✅ وانحنت ﻷجلها الذئاب ©️ كاملة - الجزء الثالث

الفصل السادس عشر - الجزء الثاني

الفصل السادس عشـــــر ( الجزء الثاني ) :

في مشفى الأمراض النفسية ،،،

نهض الطبيب فهمي من على مقعده فور رؤيته لأوس الجندي ، واستقبله بإبتسامة مرحبة وهو يمد يده ليصافحه ، وهتف قائلاً بسعادة :

-حمدلله على سلامتك يا أوس باشا

صافحه بقوة وهو يجيبه بجدية :

-الله يسلمك

سألها فهمي وهو يشير له بالجلوس :

-ازي صحتك دلوقتي ؟

رد عليه أوس بإقتضاب وهو يجلس على المقعد المواجه له :

-أحسن !

زم فهمي فمـــه ليضيف بعتاب زائف :

-أنا بأعاتب على حضرتك عدم انتظامك في جلسات علاجنا السرية ، خصوصاً الفترة الأخيرة !

إلتوى فم أوس بإبتسامة متهكمة :

-هو كان بإيدي ! ما إنت عارف اللي حصلي !

تنحنح بحــرج وهو يكمل بحذر :

-أيوه ، وأتمنى إننا نواظب خلال الفترة الجاية

ضغط على شفتيه قائلاً بتنهيدة :

-هحاول

تشدق فهمي قائلاً وهو يعتدل في جلسته :

-أنا فاهم إن سيادتك يا باشا عندك مشغوليات ، وإلتزامات ، بس ده مهم جداً ، إحنا بدأنا في مشوار ، وعاوزين نكمله للأخـــر !

زفــــر أوس قائلاً بنفاذ صبر وهو يشيح بذراعه :

-أنا بأعمل كل اللي طلبته مني ، بس لسه في حاجز بينا !

نفخ مجدداً وهو يتابع بنبرة شبه محتدة :

-حاسس إني هافشل ومش هاقدر أكمل

انحنى فهمي بجسده للأمـــام قليلاً ، ورد عليه بهدوء محاولاً إمتصاص غضبه :

-أوس باشا ، كون إن حضرتك جيت هنا عشان تتعالج ، ده في حد ذاته أكبر خطوة للنجاح .. اعتراف الشخص بمرضه هو الخطوة الأولى في مراحل العلاج الصح ، وزي ما فهمت حضرتك طبيعة المرض اللي عندك ايه ، وطرق علاجه إزاي ، وأنا معاك لحد نهاية المشوار

تنهد أوس بعمق وهو يعيد رأســـه للخلف متذكراً ذلك اليوم الذي قرر فيه أن يواجه أكبر مخــاوفه ، ويغير من نفسه كلياً عن طريق اللجوء للعلاج النفسي بعد حادثة تقى الشهيرة ...

نعم لقد نجح في إخفاء الأمـــر بالتعاون مع طبيبه النفسي المعالج له حتى يمتثل للشفاء ...