HALOS lahat ng tao ay binabati si Elise. Kahit ang mga hindi niya kilala ay lumalapit sa kanya, binabati siya at nakikipagkamay. Pero wala na roon ang atensiyon niya. Natapos na ang performance niya, naitanghal na siyang panalo, pero ni anino ni Fritz ay hindi niya nakita.
Kanina ay nagpaalam sina Kristoff sa kanya na makikihanap na rin kay Fritz dahil hindi pa rin bumabalik sina Taylor at Takehiro.
Naglakad siya palabas ng auditorium at nagulat siya nang makita ang isang tao paglabas ng pinto.
"Kate!" masayang sabi niya nang makita ang kaibigan.
Ngumiti nang matipid si Kate. "Hi, Elise."
"'Buti nakarating ka. Akala ko hindi mo natanggap 'yong text message ko sa 'yo tungkol dito sa competition, eh. Hindi ka kasi nagre-reply."
"Natatanggap ko naman. Medyo busy rin ako this past few days. Kumusta ka na? How's the competition? Nagsisimula na kasi nang dumating ako at hindi na ako pinapasok ng guard."
"Ah. 'Eto." Inimuwestra niya ang pumpon ng bulaklak na hawak. "Pinalad na manalo."
Ngumiti si Kate sa kanya. "Congrats. Sabi ko na nga ba mananalo ka, eh. Ikaw pa, ang galing-galing mo kaya. Lahat nga ng gusto mo nakukuha mo, eh."
Natawa siya nang mahina. "Hindi naman. Saan ka? Gusto mo sumabay na sa amin kumain? May after-party celebration kasi kami."
"Ah, naku, hindi, 'wag na. May importanteng lakad din kasi ako. Nag-stay lang ako kasi gusto sana kitang makausap. May time ka ba? Kahit saglit lang. Importante lang kasi talaga."
Unti-unting napalis ang ngiti ni Elise nang makita ang seryosong mukha ni Kate. "Sige. Halika. May alam akong lugar na makakapag-usap tayo nang tayo lang." Dinala niya si Kate sa garden na madalas nilang tambayan ni Fritz. "Ano ba 'yong importanteng sasabihin mo?" tanong niya na inilapag ang pumpon ng bulaklak sa tabi niya sa wooden bench.
Nanatiling nakatayo si Kate. "Tungkol ito kay Fritz."
Napaangat siya ng tingin sa kaibigan. "Tungkol... kanino?"
BINABASA MO ANG
NIGHTINGALE TRILOGY book 3: FÜR ELISE (UNEDITED) (COMPLETED)
Romance"Kahit mawala ako sa mundo, kahit mawala ang alaala ko, hindi ka mawawala rito sa puso ko, Fritz. Kasi, ito, tumitibok lang para sa 'yo." Minsan lang nakakilala si Elise ng lalaking makakaintindi sa kanya-si Fritz-ang lalaking kapareho niya ang naka...
