حيـاتـي💔(مكتملة)

الـحـلـقــة 23

حياتي 23

المهم في يوم من الأيام كانت عندي مراجعه عند الدكتوره والشباب ابراهيم وسعد نتصل بيهم ما يردوا.

اقترحت عليا سندس نمشي معاها مع فتحي لكن أنا رفضت.
عادي نأجلها المراجعه لعند ما يجي فتحي خير ما نمشي مع عثمان ويهزبني.

طبعاً على أساس الاتفاق هو بكره جاي وبيقعد أسبوع عند هله بعدها يأخذني..

مزالت نفسيتي تعبانه من قصه هذك الليلة كل ما نذكرها جسمي كله يرجف مش عارفه كيف نحكيها لـ فتحي مش عارفه كيف حــ تكون ردة فعله بس ما نقدرش ما نحكيها مستحيل..

فوتت المراجعة وجاء اليوم الثاني قلبي يدددق اليوم فتحي يجي واحتمال ،99% ما نشوفه.

ياربي ميتة ارياف عليه نبي نشوفه نبي نعرف شن قاله الدكتور نبي نسمع منه تفاصيل السفره متاعه.

طول عمري نكره نسمع سرد قصص طويله بالتفاصيل ألا من فتحي نحب نسمعه وهو يحكي حتى كيف يأكل كيف يشرب نحبه وهو يحكيلي.

المهم ما اتصل وقدرت أنه اكيد منشغل مع أمه وهله.
وأصلاً على كل الأحوال قربوا امتحاناتنا وأنا باديه نجهز ونقرأ نبش نرسب نبي نكمل بسرعه.

متريحه في معهد التمريض لسبب واحد بس أنه قريب من مهنة الطب يلي كنت نتمناها موت.
ووللحظه هذي لما نذكر اني ما حققت هالحلم قلبي يئن،،زي ما يئن على فقد أمي .
ويئن على حاجات واجد فش داعي نذكركم بأوجاعي.

مر هاليوم وجاء يوم ويوم ويوم فتحي له 4 أيام في ليبيا ما رنش ولا دز ونقاله مقفل وفاطمه غير مستخدم.

شن ندير بس؟؟؟؟؟؟؟؟
نحكي لـ سندس:-كيف هكي كيف؟؟؟
سندس:-ما ديما يدير فالطروح هذين.
أنا:-بس قلبي مش مطمن نبش يكلمني نبي بس نطمن أنه كويس.
سندس:-هو قالك اسبوع تحملي كم يوم بعدها توا نخلي توم يمشي لحوش هله يطمنك عليه.
أنا:-بس.........
سندس:-لا بس ولا شئ هله ما يعرفوش عثمان.

بعد يومين ،،،،كنت نقرأ في الدار وبالي مشغول...
خشت عليا سندس:-تقري؟؟؟
أنا:-لا تعالي كنك؟؟؟؟
وابتسمت:-فتحي!!!!!!
سندس:-لا
هذا سعد قال بابا ومراته عازمينا ع العشاء.
منسقين مع سعاد جايه اليوم.
أنا:-امس حكيت معاها قالتلي انها جايه بس ما قالت عشاء وجو.

مشينا كان الحوش متغير كلياً مغيره كل شئ حسيت حتى ريحة ماما اختفت من المكان.

وجعني قلبي نجو لحوشنا ضيوف وين صارت هذي؟؟؟؟؟؟؟؟
لا وما خلتنا نصبوا وحلفت تجيب وتحط قدامنا.

تبينا ضيوف زايد ناقص.....،
خواتي مشن الأمر عادي ويهدرزن معاها عادي.

بس أنا لا حتى دموعي خانني ونزلن نشوف في دارنا ومانقدرش نخشها.
مطبخنا،،،دار ماما.

مرات بوي:-كنك ساكته يا رجاء؟؟؟؟
ولا مريضه؟؟
أنا:-لالا كويسه.
سعاد:-غير اذكرت المرحومه ماما بس.
مرات بوي:-اها  الله يرحمها.
امتى شهرك؟؟؟؟؟
أنا:-مزالت في السادس.
مرات بوي:-على سلامه ان شاء الله.
وسندس؟؟؟؟؟
سعاد:-لا مزالت سندس.
مرات بوي:-اها ربي يرزقها.
تقرن كلكن؟؟؟؟
سعاد:-رجو بس تقرأ،،سندونه سيبت.
مرات بوي:-ايش داير فيك الحمل مع القرايا يا رجاء؟؟؟
أنا:-الحمدالله.