حيـاتـي💔(مكتملة)

الـحـلـقــة 16

حياتي 16

العشيه جت سندس لحوش هلي.

سندس:-ليش ما مشيتي لحوشك؟؟؟
اشتهيتي نكد خوتك يعني؟؟؟؟

أنا سكتت مش قادره نحكي وصاني معش نحكي لحد.
سندس:-انطرشتي؟؟؟؟؟؟
شن صاير احكي.

أنا:-فتحي عنده شغل في اجدابيا الله غالب.
ألا القعده مع خوتك ما نبيها.
سندس:-ايش رأيك تجي تقعدي عندي كم يوم نغيروا جو مع بعضنا.

أنا:-باه خليك هنا نديروا الجو هنا.
سندس:-الحق يا رجاء الحوش هذا ما نحبه بكككل يا بال ماتت ماما ،،خاطري معش نخشه بككككل.
والله على خاطرك أنتي مزال نجي.

أنا:-أصلاً احتمال جاي اليوم فتحي مرات نمشي لحوشي كان لاقدر الله ما صار ساهله توا نستأذنه.

سندس:-اخس عليك نذاله صار لا قدر الله تجي معايا.
تافه ،فعلاً أنك تافه.

بعدها تعالي هنا كيف احتمال؟؟؟؟
اتصلي بيه شوفيه.

أنا انحرجت منبش نرن عليه ومايردش قدامها على الأقل بروحي نتحمل.
أنا:-لالا قالي معايا أصحابي ما ترنيش عليا لما نجي توا نرنلك أنا.
أنتي كان ما تبش اتعشي عدي كان هو ماجاء توا نجيك مع بابا.

سندس:-لالا مانيش قاعده المهم اطمنت أنك بخير.
توا نكلم تووووومي.

رنت عليه،،من اول ما ضرب رد عليها طول.

سندس:-توم تعااال خوذني .
هيا ما طولش.

عليك قهر اللهم لا حسد أنا ما يردش ويدير في مشغول ويقفل في موبايله هذا كله وأنا عروس.

مشت سندس،،،،على العموم يا رجاء الوحدة والتعاسة وراك وراك مش حيسيبنك.

قعدت نرن على فتحي من الصبح معش اتصل مش عارفه هل جاء من اجدابيا ولا مزال في الطريق.
يااااااخوفي بس يوصل متأخر ويقعد عند هله ويقولي نجيك بكره.

بعد ألف رنه و رنه.....
وصلني مسج ""شوي حاجة ربع ساعه ونجي للحوش توا نتصل بيك""

طرت في السماء عليك فرحه طلعت من بين الدموع،،مشيت نجري للدار ضميت كل دبشي .

وغيرت لبستي ودرت لمسات خفيفه.

أوووووف مش متاع مواعيد لها نص ساعه الرسالة...

شوي رن عليا من كثر ما قلبي رجف الموبايل طاح ع السرير.

أنا:-الو.
فتحي:-كيف الحال؟؟؟؟
أنا:-الحمدالله،،
الحمدالله على سلامتك.
فتحي:-ههههههههههههه الله يسلمك سامحيني والله كنت ندهور انا وولد خالتي يوري فيا في حوشه في اجدابيا توا غير جيت.
باه يلي لقيت أمي مش قاعده طالعه مع خالتي لجارتها كان هك ره ما قدرتش نحكي.

أنا انصدمت حسيت بـ شلل لا مش شلل بـ موت كل جسمي قعد يرجف والدموع كعادتهن سريعات في النزول:-اجدابيا !!!!!!!!!!!
أمك!!!!!!!!!!!!
انت مش على أساس تبي تروح تأخذني؟؟؟؟؟؟؟