راشد: تفضل
تدخل شِيام وساري مقابل للباب وواقف ومتكتف ومعصب تحس شِيام بإحساس غريب وتحس ود الارض تنشق وتبلعها من التوتر اللي اول مره تحسه
راشد: هلا دكتوره وش جايبك ؟
ساري بحده : هلا ببطلة الدفاع عن النفس يمكن جايه تبي تعرف اذا فيه مجرمين تبي تتتورط معهم
شِيام تخز ساري وتطنشه وتلتفت لراشد : جيت ابي اعرف مسكتوا عمر ولا لا
ساري عصب اكثر لأنها طنشته وهو متعذب من خوفه عليها
راشد: ايه لكن مو موجود هنا بالمستشفى
تدخل عروب من ورا شِيام: السلام عليكم
ساري وراشد يردون السلام
شِيام : طيب وليه موجود بالمستشفى ؟ ليه مو بالسجن؟
راشد: اكيد بيرجع السجن بعد علاجه
عروب: ياليت نعرف وش الجديد في قضية وائل دامك هنا محقق ساري
ساري يتنفس بعمق ويطالع شِيام: اسألي اختك الدكتوره يامحامية عروب
عروب كاتمه الضحكة : ليه وش دخل اختي الحين ؟ انا اسألك انت كمحقق
راشد: الفضل لأختك بعد الله قبضنا على الدكتور وعمر
عروب تطالع شِيام وتبتسم: اييه وش الجديد اختي دايم بالمقدمة
ساري بعصبيه وقلق ويطالع راشد: ايه اذا بعد فيه مجرمين تبي تقبض عليهم شوف للدكتورة
راشد يكتم ضحكته: ايه اكيد هي كمواطنة مسؤولة عن الامن بهالدوله
شِيام عصبت وماتبي تفصل عليه : يللا عروب نروح لعمر وتطلع ووراها عروب
ساري ياخذ نفس بعمق ويضغط على اسنانه : شفتت التهور اللي هي فيه ويلحقها
شِيام : وش فيه ذا جن يحمد ربه اني ماني رايقه للنقاشات معه
عروب تمسك يدها وتقرب منها : مو رايقه ولا فيه شي ثاني ؟
شِيام: عرووب بتسكتين ول.....
ساري من وراهم : ولا ايش ؟ بتضربينها مثل الدكتور
عروب تطالع شِيام : انا كيف ماادري انك ضربتيه وش سوا ؟
شِيام توترت : وانت وش دراك
ساري: ايه سمعت ان الدكتوره ورامية الاسهم فنانه بعد بالدفاع عن النفس وطرحت الدكتور
عروب تضحك وتبي تنرفز شِيام: بس الدكتوره ورامية الاسهم مو بس فنانة دفاع عن النفس وبس اختي وبطلتي مُلاكمة ولا ماقال لك جدي ؟
ساري يبتسم ابتسامة استغراب ويطالع عيون شِيام وهو يحس انه خلاص غرق من جد فيها ولا يبي النجاة : يعني مو بس عيونك تشدني حتى شخصيتك بعد!
شِيام توترت: وش تقول انت شكل عقلك من الطيحه باقي مااستقر
ساري مبتسم وماشال عيونه عن شِيام وشاف انه بدأ يتعمق بشخصيتها ويكشف غموضها
عروب تبتسم : طيب يامحقق ساري احنا بنروح نزور عمر ونشوف وش وضعه
ساري يبلع الابتسامة ويرجع للواقع والقلق ويطالع شِيام : انتي متهوره تدرين ؟ ليه رحتي امس للمكان اللي قبضوا فيه على الدكتور وعمر ؟ ليه تدخلتي بالتحقيق مو حذرتك؟
شِيام : والله انا محد يقولي وش اسوي ووش مااسوي رحت ابي اعرف التفاصيل وداهمنا ولد عمك واللي معاه
ساري ياخذ نفس عميق وبحده : بسس انتي تدرين ورطتي نفسك مع ممييين ؟
شِيام : مع مين مع المافيا مثلاً ؟
ساري بعصبيه: اييه ورطتي نفسك مع مهربين المخدرات تعرفين يعني ايش ؟
شِيام : طيب يعني المفروض اخاف ؟ مارح يقدرون يسوون لي شي
عروب خافت على شِيام وتطالع ساري: وانت سامع شي يعني كيف تقول ورطت نفسها؟
شِيام : لاتخافين مافي شي ولا يقدرون يسوون شي تعرفين المحقق يبالغ
ساري يقرب منها اكثر وبكل قلق وخوف ويتكلم بجديه : انتي مو عارفه حجم الخطوره وياليت تنتبهين لنفسك اكثر من قبل وحاولي ماتطلعين بأوقات غير الذروه والافضل ماتطلعين لوحدك وماتدّخلين بغير شغلك
شِيام عصبت: وانت بصفتك مين عشان تقولي سوي كذا ولا تسوين كذا ؟
ساري يتنهد: بصفتي الشخص اللي انقذتي حياته والمسؤول عن حمايتك ياليت تتفهمين
عروب تمسك شِيام بقوه : سمعتي ؟ ياليتت ماتتورطين ويللا مابنزور عمر لين يطلع
ساري : لو صار شي علموني اي شي حتى لو بسيط وتافه علموني
شِيام متلخبطه مشاعرها : يامحقق ساري انا انقذت حياتك ولا ابي مقابل ياليت ماتتدخل بشغلي وحياتي "وتمسك عروب وتمشي"
ساري بصوت عالي : بسس انا رح اتدخخل حتى لو ماتبينن
يطلع راشد من مكتبه : ساري وش فيك شوف كيف الكل يطالع فيك
ساري بعصبية : واذا الكل طالع فيني ؟ الشخص المطلوب ماطالع فيني ولا فهم شعوري "ويروح"
راشد يتنهد ويكلم نفسه : والله انك طحت في حبها ياساري من جد ومع عصبيتك ذي بتموت وهي مادرت عنك
ساري يطلع ورا شِيام وعروب ويمشي وراهم بسيارته
ساري يضرب الدركسون بكل عصبيه : مارح اسمح لكك تأذين نفسسك بسبب عنادك وتهورك لو اضطريت امشي وراك طول العمر
عروب تطالع شِيام والدموع بعيونها : شِيام انا خايفه عليك تكفين خلاص مانبي نروح لعمر لما يطلع من المستشفى نروح له
شِيام : مافيه شي يخوف حبيبتي لاتبكين ولا تحزنين اكيد عنده شرطه ومكلبشينه مايقدر يسوي شي
عروب : مارح يخلوننا ندخل نزوره خلينا نرجع
شِيام : بس نتأكد عروب اذا هو في المستشفى ولا
عروب: اكييد دام راشد مسكه والله مايفكه وهو قاتل اخوه
شِيام تطالع عروب وتشوفها من جد خايفه وعيونها مليانه دموع : طيب خلاص تبين نرجع البيت ولا وين نروح؟
عروب : خلينا نرجع البيت ولا عندك مرضى؟
شِيام: لا ماعليك حبيبتي بحولهم على غيد تشوف وتسجل لهم مواعيد
عروب تسند راسها على شِيام وشِيام تسوق : استودعتك الله والله من كلام المحقق خفت عليك من ذول المهربين
شِيام تضحك: لاتخافين حبيبتي المحقق كذاب ماعنده سالفه يبي يخوفنا بس
عروب : ان شاء الله انها بس كذا
يدق جوال عروب "انسام"
عروب : هلا بالنجمه المختفيه وينك ولا ماتبين تكلميننا
انسام: هلا فييك حبيبتي عروب والله اني ابي اكلمكم وتعرفين شكثر احبكم
عروب: تحبيني انا وشِيام بس؟ ولا
انسام: لاتبدأين ياعروب تعرفين الموضوع اعترفت له وكسر قلبي وبحاول اتناساه
عروب تضايقت على انسام: لا انا كلمته واستنى رده
انسام: عن ايش كلمتيه ؟
عروب تضحك : بعدين تعرفين يانجمة خالي لكن ماتبين تجين عندنا؟ الطعس قال مابيرجع بدري وانا وشِيام مارحنا دواماتنا تعالي ولا عندك محاضرات لسى؟
انسام : عندي بعد بس عادي بسحب عليهم واجيكم مافي فرصه احلى من اني ازوركم ومشعل مو بالبيت
عروب تضحك: طيب حبيبتي وتقفل
شِيام: وش فيها انسام ؟ لسى متضايقه من مشعل ؟
عروب: ايه الدلخ كسر قلبها ماعرف يرفضها بشويش اكلها بقشورها
شِيام: يابعد عمري انسام وهي متعوده ماينرفض لها طلب بس هالمره الرفض كان قاسي
عروب: عشان كذا قلت لمشعل يعطيها فرصة يمكن يحبها ماتدرين وانسام تنحب
شِيام : ان شاء الله والله ان مشعل مابيلاقي احسن من انسام
عروب: ترى قلت لها تجي البيت ارجعي يللا مانبي نزور عمر هنا اذا رجع السجن بنروح له
شِيام تضحك: صدقتي كلام الاهبل ذا وتلف وترجع
ساري يشوفها دورت السيارة ورجعت وهو وراها: وش تسووين ياشِيام وين تبين تروحين والنهاية مع عنادك ذا
...
بيت الجد عبدالعزيز
الجد عبدالعزيز : الحمدلله ياولدي لقوا اللي صدم هاني قال لنا ساري الصبح
ابو راشد بفرحة: الحمممدلله ويسجد سجود شكر عقبال يارب احضر قصاصه
ابو طارق: اللهم امين ماررح يضيع حق هاني
ابو ساري: الحمدلله لكن ساري كان يبي يقولك بس يفكر انك باقي ماخذ بخاطرك عليه
ابو راشد: يشهد الله انه ولدي وندمت كانت لحظة غضب وانتم تعرفون اني احب ساري مثل راشد وهاني الله يرحمه
طارق جاي من فوق بيطلع لدوامه : وش هالمشاعر وش صاير
ابو طارق: بششر اثير مسكوا اللي صدم هاني
طارق: الحممدلله يارب بطلع ابشررها ويقابل ياسر على الدرج ويقوله ترى لقوا قاتل هاني
ياسر: الحمدلله يارب والله يصبر قلبك يا الاء
طارق دخل الغرفه ولقاها نايمه وماحب يصحيها وقفل الباب ورجع يروح لدوامه
...
عند راشد بالمركز
بدر : ايه رحنا وكلمنا الدكتور بالمستشفى ويقول انه حالته مو خطيره بس شرخ من الرصاص ونقدر ناخذه للتحقيق
راشد: وللسجن بعد ان شاء الله
بدر : والله وانا اخوك تهمة المخدرات ثابته عليه يعني بالسجن بالسجن مافيها كلام
راشد يتنهد: اي جهه بيحققون معه المخدرات ولا الجنائية؟
بدر: لا التحقيق الجنائي واعتقد انهم ودوه بالجيب لهناك
راشد : زين خلني اكلم ساري اشوف اذا ارسلوه للجنائية ولا باقي
ساري وهو باقي ماشي ورا شِيام يبي يحميها ماتورط نفسها بشي جديد ويدق جواله
راشد: وينك انت وليه خليتني ومشيت ماعندي سيارة
ساري: ياخي رح مع اي احد من اخوياك خله يوديك انا مشغول الحين
راشد: مشغول في ايش؟ رحت المركز ترى ارسلوا عمر امسك التحقيق ولا تخليه يفلت هالمره
ساري: احلف متى جابوه ؟ ماارسلوا لي الشباب انه وصل
راشد: مو تقول مشغول احسب انك رحت له اجل مشغول في ايش
ساري: وانت شدخلك خلاص مشغول ويقفل ويكلم نفسه " والله طحت بيدي ياعمر"
شاف شِيام وعروب وقفوا عند البيت وهو يراقب من بعيد
ساري: ان شاء الله انه بيتك وماتورطين نفسك بشي ويشوفهم نزلوا بس يبي يتأكد اذا هو بيتهم ولا لا ويمسك جواله ويفتح على رقم شِيام
يتنهد ساري : واذا قالت كيف عرفت رقمي اوه خلاص بتصل واللي فيها فيها
*****************************
أنت تقرأ
نظرتك كانت بحر ونظرتي كانت غريق
ChickLitالى كل القراء ليس كل الاباء اباء بعضهم نعمة وبعضهم نقمة وليس كل زوجات الأباء يملكون قلوب حديدية بعضهم شر وبعضهم خير اتمنى هالرواية توصل لسقف توقعاتكم🤝
