**عشق زارني بعد حبك**

الحلقة الخمسون

لا احلل النشر لا دنيا ولا اخرة
**عشق زارني بعد حبك**حلقه50
للكاتبه *سونيا ايلين*

ايمن..* وعمري ماحنحب غيرك مكانك في قلبي ربي بس يعلمه وعشقي ماليشي حد*
ايمن ...كنت نكتب وعارف انه هادي اخر مرة نكلمها عارف انها نهايه قصة حبنا
بعتت **زوجك محظوظ.بيك ..صعب عليا نقولها☹ بس ربي يخليكم لبعض انتي تستاهلي كل خير وربي اكيد عوضك ومتأكد انك تحبيه اكتر مما حبيتيني ربي يخليهولك لانه راجل بجد**
ايمن: وااااك وقته النت يفصل...تو توصل بعدين

الياس... كنت نقرا واني مستغرب ومصدوم ختام تكلم في واحد عليا لا وخطيبها السابق واني نقول متغيره عليا وبادل مجهود باش نسغدها .. لحظتهاكنت حاسس ان الصدمه خلتني مشلول
ختام: الياس تعالى تعشى
الياس دموعه ينزلو:ختام هدا شنو
ختام قلبها قريب يطلع :شن في
الياس حدف الهاتف ع الحيط وعيط :هداااا شنو
ختام: تبكي والله فاهم غلط
الياس: هدا شنوووو ..شن منقص عليك اني باش تكلمي غيري
كنت ماسك روحي لولا حبي اهو قتلتها كنت حاسس بنار في قلبي بنار لخيانتها ونار ان حبي طلع مش مكانه
ختام تبكي: اقسم بالله الا فاهم غلط لا نبيه ولا شي
الياس شدها من مرفقها :قداش ليك تكلمي فيه ااااا مدام منسيتيشي علاااش واخدتني.. هدا سترتك بعد عارك ااا
ختام: عاري يعني انت منسيتش زي ماقتلي مدامك لتو تعايرني بيه
الياس :هي كلمه نمشي ونجي منلقاكش هني فااااهمة

طلع وسكر الباب قعدت نبكي ياريت ماكلمته ولا شفته ربي يشهد ان كنت ناويه نسكر موضوعه لاغير

الياس... طلعت من الحوش واني نحاول نستوعب قلت بالك نكدب مشيت للبحر بكيت بكيت لاول مرة نحس اني مهدود وجعتني خيانتها يلي مش عارفلها سبب ووجعني قلبي

ختام: معرفتش شن اندير شن يعني حياتي تهدت خلاااص شن بنقول لاهلي اكيد مش حيستر عليا اكيد حيقول ان خنته كنت نفكر ومرة مرة ننهار من البكاء كيف بنسيبه ..لين سمعت الباب تفتح
الياس: مانتلفتيش
ختام: تبي نحلف ع
الياس: لاتحلفي لاشي تني مسمعتش سمع اني قريت بعيووووني
ختام: باهي شنو
الياس: معاش نبيك لمي حوايجك
ختام نزلت ع ركابها :وحق الله مظلومة وحق الله ماخنتك بكل
الياس دفها: خلي عندك كرامة شويه خلاص انتي طلعتي من خاطري
ختام: الياس اني نحبك والله انحبك اكتر من روحي
الياس :لمي حوايجك واطلعي تواااا
نظت لبست حوايجي كانت الساعة ١١ ومش مصدقه ان بنخلي راجلي وحوشي وبنطلع

كنت مقعمز في الصاله وعيوني يقطرو دموع وراسي بيطربق كيف صار هكي الصبح كنا تمام وتوا... لين طلعت من الدار
الياس: لميتي حوايجك
ختام..
الياس: نكلم فيك
ختام :منبي شي
الياس: اطلعي غدوه تو نولع فيهم النار

طلعت واني قلبي خلاص تفجرت بكاء في السياره
الياس... نضعف قدام عيونها ننهار لو تبكي بس كان لازم نتصرف لانها كسرتني بقوة
ختام: الياس بالله عليك افهمني شن بيقولو اهلي مروح بيا في نص الليل
الياس: انزلي
انزل يخبط في الباب واني نقول اكيييد كدب اكيد نحلم
ختام شدت يديه اقسم بالله ماخنتك هو اتصل واني كلمته باش يأيس من اني نحبك
الياس ...
امي: قول منو من بيجينا في الليل
اسامه: باهي خشي... منو
الياس: افتح
امي: ان شاء الله خير
اسامه :اهلين ان شاء الله خير شن في خشو
الياس :دخل للمربوعه
اسامه: شن في تكلم
الياس :يا اسامه انت صاحبي وبينا عشرة عمر وربي شاهد ان الكلام هدا عليا صعب
اسامه :شن في ياراجل
الياس: اني وختك مش لبعض
اسامه :شن هو.. شن في ؟غلطت في حاجه معاك
الياس: طبس راسه ومسح دمعه خاف ان تبين ضعفه لا اختك بنت اصل بس معاش في نصيب
اسامه: ختام شن مدايره ياراجل
الياس :مليهاش دخل اني عاينت وطلع عندي مشكله ميؤوس من علاجها ومنبيش نظلم اختك.معاي
اسامه :لاحول ولا قوة الا بالله
الياس: اني منبيش نظلمها معاي لان هي تبي الصغار تو يجيها نصيبها
اسامة: بالك في حل او اي شي
الياس وقف: لا ...انت اعز من خوي بس نصيبات
اسامه :مش عارف شن نقول
الياس: عادي ان شاء الله يجيها نصيبها
كنت نتكلم وقلبي والعه فيه النار مقدرتش نقوله لقيت رسايل حب في هاتف اختك اسامه صعب واحتمال يقتلها

**من الصعب ان تكون في قلبي فتجرحه جرح عميق حتى الصميم ورغم هدا اخاف عليك**

الياس مسح دمعه: غدوة توصلها ورقتها
اسامه: مش عارف شن نقولك تو نكلمها بالك ترجع
الياس خدا هاتفه من الطاولة :لا حني تفاهمنا ومنظلمهاش معاي
الياس: ترا ناديها

كنت في داري
امي :تكلمي خيرك
ختام ترعش وتضرب في وجها: خلوووني في حالي
ازهار :شن صار كنتو تمام
اسامه: ختام
ختام... لما ناداني قلت اكيد بيقتلني لان الياس مستحيل يسكت ...شنو
اسامه :بري للمربوعه يبيك
ختام :به
مشيت للمربوعه واني حالتي حاله وجهي احمر من الضرب وعيوني منفخات دخلت ورجعت الباب
ختام: الياس
الياس :اسمعي يا بنت الناس ربي شاهد اني صنتك بعيوني ومرضيت فيك شي لكن انتي ماصنتيش روحك
ختام :الياس والله
الياس :اسسس لنا نتكلم فمك تسكريه ...اني مقلتش لخوك ع مصيبتك مش خوف عليك بس خفت معاش يقيم عينه فيا ونخسرو بعض بسببك
ختام تبكي :وحق الله مظلومه
الياس حط يديه ع فمها: اس معاش يهمني اني توا سترتك للمرة التانيه قدام اهلك وعملتك حتقعد في قلبي لين نموت ...ختام انتي طالق

كانت اصعب كلمة انطلعها في حياتي كلها اصعب من كل شي عشته البنت يلي حبيتها ودرت رقبه في رقبتي ع خاطرها غدرتني يعلم الله ان قلبي تعلق بيها بروحها وعمري ماكبدت ع حد زيها

ختام ...كانت اصعب كلمة نسمعها حبيب طفولتي ويلي سترني وحبني يلي عطاني قلبه وعطيته روحي طلقني كنت معاه كيف بديت حياتي كنت ننسى وجعي كله في حظنه توا وليت من غير حظن

بعد اسبوع...
امي :افتحي فمك
ختام :منبيش امي خليني في حالي
امي تبكي :يا بنتي ماكش اول ولا اخر وحده تطلق تو ربي يحن وتتزوجي وهو ربي يعوضه مرات يتزوج وحده ارمله يربي صغارها

لحظتها قلبي سحقني منقدرش نتخيل ان ممكن يلمس او يبوس او يرقد غيري في حظنه

عند الياس...
كانت ازفت ايام حياتي كنت لانعرف نوم ولا ماكله قلت لامي اني طلقت وع نفس السبب قتلي تمشي تردها حلفتها لا.. مشيت للاستراحه ع اساس ننسى بس كنت نتفكر كل شي تمنيت لو قتلتها لانها قتلتني وجعنتني هلبه حاولت انطلعها من راسي بس كل شي فيا كان ليها ويبيها تمنيت لا شفتها ولا عرفتها تمنيت لا حبيتها ولا عشقتها ...لان اصعب من خيانتها قلبي معلق بيها قررت ننسى ومكانش قدامي الا اني......يتبع