حيـاتـي💔(مكتملة)

الـحــلقـة 27

حياتي27

شفت الموت مع الألم حسيت روحي تبي تطلع معقوووله هذي نهايتي..

جاء عمي وخذوني للمستشفى وأنا نصررررخ حسيت دمي كمل كله ما ظني نعيش بعد النزيف هذا كله.

جينا للمستشفى خششوني للعمليات حالة طارئة الجنين ميت جوا ولازم يطلعوه ويوقفوا النزيف.

ااهااا ما تستغربوش الجنين مات.
ولدي يلي حملت بيه تسع شهور وتحملت كل الناس تحملت كل شئ تحملت بعاد فتحي عني زمان عشان خاطر ولدي وحملت بوي ومرات بوي وحملت أني نكون عالة على خواتي وحملت وصبرت على مرض فتحي وحملت عمتي وبناتها حملت كل شئ وأنا نطمح أن هالولد هو هدية من الله حـ يعوضني عن كل حاجة.

بس انحرمت منه،،ولدي مات جوايا،، مات على يد عمته.

غرست هذك الممرضه الحقنه وكلها ثواني ومعش فطنت ولا سمعت،،،،.

وعيت على صوت حركة جنبي حاسه ظهري ورجليا وكل جسمي منملات حتى لساني.

تلفتت شفت الممرضه قاعده تغيرلي في التغذيه.

ابتسمت:-الحمدالله على سلامتك.
ربي يعوضك خير.

أنا دموعي نزلن وحده وراء لأخره مات مات ولدي:-ن نبي نشرب
عطشانه.

جت جبتلي اميه وشربت.
الممرضه:-شن تحسي روحك توا؟؟؟
أنا:-مش حاسه بـ شي كل جسمي منمل.
الممرضه:-هذا تأثير البنج مازال،، ضاع البيبي وكان في احتمال 30% ان يأثر على حياتك من كثر ما نزفتي.

بس الحمدالله الدكتور قدر يوقف النزيف.
لازم تعوضي جسمك على كمية الدم يلي خسرها ركبنالك دم وأنتي لازم تأكلي وجبات متكامله ومغذيه.

على كلٍ نقدروا توا نطلعوك للقسم عشان هلك يطمنوا عليك.

أنا:-لااااا
لا لو سمحتي ما نبش نشوف حد.
قوليلهم راقده ولا ممنوع الزيارة قولي أي شي لأني ما نبش نشوف حد.

الممرضه:-حاضر.

وطلعت،،،،،،
مازال مفعول البنج في جسمي حسيت روحي نبي نرقد أخره ربي يصبرني على فراقك يا ولدي.

جربت اليتم والترمل وفقد الولد وأنا مازلت شابه.
شن مازال في شئ في هالدنيا ما جربتيه يا رجاء.

غفيت شفت فتحي طيف فتحي حسيته معايا ف الدار.

نضت مخلوعه ما شفت حد،،وبدأ جسمي يوجع في اه اه ياربي على هالألم.
ياااااربي اجعله اجر صبري ومصائبي كلهن.

بعد وقت جت ممرضه وحده أخره:- ها شن تحسي خف مفعول البنج؟؟

أنا:-خف
بس جسمي جسمي كله ظهري ورجليا ألم رهيب.
الممرضه:-طبيعي وقعتك مش ساهله،،وجسمك خسر دم واجد حتى العملية ما كانت ساهلة.
بس ان شاء الله حـ تتحسن حالتك.