စိမ်းစိုသာယာနေဆဲဖြစ်သည့် ထနောင်းပင်ရွာကလေး၏ ရွာလမ်းမထက်သို့ နေဗီပြာရောင် landroverကားကြီးတစ်စီးနှင့် Toyotaအဖြူလေးတစ်စီးက မနှေးသောအရှိန်ဖြင့် ရောက်ရှိလို့လာ၏။
ချစ်စရာကောင်းတဲ့ရွာကလေးဟာ အရင်တုန်းကအတိုင်း အေးချမ်းမြဲ၊ စိမ်းလန်းဆဲ။
ရွာဦးတံတားထိပ်တွင် ရွှေရောင်ဝင်းနေသော စေတီတော်မြတ်ကြီးကို ယခင်ကအတိုင်းပင် ကြည်ညိုဖွယ်ရာ ဖူးတွေ့ရသည်။ ပြန့်ပြူးနေသော ရွာလယ်လမ်းမကြီးသည်လည်း ယခင်အတိုင်း။
အရိပ်ကောင်းသည့် ညောင်ပင်အိုကြီးအောက်တွင် သနပ်ခါးပါးကွက်ကြားနှင့် ပုဆိုးစလွယ်သိုင်းထားသည့် ကလေးငယ်များက ပျော်ပျော်ပါးပါး ဖိနပ်ပေါက်တမ်း ကစားလျက်ရှိကြသည်။
မလှမ်းမကမ်းတွင် ကျင်းပနေသော ကြက်တိုက်ပွဲကလည်း ဆူဆူညံညံ။ မကြာသေးခင်ကမှ မိုးရွာထားခြင်းကြောင့် သစ်ရွက်များတွင်တင်ကျန်နေသောမိုးရေစက်များ အောက်သို့ကျလာတိုင်း 'တဝေးဝေး'အော်ကာ ပျော်ရွှင်စွာ ခုန်ပေါက်ပြေးလွှားနေသော ကလေးငယ်တချို့ကိုလည်း တွေ့ရသည်။
သက်ကယ်မိုးထားသော အကြော်တဲလေးထံမှ မွှေးပျံ့သောအကြော်ရနံ့တို့က အဘက်ဘက်ကို သင်းလို့ပျံ့လို့။ မီးမတောက်သဖြင့် ထင်း၃ချောင်းဖိုဂနောက်ဆိုင်ထားသောမီးဖိုမှ မီးခိုးတို့က တလူလူ။
ဗိုက်ဆာတယ်ဆိုပြီး ကားပေါ်ကအတင်းဆင်းဖို့ပြင်နေသော ချစ်တီးကို အေးချမ်းက မြင်မြင်ရာတိုင်း စားချင်နေသည်မှာလည်း တဏှာပင်ဖြစ်သည့်အကြောင်း အကျယ်တဝင့်ရှင်းပြနေ၏။ နိုင်လွန်က ပြုံးစိစိလုပ်နေပြီး Alexကတော့ ပိုက်ဆံအထပ်လိုက်ကြီးကိုထုတ်ကာ ဖျက်လိုဖျက်ဆီးလုပ်နေသောအတွဲကို မျက်မှောင်ကြီးကြုတ်ကြည့်သည်။
သိပ်မကြာခင်မှာပင် ကားနှစ်စီးစလုံး ထရံအသစ်ကာထားသော ခြံဝိုင်းကြီးတစ်ခုအတွင်းသို့ ကွေ့ဝင်လိုက်ပြီး စံပယ်ရုံအနီးရှိ ခုံထောင့်နားလေးတွင် ကားကိုစက်သတ်၍ရပ်လိုက်ကြသည်။
"ဟော ဆရာလေးတို့ ရောက်လာကြပြီဟေ့..မရွှေခင်ရေ..."
"ညိုကြီးတို့ သာဝတို့ရော ဘယ်ရောက်ကုန်ကြတုံးကွဲ့..အမြန်လာကြစမ်းပါ..ဒီမှာဧည့်သည့်တွေကို အိတ်ကူသယ်ပေးလို့ရအောင်"
