နှင်းဆီနီနီ (Completed)

Part 14

နှောင်းတစ်ယောက်အိမ်ပြန်ဖို့လုပ်ရာကျောင်းရှေ့တွင်။

"နှောင်း"

"ဟင် ကိုစည်သူ"

စည်သူဆိုသည်မှာနှောင်းနှင့်နှစ်ဖက်မိဘသဘောတူထားသူဖြစ်သည်။နှောင်းအဖေမဆုံးခင်ကထည်းကကိုစည်သူတို့မိဘနှင့်မိဘချင်းရင်းနှီးကြပြီးနှောင်းအရွယ်ရောက်လာတော့ကိုစည်သူ့မိဘတွေကနှောင်းနှင့်သူ့တို့သားကိုနေရာချပေးချင်ကြသည်။နှောင်းအမေကလည်းသဘောတူသည်။အမေသည်ကိုစည်သူကိုနှောင်း၏အိမ်ထောင်ဖက်အဖြစ်ရွေးချယ်ဖို့ရာအမြဲပြောနေသူဖြစ်သည်။နှောင်းကတော့ထိုလူကိုနည်းနည်းမှပင်သဘောမကျပါအမေ့မျက်နှာကြောင့်သာအလိုက်သင့်နေပေးနေရသည်အခုလည်းနှောင်းကျောင်းရှေ့မှာလာစောင့်နေသည်မို့အင်မတန်မှကိုစိတ်ရှုပ်သွားရသည်။

"ကိုယ် နှောင်းတို့အိမ်ကိုရောက်ခဲ့သေးတယ်နှောင်းရဲ့"

"ဟုတ်လား ဒါဆိုအခုကျောင်းထိတောင်လာရတာဘာကိစ္စရှိလို့များလဲ"

"ဘာကိစ္စမှတော့မရှိပါဘူး နှောင်းကိုတွေ့ချင်လို့လေ ကားပေါ်တက်ပါ ကိုယ်ပြန်လိုက်ပို့ပေးပါရစေ"

"ရပါတယ် ကိုစည်သူရယ် နှောင်းကိုယ့်ဘာသာကိုယ်ပဲပြန်လိုက်ပါ့မယ်အားနာစရာကြီး"

"နှောင်းကလဲ ကိုယ်ကအားနာနေရမဲ့လူလား ပြီးတော့နှောင်းအမေကနှောင်းကိုသွားကြိုပေးပါဆိုလို့ပါ"

'အမေကတော့လုပ်ချလိုက်ပြန်ပြီ' ဟု နှောင်းစိတ်ထဲတွင်ရေရွတ်လိုက်သည် အမေကလာကြိုခိုင်းတာဆိုတော့လည်းနှောင်းငြင်းလို့ကမရတော့။

"အမေကလည်း ဘာမှန်းမသိ အားနာစရာကြီးကို"

"အားမနာပါနဲ့နှောင်းရယ် တက်ပါနော် ကိုယ်ကနှောင်းကိုလာကြိုချင်နေတာပါ"

"ဒါဆိုလည်း ဒီတစ်ခါတော့အားနာလို့ကိုစည်သူနဲ့ပြန်လိုက်ပါမယ် နောက်တစ်ခါများတော့အခုလိုကျွန်မကျောင်းကိုလိုက်မလာပါနဲ့"

"ဟုတ်ပါပြီ နှောင်းမကြိုက်ဘူးဆို ကိုယ်မလာတော့ပါဘူးနော် တက်ပါ"

နှောင်းထိုလူနဲ့စကားဆက်မပြောချင်တော့တာကြောင့်ဘာမှဆက်မပြောပဲကားပေါ်သာတက်လိုက်သည်။