عُذرًا فقد اِمتلكها الشيطان

الثانوية العامة.. 🦋

اولا سلام عليكم ورحمة الله وبركاته ❤

ثانيا اكيد لو حد فيكي لمحني دلوقتي هيضربني بالنار.. بس اتقل تاخد حاجه نضيفة والله بظبط الفصول عشان تطلع حلوة.

ثالثا وده الاهم بلا رواية بلا بتاع..
مبااارك على اللي جابوا مجاميع حلوة، ربنا يكمل فرحتكم على خير وتدخلوا كلية خير ليكم 🩵🩵

اما بقا النااس اللي فاكرين الدنيا اسودت فوالله والله الجبر جاي، ربنا مش بيسيب حد..
وانا عارفه ان اى كلام هيبقا شبه بعضه بس حابة اوريكم صورة بسيطه بس...

انا ايام ما كنت ثانوية عامة كنت علمي علوم والدكتورة راحت الدكتورة كلت الدكتورة شربت.. هوب جبت68.7.. مجموع مايدخلنيش الحمام حافية.. واخدت كلام طبعا يجيب للواحد انتحار مرتاح.. ودفعة التابلت بقا يعني حاجه خلاط زبادي.

مش هقول ضغط وكثافة والجو ده، لا خالص كنت بذاكر وشاطرة، وكان عندي صحبتي البيست ادبي كانت اكبر داعم ليا واعز حد على قلبي.. ادعولها ربنا يكرمها 🩵 كانت بتشجعني في كل حاجه حرفيا وهي السبب الاكبر اني مازالت مكملة في الرواية 🩵

المهم قولت ادخل تجارة عشان البنوك والفلوس ادام مافلحتش في تعليم بقا.. والله روحت سألت قالوا بتاخد من 69 فرقت بالظبط كام من عشرة. اسودت تاني الدنيا وانتي حتى تجارة مش جايبة مجموعها،، خلاص خلاص ادخل فنون جميلة عشان برسم حلو، واهو اتخصص ديكور وابقا مهندسة ديكور.. ولله الحمد فشلت في الاختبار وكويس اني مادخلتهاش لان بيطلب منك رسم اشخاص وده حرام هتيجي يوم القيامة ربنا يقولك انفخي فيه، وكذلك النحت.
بقيت بقا الفاشلة اللي مش نافعة، لغاية ما طلع نتيجه التنسيق واداب جاتلي.
خلاص حلوة اداب ادخلي انجليزي فرقت على درجة انا كنت جايبة 42 في الانجليزي وهي بتاخد 43
انا البايظة اللي فوق برضو مفيش امل، وبقيت انا بتاعت علمي علوم ام فيزياء واحياء، تدخل اداب بتاعت ادبي.
لحد ما رست على عربي قولت خلاص بقا مكنش فيا حيل احلم ولا زفت ووالله العظيم قولت شهادة وهتترمي.
طلع ان ده الخير اللي ربنا كتبهولي وانا عشان رؤيتي محدودة ماشوفتش ده.

دخلت عربي واكتشفت فجأة اني بعرف اكتب حلو شجعتني صحبتي على كتابة الرواية، والمذاكرة في الكليه.. ولقيت ان فيا حتة لو كنت دخلت كلية علمي مكنتش هلاقي الحتة دي.. واهو داخلة رابعة.

اينعم لسه بعيدة اوى اوى على اني ابقا حاجه مش عشان كتبت قصة ابقا رحمة نبيل ولا دينا جمال ده انا لسه برعم نامي بس اهو على الاقل حاجه حبيتها 🩵 على فكره كاتباتي المفضلات دول♥♥ وفي ناس تانيه بس مش موضوعنا.

اسفة للرغي ده كله بس حبيت اوريكم ان ربنا بيدي على قد كرمه والله مش على قد نظرتك حتى واحنا مقصرين في حقه، كلنا واولهم انا ماستاهلش كرم ربنا عليا بس هو عظيم بيعطي العبد على قد كرمه .

ماتقلقوش والله ما ودعك ربك وما قلى
ربنا هو اللي عارف قدراتك ومجهودك، لو اتظلمتي فميش اعظم منه وكيل اللي هيعوضك، ولو مكنتيش ذاكرتي حلو فده درس اتعلميه، الثانويه دي دروس فعلا ولازم تتعلموا منها، وتعيدوا حسابتكم فيها من نفسك وطريقة تفكير، لصحاب لاي حاجه.

وماتزعلوش لو الاهل قالوا كلام يزعل او يضايق.. اولا والله مهما كانت خدوها بنابع حلو انهم قهرنين عليكم وخايفين عليكم حتى لو الكلام قاسي، هما بس عاوزين يرفعوا راسهم بيكوا، معلش ادفع بالتي هي احسن، وخدوها حافز والله ان اللي مش عحباكوا دي هتبقا ايه مستقبلا..
وايا كانت الكلية فوالله هي الخير وهتشوفوا 🩵

ارجو مكنش طولت عليكم بلا فايدة بس انا عارفه دلوقتي النفسية هتبقا عاملة ازاى ووالله ربنا شايف وهو احن عليكي من ابوك وامك فديما الجأي لله، واعرفي انك لما بتأوي لله انتي بتأوي لركن شديد قوي وحنان منان عليكي.. اطلبي بس انتي وهو هينفذ ده اسمه اكرم الأكرمين🤍

وماتشلوش هم الكلام فسيكفيكهم الله ♥

ومين عارف ﴿ لَا تَدرِي لَعَلَّ اللَّهَ يُحدِثُ بَعدَ ذَلِكَ أَمرًا ﴾