‏نظرتك كانت بحر ونظرتي كانت غريق

البارت الرابع عشر

عند ساري بالمركز
ساري : انت اللي اخذت السكين وطعنت ابوك ؟ السكوت مارح يفيدك
صالح : والله اني حققت معه واعترف والتسجيل وريتك امس لكنه فجأه يعصب ويبي يأذي نفسه وكلمنا طبيبه النفسي اللي قالت لنا عنه امه وجاي
ساري : اذا كل واحد بيقتل وبيسوي نفسه مجنون على كذا الكل بيقتل ويطالع (احمد المتهم) ويقوم ويضرب ع الطاوله لاتفكر انك بتنفذ عشان طبيبك اللي بتجيبه مارح تفلت من العقوبة تأكد من هالشي
احمد ترجع تجيه النوبه ويصرخ ويرمي الاشياء بقوه ويععصب ساري ويمسكهه من رقبته : هالحركات ماتمشي علي كل المجرمين يسوونها تسمععع
احمد باقي ماهجد وبيهاجم ساري ويمسكه ساري ويلوي يده : نظرات المجرمين ذي اعرفها زيين
صالح : سيدي طبيبه جا ويبي يشوفه
ساري : لاتفكر انك لو طلعت تقرير انك مجنون انك مارح تتعاقب ويطالع صالح خله يدخل
شِيام دخلت قبل غيد وتتصادف هي وساري وتشوف ساري ماسكه من يده بقوه
شِيام : ممكنن تترك يده ؟ الولد تعبان ماهو بوعيه مالها داعي الشدة
ساري : وانتي مممين ؟ وليه دخلتي ؟
شِيام تعطيه الورقة : انا دكتورته النفسيه واعتقد ان عندك خبر ان له مواعيد بالطب النفسي
ساري مستغرب : قالو لي دكتور طلعتي دكتوره وقبل مايطلع التفت على شِيام يكون بعلمك تراه بياخذ عقوبته ويحط يدينه ورا ظهره ويطلع
صالح : لما شفت الاسم فكرت انه دكتور ماتوقعتها دكتوره وبهالجمال
ساري طنش مادقق بملامحها اصلاً
شِيام تهدي احمد : اهدأ تذكرتني صح ؟
احمد يهز راسه يعني ايه
شِيام : طيب تقدر تقولي وش صار هذيك الليلة؟
احمد تجيه نوبه عصبيه وتمسكه شِيام بمساعدة غيد
شِيام : لا تخاف محد رح يسوي لك انت اهدا وخذ نفسس وتساعده وتتنفس معه عشان يهدأ
احمد يرفع راسه ويطالع شِيام ويبي يتكلم بس ماهو قادر
شِيام تركز بعيونه وتشوف فيها الخوف والرعب : لاتضغط على نفسك مااحد يقدر يجبرك على الكلام خذ راحتك انا هنا عشان اساعدك وتأشر ع غيد وهي بعد جايه تبي تساعدك مانبي يكون فيه اي خطأ او ظلم
احمد جالس وينتف اظافره وياكلهم
ساري : وش قاعده تسوي ذي ماعاد سمعنا صوت
صالح : انتظر باقي ماخلصوا
شِيام : غمض عيونك وخذ نفس وتذكر كل شي واذا ماتقدر تتكلم هذي ورقه وقلم ارسم اللي صار او اكتبه
احمد يغمض وياخذ نفس ويتكلم بخوف وتأتأة : ام..
شِيام : لاتضغط على نفسك خليك مسترخي وتكلم
احمد : اننا وامم...
ساري يفتح الباب بقوه ويفزعع احمد ويفتح عيونه
شِيام : وش قاعد تسوي انت ؟ اعتقد ان هذا تعدي على شغلي
ساري بعصبيه: ليه ؟ زعلتي ان مريضك بيدخل السجن بتهمته وانتي تبين تلفقين انه مريض نفسي
شِيام تحاول تمسك نفسها وماتعصب وينهار مريضها وتضغط ع اسنانها وبعصبيه: انت لاتتدخل بشغلي وياليت تطلع لين ينتهي وقتي بعدها تعال
ساري يضرب ع الطاوله بقبضته: انتتي
شِيام تطالعه بحده : اييه ؟
غيد تمسك شِيام تعرف انها اذا عصبت ماتتعامل الا باللكم : امسكي نفسسك احمد خاف اكثر احنا جينا نعالجه ولا نزيده
شِيام تطالع احمد وتجلس مقابله له وتطالع ساري : ممكن تطلع وماتتدخل لان عندي صلاحية اقعد مع مريضي
ساري عصب وياخذ نفس بقوه ويرجع ورا شوي وماطلع ويكتف يدينه : نشوف اخرتها
شِيام : ايه كمل مثل ماقلت لك خلك مسترخي وغمض عيونك وخذ نفس
احمد ياخذ نفس ويغمض وتنزل دموعه : انا ابي اشيل القضية عنها
شِيام : ايوه كمل تاخذ القضيه عن مين ؟
ساري يفك عقدة حواجبه ويستغرب من كلام احمد
احمد : انتي تعرفين اني مااكذب كنت اجي عندك واقولك التفاصيل
شِيام : ايه اتذكر كل حرف قلته كمل
احمد: قلت لك ان ابوي مدمن ومهرب وكان شديد علينا ويضربنا انا وامي واخواتي
شِيام تتذكر ابوها انه كان يضربهم وبدون مخدرات وتاخذ نفس : ايه كمل ولاتضغط على نفسك اذا تعبت وقف
ساري يطالع شِيام ويفكرها تبي تعطيه تقرير وهو قاتل
احمد وهو مغمض عيونه ويبكي : كان رح يقتل امي قدامنا عشانها منعتني مااساعده
ساري يتدخل : ايه واخذت السكين وطعنت ابوك
شِيام تطالعه بنظرات حاده وتضغط ع اسنانها : غيد طلعيه او سكتيه
ساري عصب من كلامها : انا المحقق ترى مو انتي
شِيام تطنشه وتطالع احمد وهو مغمض : ايه ووش صار بعدين ؟ اخذت السكينه ؟ وش قاعد تتذكر الحين ؟
ساري عصب اكثر مايحب احد يطنشه
احمد تنزل دموعه : اماني وهي تاخذ السكين وتطعن ابوي
شِيام : طيب وانت؟
احمد : امي تمسكني وتحط السكين بيدي " انت عندك تقرير رح تطلع منها"
شِيام : افتح عيونك وعيد الكلام اللي قلته لي للمحققين انت ماتبي تكون قاتل ابوه صح ؟
احمد يفتح عيونه اللي صارت مثل الجمر من البكاء : ايه بس اختي كانت تدافع عن امي
شِيام: لاتخاف مارح يصير لهم شي ومافي احد بهالدوله رح ينظلم
احمد يبتسم ودموعه تنزل وماقال شي
شِيام تقوم وتطالع ساري : الحين يبدأ شغلك يامحقق وتطلع
ساري عصب ويقبض يده ويضرب عالطاوله بقوه وضربات كثيره
صالح : احمد بنحطك بالتوقيف لين نتأكد من كلامك وبعدها نطلعك طيب؟
احمد يهز راسه ايه
شِيام معصبه وحزينه بنفس الوقت وتحاول تاخذ نفس اول ماطلعت من عندهم
غيد تمسك يدها : اهدي والله اني اشوف عروقك من كثر العصبيه
شِيام : قهرني ماخلانا ناخذ راحتنا مع مريضنا كأنه ذبان يحوم يحوم والله اني مسكت نفسي بالغصب
غيد تضحك : اتوقع لو مامسكتي نفسك كانت صارت جريمه داخل انتي معصبه وهو معصب يللا تعالي نروح نتقهوى او نتغدى قبل ترجعين البيت
شِيام : لا ابي اروح العياده بشوف اوراق احمد فيه اشياء ابي اشوفها
غيد : تكفين عشاني نتغدى بعدها نروح للعياده وش رايك ؟
شِيام تبتسم : وانا اقدر اقولك لا يللا وتمسك جوالها تكلم عروب
عروب : لا والله مابروح المكتب اليوم
شِيام : لييه فيك شي او تعبانه ؟
عروب : لا لا حبيبتي والله ان مافيني شي بس رانيا عندها قضايا وداومت ولو احتاجتني بتكلمني
شِيام: اشوا خوفتيني احسب فيك شي
عروب تضحك: نفس جدتي وجدي منجد انك حفيدتهم
شِيام : على اساس انتي طالعه منها وتضحك يللا انا بتغدى مع غيد لاتنتظروني وبروح للعياده فيه كم ملف لازم اراجعه
عروب : طيب انتبهي لنفسك وتنتهي المكالمة
شِيام : راسي بينفجر من العصبيه ابي عصير ليمون او اي شي بارد
غيد تضحك: المحقق ضحكني يوم قال انا المحقق ولا انتي
شِيام تضحك: يستهبل علينا خلاص عندنا تصريح اننا نقدر نشوف مريضنا والوقت اللي نبيه لكن شكل عقله ع قده
............................
عند ساري اللي يده تجرحت من كثر ماضرب فيها الطاولة ويكلم نفسه : ذيي تعطيني انا محاضره وانا اللي ماعمري خسرت بتحقيق اقسم بالله لو طلع هو القاتل ان اخذ روحها
صالح يدخل : سيدي تبي نروح لهم البيت ولا نستدعيهم
ساري معصب : ع اساس بيجون يسلمونها لو كلمتهم لا بنروح لهم
صالح يخفي ضحكته : ليه معصب؟ عشان الدكتوره؟
ساري : مابقى الا هي بنت تعصبني لكن عصبت ان قضيتي بتكون مشكوك فيها بسببها وانا اللي ماعمري خسرت
صالح : تبي الصراحه من اول ماشفت توتر امه واخواته عرفت ان فيه شي
ساري ياخذ نففس : جيبب لي شي بارد ابي ضغطي ينزل رفعت ضغطي هالادمية
صالح يضحك ويطلع
........................
عند الجوهره ونيّاف
انسام : والله ان هو سواها بدون مااطلبه واسألي عروب
الجوهره: الله يهديك هالمسكين كرفتيه وهو كان راجع من دوامه
نيّاف يضحك: والله مشعل رجال وكفو ونشمي اعرفه مارح يخلي السياره وهو يقدر يسويها
انسام تبتسم: صح والله
الجوهره: الا شِيام وعروب وش اخبارهم ؟والله اني فقدتهم
انسام: والله انهم بخير بس شِيام مشغولة كانت
نيّاف: الحمدلله اني شفتهم مبسوطين والله هذي كانت امنيتي الوحيده والله يسعدهم اكثر واكثر
الجوهره : اي والله بعد ماشفت حالتهم يوم جبتهم وحالتهم الحين الحمدلله اني شفتهم محققين احلامهم
انسام : وانا ؟ مافي لي دعوه من هنا ولا مدحة
نيّاف: انتي حبيبة ابوك ونور عيونه بعد
انسام تبوس ابوها: الله لايحرمني منك يبه
الجوهره: وماما ؟
انسام تضحك وتبوس امها : يااحلى ماما بالدنيا
نيّاف : ابي اخذ رايكم فيه مزرعة للبيع تبون اشتريها ؟
الجوهره : نبي نشوفها طيب قبل نقرر
انسام: ايه صح لازم نشوفها ونقرر
نيّاف: هو خويي ويبي يبيعها وارسل لي صورها ويوريهم
انسام : الله يبه تجنن وفيها خيول ولا مابيعطيك معها
نيّاف يضحك: تبين خيول ؟ اجيب لك خيول ياروح ابوك بس وش رايكم ؟
الجوهره : تجنن ومااتتفوت حبيبي خذها
نيّاف: توكلنا على الله ويدق يكلم خويه
انسام: زين يعني هالشتاء بنسكن مزرعتنا وناخذ شِيام وعروب وجدي عوض وجدتي مليحة معنا
الجوهره: اييه والله اني انبسط بشوفتهم
.....................................
بيت الجد عبدالعزيز
الجد عبدالعزيز : ياسر مايبي يداوم بالمعرض ؟
ابو طارق: والله اني حاولت فيه لكنه معيي
الجد عبدالعزيز : موب بكيفه وينه الحين
ابو طارق: نايم مانام الا قرب الظهر
الجد عبدالعزيز : الله يهديه
ابو ساري : والله اذا داوم بتتعدل حتى نفسيته ونومه
هاني جا من النادي : مساك الله بالخير جدي ويبوس راسه
ابو راشد: هلا بلاعبنا هاه قربت تخلص ولا باقي
هاني : والله باقي اسبوعين ويصير ولدكم لاعب ناشئ رسمياً
الجد عبدالعزيز : الله يجعلني اشوفك اشهر لاعب ياولدي
هاني : اميين ياجدي ويروح
راشد جا من الدوام : الله لايحرمنا هالجمعه الحلوه
الجد عبدالعزيز : اللهم امين
ابو راشد: وجهك واضح فيه التعب علامك؟
راشد: لا والله لا تعب ولا شي بس كنت في مهمه ورجعت
ابو ساري: الله يكون معكم ويوقف معكم ياحماة الوطن
راشد: اللهم امين ويحفظ لك ساري هو بعد حامي وطن
يجي ساري وهو عاقد حواجبه ومعصب وبيطلع فوق
الجد عبدالعزيز : ياساري وش فيك غريبه عليك ماسلمت علينا اول مره تسويها
ساري : اسف ياجدي والله اني ماانتبهت ويبوس راس جده
ابو طارق : علامك عاقد حواجبك وش صاير لك
راشد يطالعه وعرف انه فيه شي مخليه معصب
ابو ساري ينتبه ليد ساري انها متجرحه : وش فيها يدك ؟ تضاربت مع احد
ساري : لا بس بالغلط انقفل عليها الباب
راشد قفطه انه كذاب : الباب يسوي كذا ؟
ساري ساكت وماتكلم ويتنهد
الجد عبدالعزيز يحط يده ع كتف ساري: وش فيك ؟
ساري يبتسم بالغصب : مافيني شي والله بس بعد اذنك بطلع ارتاح بغرفتي
راشد يراقبه ويشوف انه معصب ويلحقه
ابو ساري: والله لو تشوفه امه كذا ان تتعب
ابو راشد: الله يحمييه ماعمري شفته كذا
الجد عبدالعزيز بدأ يقلق عليه : الله يحفظه
ساري يفتح الباب بقوه ومعصب وينسدح
راشد يلحقه : وش فيك ؟ وش اللي خلى ساري الهادي يعصب كل هالعصبيه ؟
ساري ماقال شي بس يطالع بالسقف
راشد يجي وحط راسه جنب راس ساري : وش فيه بالسقف بيطيح؟
ساري: راشد انقلع ماني رايق لك
راشد : غصب عنك تروق لي وتقولي وش فيك ؟
ساري يتنهد : تبي نروح نقنص ؟
راشد يحط يده ع جبهة ساري: انت صاحي ولا فيك بلى ؟ نقنص بالليل ؟ ترى الوقت الحين بين المغرب والعشاء اذا ماتدري
ساري يتنهد مره ثانيه : نروح للخيول ؟
راشد يطالعه بنظرة يعني وش عندك انت
ساري : بتروح معي ولا بروح لحالي
راشد: ايه ايه معك لاتفصل علينا بس تجهز وانا بروح اغير ملابس الدوام شكل بكره لا انا ولا انت بنداوم
ساري ماقال شي
راشد : كان ناقص تنهبل بس ويروح
ساري معصب بس ماشكى وش السبب
****************************
انتهى البارت اللي كان فيه هواش غيرمتوقع بين شِيام وساري 😔