင် အိမ်ထောင်ရေးမှာ နေပေးမယ်ဆိုရင် သုံးနှစ်ပြီးသွားတဲ့အခါ ဆက်ခံသူ မွေးဖွားပေးပါ့မယ်။]

[ဘာလို့ ငါဖြစ်ရတာလဲ။]

[စတုတ္ထဘုရင်က ကျွန်မကို စိတ်မဝင်စားတဲ့ပုံပေါ်လို့ပါ။ အဲ့ဒီလိုဆိုရင် ကျွန်မ လိုချင်တဲ့ သုံးနှစ်တာ ဝတ္တရားဆန်ဆန် အိမ်ထောင်ရေးက ပိုပြီးလွယ်ကူလိမ့်မယ်လို့ထင်ပါတယ်။]

[ဘာဖြစ်လို့ ဟန်ဆောင်လက်ထပ်ဖို့ လိုအပ်တာလဲ။]

[ကျွန်မတို့ရဲ့ သဘောတူစာချုပ် အဖုအထစ် တစ်စုံတစ်ရာမရှိဘဲ ပြီးသွားတဲ့အခါ ပြောပြပါ့မယ်။]

[ကလေးမွေးပြီးသွားရင် ဘာလုပ်ဖို့ စီစဉ်ထားလဲ။]

[အဲ့ဒါကိုလည်း...နောက်မှ ပြောပြပါ့မယ်။ စတုတ္ထဘုရင်အတွက် မကောင်းတဲ့ကမ်းလှမ်းချက်တော့ မဟုတ်ဘူးထင်ပါတယ်။ ဆက်ခံသူ လိုအပ်နေတယ်မဟုတ်လား။]

သူပြောခဲ့သည့်အတိုင်း ဆက်ခံသူမွေးဖွားရန် ခါဆယ်ရ်က အာနီခါကို လိုအပ်ပေသည်။ 'အာနီခါ' များသာလျှင် ဘုရင်တစ်ပါး၏ အရည်အချင်းများကို အမွေဆက်ခံနိုင်မည့် ဆက်ခံသူကို မွေးဖွားပေးနိုင်မည်ဖြစ်သောကြောင့်ပင်။