Unicode
ငိုမဲ့မဲ့ရုပ်ကလေးနှင့် သူ့ကိုမရိုက်အောင် လာချွဲနေသော အသားဖွေးဖွေးနှင့် ဝဝကစ်ကစ်ကလေးငယ်လေးသည် ချစ်စရာကောင်းလှသော်ငြား သူစိတ်ပျော့သွား၍မဖြစ်ပါ။
ဒီကလေးဟာ ကြာလေဆိုးလေ။
သုံးနှစ်သားအရွယ်နှင့်မလိုက်အောင်ပင် မူယာမာယာက များတတ်သေးသည်။
လုပ်ချင်တာတွေလုပ်ပြီးလျှင် သူအရိုက်မခံရအောင် ခေါင်းအစခြေအဆုံး Ageyoတွေ ထုတ်သုံးတတ်သည်။
ဒါနဲ့ပဲ အပြစ်လွတ်ပေါင်းများလှပြီ။ဒီတစ်ခါတော့ လုံးဝမျောပါသွားလို့မဖြစ်။
"ဘာမရိုက်ပါနဲ့လဲ..အိပ်ရာထဲမှာ တုတ်ချိုချဉ်တွေခိုးမစားပါနဲ့လို့ ငါမင်းကို ပြောမထားဘူးလား"
"ဟုတ် ပြောရားပါတယ် ဟင့်"
"ဒါဆို ဘာလို့စားလဲ"
"ဒင်ဒင်လေးက ကြိုက်တာကိုလို့ အိစ်"
"တိတ် ငါ့ကို လာချွဲဖို့မစဉ်းစားနဲ့..ဒီတစ်ခါတော့ မှတ်လောက်သားလောက်အောင်ကို ဖင်ကိုနာနာလေးရိုက်ပစ်မယ်..နောက်တစ်ခါထပ်မလုပ်ရဲအောင်"
"ရိုက်နဲ့ ရိုက်ရဝူးလေ အူးဝါး"
နှုတ်ခမ်းတလန် ပန်းတလန်နှင့် အာခေါင်ခြစ်၍ ပြဲလန်အောင်ငိုပြနေသော သူ့သားအသံကို ကြားပြီးသကာလ သက်ဆိုင်သူက အခန်းထဲမှ ကပျာကယာပြေးထွက်လာသည်။
"ကလေးကို မရိုက်ပါနဲ့"
"ခင်ဗျား ဘာမှဝင်မပါနဲ့"
"ကလေးက ငယ်ငယ်လေးပဲရှိသေး.."
"တိတ်"
လက်ချင်းတွဲထားသော သားအဖနှစ်ယောက်က မျက်နှာငယ်လေးနှင့် ကိုယ့်ပါးစပ်ကိုကိုယ် လက်ကလေးနှင့်ပိတ်လိုက်ကြပုံမှာ တိုင်ပင်ညီထားကြသလို တစ်ထပ်တည်း။
"ခင်ဗျားက အမြဲတမ်း အဲလိုရှေ့ကနေ ကာဆီးကာဆီးလုပ်နေလို့ ကလေးက ဆိုးနေတာ..ဒီတစ်ခါတော့မရဘူး ခင်ဗျားဖယ်နေ"
"သာဒင်လေးကလည်းကွာ.."
သာဒင်က သူ့ရှေ့က ကလေးနှင့်အပြိုင် လာချွဲပြနေသော ထိန်ညီးကို စိတ်ကုန်သလိုကြည့်သည်။
