حيـاتـي💔(مكتملة)

الـحـلـقــة 26

حياتي 26

نضت على صوت جنبي تقعدت طولت ومااستوعبت أنا وين؟؟؟؟؟؟

شفت أم فتحي تصلي ،، استوعبت واذكرت أخيراً.

عمتي:-فجعتك؟؟
انا:-لالا
عمتي:-الفجرأذن تعالي نوريك الحمام.

مشيت معاها توضيت وصليت وطولت وأنا ندعي وهي خشت فراشها.

كملت صلاتي وما قدرت نرقد ألا لما نلمح فتحي حتى ثانية قعمزت جنبه كان راقد مستوي تماماً حتى لمسة يدي ما حسها.

قبل مجرد ما نتحرك من السرير ينوض معقوله هذا كله تعب ومرض يا عمري..
ربي يشفيك ويخليك على خاطر ولدك المسكين يلي مزال مافرح بالحياة.
ولدك الملهوف عليه.

حسيت بحركة عمتي مزلت مش مطمنتلها واجد خايفه تقولي خليه راقد ولا تهزبني اكيد مازالت ما اقتنعت غير الله غالب على صحة ولدها.

مشيت لـ مرقدي على طول غفيت،،،،،،

بعد وقت نضت مرعوبه من رؤية
""حلمت أن ماما ماسكه بيد فتحي واليد لأخرة حطتها على بطني وعيونها لوطا قلتلها اكثر من مره بحتي في ما ردتش عليا""

عمتي كان نومها خفيف فطنت أني قعمزت فجأة:-كنك يا بنتي؟؟؟
أنا:-لالا شئ.

حطت يدها على راسي:-بسم الله عليك.
وعطتني أميه،،،وقعدت مقعمزه لعند ما أنا رديت اتكيت ردت حتى هي.

وقعدت حاطه يدها على راسي ونسمع فيها تقرأ في اية الكرسي بصوت واطي.

تريحت شووووي ورقدت،،،

نضت اليوم الثاني ما لقيتش أم فتحي الباين أنها واعيه.

مشيت للحمام ،،لما جيت لقيت البنات جايبات فطور.
أنا:-صباح الخير
:-صباح النور.

قعمزت وجت أم فتحي وفطرنا.

فاطمه:-نوعوا فتحي يفطر؟؟؟
كانت تسأل في أمها أنا بطريقه عفويه :-لالا خليه يتريح على راحته.

عبير عطتني خزرة تمنيت أني انخرصت بنت وتسأل في امها شن دخلني أنا؟؟؟؟؟

ام فتحي:-لالا خلنه متريح زي ما قالت رجاء.
افطري يا بنتي ما اتحشمي.

أنا نفطر ونشوف في عبير ونهله ونظراتهن مش طايقني بككككل مش عارفه من يوم عرفتهن هكي بس السبب مجهول.

بعد صليت الظهر سيبت فتحي راقد مزال ومشيت للمطبخ لقيت فاطمه وعبير في المطبخ.
أنا:-نساعدكن في حاجة؟؟؟؟؟؟
عبير:-لا خشي.
فاطمه ارتبكت وشفتها كيف نغزت عبير:-لالا كل شئ جاهز نستنوا بابا بس.

أناابتسمتلها وخشيت،،خسارة فيكن القدر كان مرات خوكن افعى وحقيرة ره حطاتها على روسكن.

بس أنا توا المهم عندي فتحي ما يهمني شئ غيره...
ونتحمل أي شئ على خاطر نشوف صحته تمام.