حيـاتـي💔(مكتملة)

الـحـلـقــة 14

حياتي 14

وسعاد لما سألت ما جاوبوها.......

استغربت أن ما خذوش موبايلي لعند توا بس متوقعه فأي وقت حيأخذوه..

اختفى حتى شغله وحافلته معش جاهن...

مرن أيام وسعاد مشت لطرابلس ورديت تعيسه وحيده.

بابا ما يحطش عينه في عيني ويتحاشى فيا،،والشباب ما نقدرش نسألهم.

مرن شهرين ع الكلام هذا وتمت السنه الأولى ونجحت...
يوم نجاحي ما كنتش فرحانه ولا حد من هلي عبر نجاحي،،

كنت قاعده في داري نبربش في حوستي سمعت الباب وضيف جاااااء.

خذاني الفضول وطلعت وقفت قريب من المربوعه،،سمعت صوته💔

اهاااااا والله صوته فتحي هذا..

خشيت للدار يارب يارب...

بعد وقت دق الباب وخش ابراهيم ووراه سعد.
أنا حسيتهم بيأخذو النقال!!!!!!!!!!!!

أنا بحتت فيهم:-كنكم؟؟؟؟؟؟؟؟
سعد:-فتحي كان هنا وطلبك أخره،، الراجل مزال عند كلمته.
أنا:-و أمه؟؟؟؟؟
ابراهيم:-ما لك ومال امه،،المهم هو يبي.
بعدها عشان ما يغضبها ولا يصيرن خلافات قررنا الزواج يتم من وراها.
بدون علمها.

أنا انصدمت:-شنووووو؟؟؟؟؟؟
من وراها!!!!!!
ليش يتم ف السر زواجي؟؟؟؟؟
دايره عار ولا فضيحه؟؟؟؟؟؟
شن ذنبي من بين البنات.

وعزقت روحي نبكي ع السرير.

ابراهيم:-بلا بكاء الراجل كويس ما يتعوض كنز والله.
أنا من بين دموعي:-حتى ولو يقنع أمه قبل شن ذنبي نأخذ واحد من وراء هله.

سعد:-هله عارفين،،،كل هله عارفيه بوه وخواته هو ما عنده خوت .

أنا :-حتى فرح مش من حقي صح؟؟؟
اصلا مش شايفه اي قيمه لرأي الباين متفقين على كل شئ.

ابراهيم:-لا في فرح،،،،وفرح كبير اخره.
وكل صحباتك واقاربنا يحضروا.....

سعد:-بس جهزي روحك من بكره لأن اليوم بنطلعوا نشوف قاعه بعد 15يوم.

أنا:-لااااااا
ليش استعجلتوا!!!!!!!!!
نبي خواتي يجن،،،نبي وقت.
نبي نجهز روحي.
فرح هو نجهزله روحي قبل،،،ولا موت يجي فجأة؟؟؟؟

ورديت نبكي،،،،،
سعد خبط الطاولة كسرها وطلع وطلع وراه ابراهيم يتنهد.

كملت كل وقتي بكاء....
خوتي وبوي يدوروا في قاعه لفرحي وأنا نبكي،،،والله ما عمرها صارت.

رن الموبايل كان فتحي قلت في بالي نرد عليه بالك نقدر نقنعه يأجل بالك امه ترضا.

أنا:-الو
فتحي:-السلام عليكم.
انا:-السلام عليكم بعد شهرين!!!
فتحي:-اللّه غالب،،كان حكيت معاك وقتها والموضع ساخن كنا تعصبنا وانتهت القصه،بس اجلتها لعند ما بردت ونجحتي.
نحساب عندك العلم اني قافل عمداً لعند ما تهدأ الأوضاع.
خوتك عارفين.