2023, July 23
Sunday
Htan Naung Pin Village
🎵အောင်စေကြောင်း....ဆုတောင်းသွန်း ပတ္ထနာ....
တန်ဖိုးအနဂ္ဃရတနာ နိတုံရွှေကိုသာ
နဝရတ် ကျောက်မြတ်ပုလဲနဲ့
စီခြယ် သွန်း သည့်အခါ
မင်္ဂလာခညောင်း အပေါင်းကျက်သရေ ပြည့်စုံလာ🎵
လင်းရောင်ခြည် ဖြာယှက်၍ ရောင်နီသန်းလာသည့် မင်္ဂလာနံနက်ခင်းတွင် နားဝင်ပီယံရှိလှသည့် မင်္ဂလာတေးသီချင်းသံက ရွာ၏ အဘက်ဘက်အရပ်ရပ်ကို ပျံ့နှံ့နေသည်။
တောရွာမင်္ဂလာဆောင်များ၏ အလေ့အထအတိုင်း မိုးမလင်းမီကပင် လူတွေက လှုပ်လှုပ်ရှားရှားနှင့် ပူဖောင်းမှုတ်သူက မှုတ်၊ ပန်းအလှပြင်သူက ပြင်၊ မနက်စာ ချက်ပြုတ်ကျွေးမွေးသူက ကျွေး ဖြင့် အသံတွေက တစီစီ။ ပုံမှန်ဆိုလျှင် မင်္ဂလာတေးသီချင်းများကို Soundboxကြီးများဖြင့် မနက်၂/၃နာရီလောက်ကတည်းက စတင်၍ဖွင့်နေကြပြီဖြစ်သော်လည်း ဆရာလေး၏ 'အများသူငါတွေ အိပ်ရေးပျက်နေပါ့မယ်'ဟူသော တားမြစ်စကားကြောင့် မနက်မိုးသောက်ချိန်ရောက်မှသာ ဖွင့်၍ရကြခြင်းဖြစ်သည်။
အိမ်နောက်ဖေးတွင် အိုးကြီးအိုးငယ် အသွယ်သွယ်ဖြင့် ပြင်ဆင်ရင်း အလုပ်ရှုပ်နေကြသည့် ကာလသားခေါင်းတို့၏ အသံများကလည်း ဆူဆူညံညံ။ တချို့ကတော့ အဝတ်လဲရန် အိမ်ကိုပြန်သွားကြပြီဖြစ်ပြီး ဦးဆောင်နေသူ 'ခေါင်း'များကတော့ soundboxသံကြားမှပင် အစားအသောက်များကို ပြင်ဆင်နေရာချထားရန် အော်ဟစ်လှုံ့ဆော်လျက်ရှိကြသည်။
"အပျို၊ လူပျိုတွေ ရောက်ကြပြီလားဟေ့..."
"ထမင်းဟင်းတွေ လာသယ်လို့ရပြီနော်"
မျက်နှာတွင် မှုံနံ့သာလေးတွေ ပြင်ဆင်ခြယ်သထားကြသော ဝမ်းဆက်ကိုယ်စီနှင့် ချစ်စရာလုံမပျိုလေးများက သူတို့ကြောက်ရသော ကာလသားခေါင်း၏အော်သံကြောင့် ချက်ချင်းပင် လူစုနေရာမှ ခွဲလိုက်ကြပြီး ပန်းကန်များသယ်ရန် အိမ်နောက်ဘက်သို့ ခပ်သွက်သွက်လျှောက်သွားကြသည်။ အလုပ်လုပ်ချင်တာက နည်းနည်း၊ အပျိုတွေကိုငမ်းချင်တာက များများ ဖြစ်နေသော ကာလသားများကလည်း အပိုးမသေသောမျက်နှာ၊ ပုဆိုးက တပြင်ပြင်နှင့် ရုပ်တွေကလည်း စပ်ဖြဲဖြဲ။
