حيـاتـي💔(مكتملة)

الـحـلـقــة 22

حياتي 22

مرن أيام من الاستقرار بس صحته مش عاجبتني نهائي مش عارفه كنه.

يوم من الأيام جيت من المعهد وقعدنا نتغدو...

فتحي:-شخبار الدراسة؟؟
أنا:-لعند توا تمام.
وابتسمت.
فتحي:-مش ناقصك شئ؟؟؟؟
أنا:-لالا أبداً الحمدلله.
فتحي:-أنا نبي نمشي لألمانيا مع صحابي بعد يومين
أنا وقفت ع الأكل:-ألمانيا!!!!!!!!!
ليش؟؟؟؟؟؟؟؟؟؟؟؟
فتحي:-جديد عليك أنا ما ديما هك مع صحابي.
أنا:-لا بس مش درجة ألمانيا.
امطول؟؟؟؟؟؟؟؟؟
فتحي:-لالا اسبوع عشر أيام دهواري بس.
أنا:-واوووو ألمانيا بعيد يا فتحي.
فتحي:-والله لي زمان خاطري فيها بس كان خاطري تكوني أنتي معاي،،بس أنتي تقري وحامل.
وجت سفرة صاحبي هذا يبي يمشي يقرأ نبو نمشوا نحنا كلنا الشله دهواري و رادين.
أنا:-ان شاء الله.
باه أمك يلي تحسابك في الزاوية، شن تقوللها؟؟؟؟
فتحي:-اليوم نحطك عند هلك ونمشي نقعد معاها يومين بعدها نقوللها أي حاجة الزاوية ولا طرابلس ولا طبرق.
أنا انصدمت هذا ما كان محسوب:-عند هلي؟؟؟؟؟؟؟؟
بس بس أنت عارف أن بابا ما يخلينا نباتوا عنده عشان الوليه.
فتحي:-عارف عارف
حوش خوتك بروحك تأخذي راحتك اصبري على خاطري.
أنا مسكت يده:-ياريت بس تشوف دكتور على مرضتك.
فتحي:-أنتي هامك الموضوع هذا واجد صح؟؟؟؟؟
أنا انحرجت وحسيت بحرارة في كل جسمي:-لالا ما تفهمش غلط أنا قصدي على الألم يلي في قلبك.

فتحي:-اطمني أنا راجل وصحتي كويسه ممكن بس نغزه برد واهو بالك على قولتك انمر على دكتور.
عارفه يا رجو،،،،نعد في الدقايق على جيت ولدي ولا بنتي،،، لهفه مش عاديه.

أنا:-ربي يفرحك بيه يااارب وتشوفه سليم معافى وتفرح بيه وبخوته.
فتحي:-ههههههههههههه كان عشنا.

ضميت حوسة المطبخ وضميت دبشي ومشى حطني في حوش خوتي كان قاعد سعد بس.

سعد:-وين ماشي فتحي؟؟؟؟؟؟
أنا:-ألمانيا مع صحابه.
سعد:-عليك قصه صراحه والله مش معقوله يسيبك لنا ويقيدنا.
أنا:-عيشوا عادي مش حنقيدكم،،كان قصدك ع المعهد هو سيبلي فلوس توا ندير حافله.
سعد:-لا مش هكي،،،،بس نحنا واخذين ع الحرية نسهروا برا للفجر عايشين كيف ما نبوا.
ومرات شلل يجونا هنا دخان وكوارط لعند التسعه ف الصبح.
فـ صراحه وجود وحده في الحوش مش مقبول.

أنا:-نقفل على روحي في الدار،كأني مش قاعده.
على أساس الحوش فاضي.

سعد:-اااااخ وخلاص.
ناس تهيج في ألمانيا وناس تبتلى في مصيبه زيك.
عدي عدي انطمري في الدار.

وجعني كلامه في فتحي أما أنا واخذه عليه الكلام هذا.
مع أن قلبي من جوا متقطع ان حوشنا تحرم علينا.
حوشنا ريحة ماما وذكرياتنا بين يوم وليله تحرمه علينا وليه ما نعرفوا حتى اسمها.

خشيت للدار الحوش كله مزري معفن عفن متراكم على بعضه.

طبعاً مستحيل نقدر نقعد هكي خليت سعد طلع وشمرت عن ساعدي.