حيـاتـي💔(مكتملة)

الـحـلـقــة 9

حياتي 9

عليك يوم وعليك ليلة وعليك عمر....

سعاد راقدة كأنها ميته ما تحركت بكل كل شوي نمشي نتأكد من أنها تتنفس.

وأنا من كثر ما كان اليوم اسود وسئ ركبني ابراد مع أن الجو عادي قاعدة نرجف ،نسمع في صوت سنوني وهن يخبطن...

حسيت الجو برا هدي في آخر الليل قلت نطلع بالك نقدر نطمن على سندس..

طلعت برمت الحوش كله بابا كان راقد في الصالة قدام الدار يلي فيها ماما وسندس.
والدار مزالت مقفوله.

وابراهيم وسعد راقدين في دارهم،، رديت للدار.

يا عوينهم والله عطاهم ربي مسودين يومنا وراقدين متريحين.
تي قسم بالله معاملتهم هي يلي خلت سندس هكي.
هي يلي وصلت سندس لوين ما هي توا.

حسبي اللّه ونعم الوكيل.....

كنت نبرم في الدار وفجأة لمحت موبايل سعاد.
و جت في بالي فكرة.

قفلت باب الدار وخشيت تحت البطانيه واتصلت بـ الصابر.

الباين كان راقد حتى هو نضيفه لقائمة يلي عطاهم ربي يديروا الكارثه ويرقدو هانيين.

الصابر:-ايوه.
أنا:-راقد!!!!!!!!!!!!!!!!!
يا عوينك عطاك ربي النوم.
الصابر:-رجاااااااااء عيوني رايفت عليك يا قلبي.
والله نبي نموت من الرياف.
أنا:-يا خساره يالصابر انت حبك كلام بس كلام بلا افعال.
خيبت ظني فيك والله،،خليتني نتأكد ان اختياري كان غلط.
الصابر:-تي شن تقووووولي انتي؟؟
كنك؟؟؟؟؟؟؟
فهميني؟؟؟؟؟؟؟

أنا:-وصلت معاك تأذي سندس في شرفها،،سندس مهما صار هي أختي شرفها شرفي،،واذيتها اذاي.
كييييف ادير هكي فيا؟؟؟؟؟
كيف؟؟؟؟؟؟
اكيد سيرتنا على كل لسان توا.

وقعدت نبكي.

الصابر:-سامحيني يا عمري،سامحيني يا قلبي والله والله فقدت اعصابي لما حسيت اني خسرتك بسبب ........ زي سندس.

أنا عصبت:-احترم نفسك سندس اختي.
حباتك ووثقت فيك وانت طلعت شنو؟؟؟؟؟؟؟؟
طلعت كذاب خاين غشاش.
على فكرة انت مش بس كذبت عليها انت كذبت عليا حتى انا.

تقولي انا صح ندير في علاقات بس لا يمكن نأذي بنت.
ويلي درته في سندس شن هذا؟؟؟؟
مش أذيه.
سندس خطيبها سيبها بسببك وتقولي لحظه عصبيه.
معناها بكره بس تعصب تخلي ليبيا كلها تعرف ان رجاء كانت على علاقه بيك.

الصابر:-سندس ذنبها انها......
أنا:-سندس ذنبها انها حباتك ووثقت فيك وامناتك على روحها وشرفها.
وانت شن درت؟؟؟؟؟؟؟؟

سيبتها وخنتها وبعتها في الوقت يلي هي كانت محتاجه لك.
لا ومشيت طلبت اختها بش تقهرها اكثر.
ولما انخطبت وقرب فرحها مشيت دمرت حياتها ومستقبلها.