✅ وانحنت ﻷجلها الذئاب ©️ كاملة - الجزء الثالث

الفصل السادس

الفصل الســــادس :

في السجن النســـائي ،،،،

تلفتت ناريمـــان حولها بذعـــر ، وبدت أكثر إرهاقاً وعجزاً وهي تتطلع إلى هياتم الجالسة قبالتها .. كذلك تجمعت الهالات السوداء بكثافة أسفل عينيها .. واعتلى الشيب رأسها ..

لم تتوقع الأخيرة أن ترى سيدة الأعمـــال الراقية بتلك الحالة الرثة والمزرية .. خاصة بعد أن تلقت منها مكالمة تطلب فيها لقاءها في زيارة رسمية بمحبسها ..

نظرت لها بإشفـــاق وهي تسألها بهدوء حــذر :

-خير يا مدام ناريمان ؟ حضرتك طلبتي مقابلتي هنا ليه؟

حدقت بها ناريمان بنظرات خائفة ، ومدت يديها المرتعشتين نحوها لتمسك بكفها ، وهمست بصوت مبحوح :

-انتي الوحيدة اللي هاتقدري تساعديني يا هياتم

ضيقت هي عينيها بشدة ، وأردفت قائلة بجدية وهي تسحب كفيها للخلف :

-بس أنا مش محامية ولا آآ...

قاطعتها ناريمان بتلهف :

-أنا عارفة ، بس معنديش حد أثق فيه غيرك

-مدام ناريمان ، حضرتك عارفة من بعد اللي حصل واتكتب واتقال ، أنا .. انا مقدرش آآ...

رمقتها بنظرات أكثر رجاءاً ، وهتفت بإستعطاف :

-أرجوكي يا هياتم ، ماتتخليش انتي كمان عني .. صدقيني أنا بريئة ، مقتلتش حد .. ده .. ده ملعوب اتعمل عليا

قطبت هياتم جبينها ، ورددت بإهتمام :

-ملعوب !

هزت رأسها بصورة هيسترية وهي تجيبها :

-ايوه .. ده من جوزي الحقير مهاب الجندي

تعجبت مما قالته ، وبدى على وجهها الإندهـــاش .. وتسائلت بفضول :

-طب وايه اللي هايخليه يعمل كده ؟

ابتلعت ناريمان ريقها ، وردت عليها بنبرة مرتعدة :

-عشان يخلص مني ، و..وياخد كل فلوسي

أرجعت هياتم ظهرها للخلف ، فحديثها لم يكن مقنعاً على الإطلاق ، وأردفت قائلة بإنكار :

-بس دكتور مهاب مش بالغباء ده عشان يعمل كده ، سامحيني في اللي هاقوله ، هو مش محتاج فلوسك !

إتسعت حدقتي ناريمان بشراسة ، وقالت بحنق :

-انتي مش عارفة حقيقته ، مهاب ممكن يعمل أي حاجة عشان مصلحته !

عقدت ساعديها أمام صدرها ، وتسائلت ببرود :

-والمطلوب مني ؟